ABEKHIT 39
39
Amükeamrü Khimmihbo Thsüjihkhi
(Abe 28.1-14)
1Arünü biyi le mürümmuchu tüsho aneakrüm hingnü arü amüsüh dangpung ching tankihpü atsüdak khimmihbo keak; arünü Atungpuhnü Mosa ki thiyukhüm jihkhi yande Aron thsungkheak amüsüh khimmih thsüjih.
2Tüsho apinü amükeamrü khim suna, mürümmuchu, aneakrüm hing, tüsho atsüdak khimthünaknü thsü. 3Tüsho arünü biyi, mürümmuchu, aneakrüm hing tüsho atsüdak khimthünak ching yak khode akeakpü suna ju abeak kamde kingnakbah hing thsüde tsütnak. 4Arünü amükeamrü khim thsungkheak dubuhrümbe ju akheam mahne kheak yihkihpü thsü. 5Tüsho amükeamrü khim kheak yihkihpü chimrümbe ju Atungpuhnü Mosa ki thiyukhüm jihkhi nangde suna, biyi, mürümmuchu, aneakrüm hing, tüsho tsüdakde akeakkhi khimthünak lakheah. 6Arünü lungmütribo ju sunanü zündoa thsü; jurü ju Jakob tsührübo mung kheanyukde thsü. 7Jushu arünü Atungpuhnü Mosa ki thiyukhüm jihkhi nangde jurü ju Jakob tsührübo lümkhitpü amükeamrü khim yo dubuhrümbe kheak rhükkih.
Treangkhümbe Thsükhi
(Abe 28.15-30)
8Arünü amükeamrü khim nangde treangkhümbe ju suna, biyi, mürümmuchu, aneakrüm hing, tüsho tsüde akeakkhi khimthünaknü thsü. 9Ju shahrihkhühnü dapbah ayunglim kipkhüh, tüsho atolim kipkhühnü thsü. 10Tüsho ju kheak shotolung ru phüyinü yihkih. Akhuhbe ru ching shoto mürümlung, kelülülung tüsho lungmüzhak yuk; 11mahnepü ru ching lungphüyak, shotolung-bluk, tüsho shotolung-müküp; 12asampü ru ching athuyung-lung, mürelungmüküp tüsho mürelung-bluk; 13aphüyipü ru ching phüyakmuchulung, lungmütri tüsho asherühü. Jurübo sunanü mükhipkih. 14Tüsho lung thürükheak mahne kheak ju Israel trük abande Jakob tsührübo mung thrütkih. 15Treangkhümbe ju suna müthsünnü liu nangde wuhrünliu chitde thsü. 16Arünü suna phuhpho mahne thsü tüsho treangkhümbe akulim akheam mahne kheak rhükkih. 17Arünü suna liu mahne ju phuhpho mahne kheak rhükkih; 18tüsho wuhrünliu mahne chitkhi ju züt thsükhi mahne kheak rhükkih, junangde dubuhrümbe amükeamrü khim mikhuhlim yihkih. 19Arünü suna phuhpho mahne thsü tüsho amükeamrü khim alunglim treangkhümbe mahne akheam kheak yihkih. 20Jushu she arünü suna phuhpho püpü mahne thsü tüsho dubuhrümbe mahne kheak amükeamrü khim mikhuh yak khode akeakkhi chimrümbe kumung athüredung kheak yihkih. 21Atungpuhnü Mosa ki thiyukhüm jihkhi nangde, arünü treangkhümbe phuhpho mahne ju chimrümbe kheak chingkihde biyi liunü amükeamrü khim kheak rhükkih, junangde treangkhümbe ju khim kheaknü müheankhit.
Amükeamrü Khimmih Püpü
(Abe 28.31-43)
22Arünü amükeamrü shulünkhim alala biyinü thsü. 23Ku chungkhitshihpü aphulung ching yeahshung; mürukrüpshihpü amung yeande kümlo. 24Arünü shulünkhim münkheam kheak biyi, mürümmuchu, aneakrüm tüsho atsüdak khimthünak hingnü tsarümkiu thsü. 25Tüsho arünü suna müthsünnü trüngtrüngpübo thsü, tüsho shulünkhim münkheam alala mükamde tsarümkiubo dükeak yuk; 26Atungpuhnü Mosa ki thiyukhüm jihkhi nangde, trüngtrüngpü tüsho tsarümkiubo shulünkhim mung yeande lakkhimuloachihde yuk.
27Arünü Aron le api tsührübo thsungkheak khimthünaknü düshihde akeakkhinü pangkhümpü thsüjih, 28tüsho kuhingbe, kuthranbo, khimthünak akhihkhihbo, 29tüsho khimthünak, biyi, mürümmuchu, aneakrüm hingnü Atungpuhnü Mosa ki thiyukhüm jihkhi nangde chimrümbe thsüjih. 30Arünü suna müthsünnü kutsünpü khülang thsü tüsho mütsanyüm kheak nangde ju kheak ha thrütkih: ATUNGPUH KILI M A MÜSÜH. 31Tüsho arünü ATUNGPUHNÜ Mosa ki thiyukhüm jihkhi nangde akulim kuhingbe kheak rhükkihpü biyi liu kheak müchekih.
Rhimo Kheamkhi
(Abe 35.10-19)
32Junangde ashorupung arüngkhimyam rhimo alala akhik thsü. Tüsho Atungpuhnü Mosa ki thiyukhüm jihkhi alala yande Israelrünü rhimo. 33Judüki arünü Mosa kilim arüngkhimyam ludarü: khimmüküp, amuhiudobe, awuhlobebo, sangbeakbo, akhrihbebo, dungjingbo tüsho athranyukbebo; 34amuhiudobe rungkhiungkhi namfimihnu küp amürüm, shihküp atsüdak, tüsho zhindokhim; 35tangzüng sangdan akhrihbebo bede tüsho mihmüthsüm binkiu; 36dükhüm, kukruk alala, tüsho Thrünpuh kilim jihkhi yikhap; 37suna müthsün tsünpung dubopung, tsünpungbo, kukruk alala, tüsho tsünpungbo thsungkheak moke; 38jinjinlak takpung kingaün sadam tüsho akhrihbebo, amujube müdangke, jinjinlak, khimyam ching yüzahpung zhindokhim; 39müwayinchi aphidung bede taka kingaünpung sadambo, akhrihbebo tüsho kukruk alala; adubopung bede müwayinchi müsühmüra-phuru; 40khikzhakpung zhindokhimbo, dungjingbo le athranyukbebo, khikzhakpung limro zhindokhim, liubo tüsho achingsangbo; ashorupung khimyam ching mukhungmüdan thsungkheak pungphurubo alala; 41amüsüh dangpung ching tankihpü amükeambuh Aron tüsho api tsührübo amükeamrü thsüde tankihpü thsungkheak amüsüh khimmihbo. 42Atungpuhnü Mosa ki thiyukhüm jihkhi nangde Israelrünü rhimo alala ban. 43Atungpuhnü thiyukhüm jihkhi nangde arü rhimobo Mosanü kheahkham, jumonü Mosanü arü müngühjih.
Currently Selected:
ABEKHIT 39: YIMCBSI
Highlight
Share
Compare
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
