JOHAN 15

Jisu ju Kurungasoliu Tsütsü

1“I kurungasoliu tsütsü, tüsho I Buh ju kurungasolu thsürü. 2I kheak aso masokhi khah aban apinü rhea bahchoh; tüsho aso asokhi khah aban hihde asoshihpü apinü mülakkhitchoh. 3Inü nüsa ki asukkhi yu hode nüsa müsühkhita lah. 4I kheak lang, tüsho I nüsa kheak labah. Aliu ching mülade akhahnü aküdah thsüde aso masokhi nangde, nüsa I kheak mülasho nüsa she masokhuk. 5I kurungasoliu, nüsa akhahbo. Shepü I kheak lacho, tüsho I api kheak lanü hihde asochoh; tümütüsho I mübede nüsanü tümü müthsükhuk. 6Khürünü I kheak mülasho, sangkhah nangde jipa bahchoh tüsho kungabahchoh; arünü jurü hanmukhungbah mo ching jipyukchoh, tüsho jurü aniuabahchoh. 7Nüsanü I kheak lasho tüsho I yubo nüsa kheak lasho, nüsanü tümü künlanü akheangbah, tüsho ju nüsa thsungkheak rhimobah. 8Nüsanü aso hihde asokhinü I Buh müretahbah; junangde nüsa I jingyanrübo thsübah. 9Abuhnü I muzhokhi nangde, inü she nüsa muzhodo; I muzho ching laang. 10Nüsanü I yuzüng zosho, inü I Buh yuzüng zobah api amuzho ching lakhi nangde nüsanü I muzho ching labah.

11“I asühkhi nüsa kheak lapü tüsho nüsa asühkhi khiukde alapü thsüde inü harü nüsa ki asukdo. 12#Jhn 13.34; 15.17; 1 Jn 3.23; 2 Jn 1.5Inü nüsa muzhokhi nangde nüsa khülangnü khülang muzhoachihpü thsüde ha I yuzüng ah. 13Khürünü api müyamrü thsungkheak nihbuh rhangdung jihkhi kheaknü püpü amuzho atobe müla. 14Inü nüsa ki thiyukhüm jihkhibo nüsanü rhimosho nüsa ju I müyamrübo ah. 15Kheakü inü nüsa ki yamlarübo de müji, tümüde yamlarünü api putungrünü tümü rhimochonü mümükheah; tüshe inü nüsa ki müyamrübo de ji, tümüde inü I Buh kilimnü asokhi alala nüsa ki mükheahshihdo. 16Nüsanü I mokhitkhi yung, tüshe inü nüsa mokhit tüsho yübah tsüpde alabe nüsa sangaso asopü thsüde nüsa moyuk, junangde nüsanü tümüpürü I mung chingnü I Buh ki kheangbanü apinü nüsa kilim jihbah. 17Nüsa khülangnü khülang muzhoachihpü thsüde inü nüsa ki thiyukhüm jihchoh.

Alominü Athraneankhi

18“Alominü nüsa thraneansho, nüsa müthraneanyide I thraneando de nüsanü mükheahang. 19Nüsa ju alomi yo thsükhülaa, alominü nihbuh yo muzhobah, tütüshe nüsa ju alomi yo yung tüshe alomi chingnü inü nüsa mokhit, jumonü alominü nüsa thraneanchoh. 20#Mt 10.24; Lk 6.40; Jhn 13.16Inü nüsa ki, ‘Yamlarü khülang ju nihbuh putungrü kheaknü atobe yung,’ de athakhi lümkhitang. Arünü I thsümüchisho, nüsa she athsümüchibah. Arünü I yubo zosho, nüsa ki she anibah. 21Tüshe harü alala I mung dünkheaknü arünü nüsa ki rhimochoh, tümütüsho arünü I thiyibuh mümükheah. 22I arübah arü ki masukkhülaa, arünü neak müyihbeaka labah, tüshe kheakü arü neak thsungkheak arünü amudopü müla. 23Shepünü I thraneanchonü I Buh she thraneanchoh. 24Shenü she mürhimokhi inü arü bolung mürhimokhülaa, arü neak mülade alabah; tüshe kheakü arünü ngüdo tüsho I le I Buh chido thraneando. 25Tüshe ha yakzan ching, ‘Amütsan mülade arünü I thraneando,’ de thrüta lakhi yu dünjipü lakheah.

26“Tüshe küyimki I Buh kilimnü inü nüsa kilim thiyipü lakhi arungrü arüba, Abuh kilimnü arükhi thiyuro Menü I dünkheak khipkhitbah. 27Tüsho nüsanü she I thiyumütsan thsübah, tümütüsho atankih chingnü nüsa I lung lakheah.

Currently Selected:

JOHAN 15: YIMCBSI

Highlight

Copy