ABEKHIT 40
40
Arüngkhimyam Thsükhi
1Judüki Atungpuhnü Mosa ki tha, 2“Akhuhbe khinu atan nimung Atungpuh shorupung arüngkhimyam thsüa zhipshang. 3Thiyuzüngbo zahkhi tangzüng sangdan ju ching zoang tüsho ju miki zhindokhim yukang. 4Dükhüm hande azahang tüsho ju kheak kukrukbo zoang. Kheaküshe tsünpung dubopung lude azahang tüsho ju kheak tsünpungbo zoang. 5Jinjinlak takpü tangzüng sangdan miki suna kingaün sadam zoang tüsho khimyam ching yüzahpung ki zhindokhim zhinang. 6Ashorupung arüngkhimyam ching yüzahpung ki taka kingaünpü sadam zoang. 7Ashorupung arüngkhimyam le kingaün sadam dükeak müsühmüra-phuru zoang, tüsho ju ching ke yukang. 8Alala mükamde khikzhakpung thsang tüsho ripit kheak zhindokhim zhinang. 9Amujube müdangke luang tüsho arüngkhimyam le ju ching lakhi alala mujude-müsühkhitang; nünü kukruk alala müsühkhitbah tüsho amüsüh labah. 10Taka kingaünpü sadam tüsho pungphuru alala müsühkhitang, tüsho kingaün sadam ju khide amüsüh labah. 11Müsühmüra-phuru tüsho adubopung müsühkhitang. 12Jushu nünü Aron le api tsührübo ashorupung khimyam ripit ki bede arang tüsho arübo kemüyihjang. 13Nünü Aron kheak amüsüh khimmih phukihjang, tüsho api mujude-müsühkhitang, junangde amükeamrü thsüde apinü I tankihbah. 14Nünü api tsührübo bede arang tüsho khahkhih-pangkhümpü khümjang. 15Arü abuh mujudemüsühkhitkhi nangde arübo mujudemüsühkhitang, junangde amükeamrübo thsüde arünü I tankihbah; tümüde arü mujude-müsühkhitkhi ju arü lün amuyung ching tsükjide akheam mülakhi amükeamrü thsübah.”
16Junangde Atungpuhnü api kilim thiyukhüm jihkhi nangde Mosanü alala rhimo. 17Tüsho kam mahnepü akhuhbe khinu, atan nimung arüngkhimyam ju thsü. 18Jumonü Mosanü arüngkhimyam ju thsübah athranyukbebo yuk, sangbeakbo zhipshih, akhrihbebo yuk, tüsho dungjingbo zhipshih. 19Tüsho Atungpuhnü thiyukhüm jihkhi nangde apinü arüngkhimyam kumung kheak phukih tüsho ju kheak amuhiudobe yihkih. 20Apinü lungbeak mahne ju lubah tangzüng sangdan ching yuk, sangdan phuhpho ching akhrihbebo yuk, tüsho sangdan mikheak mihmüthsüm binkiu yihkih. 21Jushu apinü sangdan ju arüngkhimyam ching yuka zo tüsho zhindokhim zhin. Hanangde Atungpuhnü thiyukhüm jihkhi nangde apinü tangzüng sangdan ju zhindo. 22Apinü ashorupung khimyam ching dukulim, zhindokhim aleanglim dükhüm yuka zo; 23tüsho Atungpuhnü thiyukhüm jihkhi yande apinü ju kheak yikhap akhinashu thsüde Atungpuh miki zo. 24Apinü ashorupung khimyam ching düjinglim, dükhüm mikhuh kheak tsünpung dubopung zo; 25tüsho Atungpuhnü thiyukhüm jihkhi nangde apinü Atungpuh miki tsünpungbo takkih. 26Apinü ashorupung khimyam ching zhindokhim miki suna kingaün sadam zo; 27tüsho Atungpuhnü thiyukhüm jihkhi nangde apinü ju kheak rhümthüneabe tak. 28Apinü arüngkhimyam ripit kheak azhindobe yihkih. 29Apinü ashorupung khimyam ripit miki taka kingaün sadam zo, tüsho Atungpuhnü thiyukhüm jihkhi nangde ju kheak taka kingaünkhi le hi kingaünkhi jih. 30Apinü arüngkhimyam le kingaün sadam dükeak müsühmüra-phuru zo, tüsho ju ching müsühmürapü ke yuk; 31tüsho Mosa, Aron, tüsho api tsührübonü ju chingnü arü khahbo le jingbo müsüh. 32Küyimki arü ashorupung khimyam ching yüba, tüsho arü kingaün sadam ki arübanü Atungpuhnü Mosa ki thiyukhüm jihkhi nangde arünü müsühmüra. 33Tüsho apinü ashorupung khimyam tüsho kingaün sadam alala mükamde khikzhakpung thsü, tüsho khikzhakpung ripit kheak zhindokhim yihkih. Junangde Mosanü rhimo alala ban.
Amo tüsho Müretahkhi
(Wüh 9.15-23)
34Judüki amonü arüngkhimyam shodo, tüsho Atungpuh müretahkhinü mide kam. 35Tüsho Mosa ju ashorupung khimyam ching yüzahpü mukukde alakheah, tümütüsho amo ju kheak keam tüsho Atungpuh müretahkhinü arüngkhimyam mide kam. 36Küyimki arüngkhimyam kumungnü amo ju akhinbanü, Israelrünü arü mikhuhlim tsahmusude alakheah. 37Tüshe amo ju makhinsho, ju makhinyi nimung khiungde arünü mütsahmusu. 38Tümütüsho Israel yamkhün alala miki, arü hantsahkhi amuyung, Atungpuh amo ju animung arüngkhimyam kumung la, tüsho azhing ching ju kumung mo lakheah.
Currently Selected:
ABEKHIT 40: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
