LEVI 1
1
Taka Kingaünkhi
1 Atungpuhnü Mosa ji tüsho ashorupung khimyam chingnü tha: 2Israel mihtsürübo ki thaang: Küyimki nüsa khürünü Atungpuh kilim akam-shiwüh chingnü kingaün jihbanü, nüsanü kingaün ju moshi yungsho mihnu bolungnü jihang. 3Apinü ajihkhi shiwüh ju taka kingaünpü thsüsho, apinü lapha mükihkhi pung handarübeah. Ju Atungpuhnü leangkhikhukpü thsüde Atungpuh shorupung khimyam lunglim yüzah limro zoshang. 4Apinü taka kingaünkhi ku kheak akhah nimbah, tüsho api neak thsükhiabahkhi kingaün dün leangkhibah. 5Atungpuh miki apinü shiwüh pung ju alaksahbah, tüsho Aron tsührü amükeamrübonü thiyih lubah ayübah, tüsho kingaün sadam khuh phüyi tüsho khimyam lunglim yüzah limrobo kheak rhakkihbah.
6Tüsho apinü shih ju aküp khuka bahbah akhapthünakbah, 7tüsho Aron tsührü amükeamrübonü atakbe sang tsanglunga kingaün sadam kheak zobah mo thsahkihbah. 8Arünü shih khapthünakkhi düdrebo, aku tüsho amüdang mo ching yuka takbah; 9tüshe bukningbo le ajingbo apinü kenü müsühabahbeah. Tüsho amükeamrünü ju alala Atungpuh asühshihpü kingaün sadam kheaknü arhümthüneade atakbah.
10Mürangkhüh mihtsürü khülangnü namfimihnubo yungsho mihnubo lungnü taka kingaünkhi jihsho, ju lapha mükihkhi pung thsübeah: 11Apinü ju kingaünpung akulimpeangnü alaksahbah, tüsho Aron tsührü amükeamrübonü kingaünpung khuh phüyi ching athiyih rhakkihbah. 12Apinü ju khapthünakshu amükeambuhnü aku tüsho amüdang lua kingaünpung mo takkhi kheak akhinashu thsüde azobah; 13tüshe apinü bukning le jingkhahbo kenü amüsühbah, tüsho amükeambuhnü alala lua kingaünpung kheak Atungpuh ki taka kingaün jihbah. Ha taka kingaünkhi rhümnü Atungpuh asühshihchoh.
14 Atungpuh kilim taka kingaünpü ju wuhnu thsüsho, müthrithrümpü yungsho chithüreku nunu thsübeah. 15Amükeambuhnü ju handarübah aku rhoshaka kingaünpung kheak takbah, tüsho athiyih kingaünpung yean dungkihbah. 16Apinü ahidram yihkhitbah tüsho anambo she rukkhia kingaünpung aniakhiuklim awah lapung bahbah. 17Apinü muthokhitshihde aghidükeangne kheak tholobah apang ju athorüpbah, tüsho alala kingaünpung sang kheak takbah. Ha taka kingaünkhi rhümnü Atungpuh asühshihchoh.
Currently Selected:
LEVI 1: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
