LUK 3

Johan Baptijihbuhnü Thsangyuthsangrakhi

(Mt 3.1-12; Mk 1.1-8; Jhn 1.19-28)

1Tiberia Kaesar kiulongthsükhi kam thürükheak phüngüpü ching, Pontia Pilat Judea kovünor, Herod Galilee yakzanshuhrü, tüsho aniurü Philip Iturea le Trakonita yakzanshuhrü, tüsho Lysania Abilene yakzanshuhrü, 2achangbe amükeamrü Anna tüsho Kaifa lachoki, sunglo ching Thrünpuh yu Zakaria tsührü Johan kilim arü; 3tüsho apinü neak bahpü mulong müthride baptipü thsangyuthsangrade Jordan lomi alala ching yü. 4Isaia wukihrü yubo hüm ching ha thrüta lah,

“Sunglo ching zhikhi düsheak khülang:

‘Atungpuh limro thsakhamjang,

api tsahpungbo mukhiungarihdo thsüjang.

5Jindükhün aban adangmibah,

müzüng tüsho awung aban arihde akambah.

Akhürang limrobo mukhiungarihdo akambah,

dükukthuruk limrobo shahshah akambah.

6Tüsho mihtsürü alalanü Thrünpuh akhümkhit ngübah.’ ”

7 # Mt 12.34; 23.33 Johannü apinü baptishihpü arürü botobo ki tha, “Nüsa phuruto tsührübo! Bukakhiuk arüpü lakhi chingnü shepünü nüsa müzüna tsoshihkhea? 8#Jhn 8.33Mulong müthrikhi ayede aso asoang, tüsho nüsa küdah thsüde, ‘Isa abuh Abraham lah’ de athapü dütankih; tümüde inü nüsa ki thachoh, Thrünpuhnü harü lungbo chingnü Abraham tsührübo asürüshihpü kuklah. 9#Mt 7.19Kheakü ha she sangying aban kheak awü dünkih-a lah; jumonü aso masokhi sangdung aban kiushakbah tüsho mo ching yukbah.”

10Tüsho botonü api ki keokhi, “Dale tüsho isanü tümü rhimoba?” 11Tüsho apinü arü ki alo, “Shepü pangkhümpü mahne lanü, apinü amülabuh kilim jihshang; tüsho shepü tsühyungbe lanü apinü she jude thsüshang.” 12#Lk 7.29Ruk-threrübo she baptipü arü, tüsho api ki keokhi, “Thsangyurü, isanü tümü rhimoba?” 13Tüsho apinü arü ki tha, “Nüsa yihnüpü kheak hode düthrelo.” 14Bonungrübonü she api ki keokhi, “Tüsho isanü tümü rhimoba?” Tüsho apinü arü ki tha, “Athsümünimrü yungsho arükchih mudode she sho she düjangkhijangra, tüsho nüsa mihkhah dün ngükhinü reangkeamang.”

15Mihtsürübonü mükkin thsüde tüsho api ju Khrista a shi yung de Johan dünkheak arü mulong ching keokhide alakhinü, 16Johannü arü alala ki alo, “Inü nüsa kenü baptijihchoh; tüshe I kheaknü atobe, ajingkhümpü zhi she inü atrünjihpü müthülünkhi arümuroh; apinü Amüsüh Me tüsho monü nüsa baptijihbah. 17Api rhimopung müsühabahpü, tüsho api jakam ching wheat hi hanmukhungpü akhah ching phürü shuhlah, tüshe atsütbo a apinü amümütbe monü atakbah.”

18Junangde atuthsukyu ahihdo lungnü apinü mihtsürübo ki thiyusheak atsübo thsangyuthsangra. 19#Mt 14.3,4; Mk 6.17,18Tüshe aniurü Philip niube Herodia, tüsho amütsü rhimo alala apinü arhimokhi dünkheak anihbuhnü athürühkhi Herod yakzanshuhbuhnü, 20harü alala zünrubah Johan rihyam ching zo.

Jisu Baptijihkhi

(Mt 3.13-17; Mk 1.9-11)

21Kheakü küyimki mihtsürü alala, tüsho Jisu she baptibah tamkhüntamnüde alakhea, thüning khimshuh-a lakheah, 22#Mt 3.17; Mk 1.11; Lk 9.35tüsho müthrithrümpü nangde Amüsüh Me api kheak aki, tüsho yinmi chingnü düsheak khülang arü, “Nü inü amuzhodakkhi tsührü; nü kheak inü tsüde mulong keamchoh.”

Jisu Jipürübo

(Mt 1.1-17)

23Küyimki api thsangyuthsangrapü tankihkhea, Jisu kam 30 azorü lakheah. Mihtsürübonü alümkhi nangde api ju Heli tsührü Josep tsührü lakheah, 24Matthat tsührü, Levi tsührü, Melki tsührü, Jannai tsührü, Josep tsührü, 25Mattathia tsührü, Amos tsührü, Nahum tsührü, Esli tsührü, Naggai tsührü, 26Maath tsührü, Mattathia tsührü, Semein tsührü, Josek tsührü, Joda tsührü, 27Joanan tsührü, Rhesa tsührü Zerubbabel tsührü, Shealtiel tsührü, Neri tsührü, 28Melki tsührü, Addi tsührü, Kosam tsührü, Elmadam tsührü, Er tsührü, 29Jihusua tsührü, Eliezer tsührü, Jorim tsührü, Matthat tsührü, Levi tsührü, 30Simeon tsührü, Juda tsührü, Josep tsührü, Jonam tsührü, Eliakim tsührü, 31Melea tsührü, Menna tsührü, Mattatha tsührü, Nathan tsührü, David tsührü, 32Jesse tsührü, Obed tsührü, Boaz tsührü, Salamon tsührü, Nashon tsührü, 33Amminadab tsührü, Admin tsührü, Arni tsührü, Hezron tsührü, Perez tsührü, Juda tsührü, 34Jakob tsührü, Isak tsührü, Abraham tsührü Tera tsührü, Nahor tsührü, 35Serug tsührü, Reu tsührü, Peleg tsührü, Eber tsührü, Shela tsührü, 36Kainan tsührü, Arphaxad tsührü, Shem tsührü, Noa tsührü, Lamek tsührü, 37Methusela tsührü, Enok tsührü, Jared tsührü, Mahalalel tsührü, Kenan tsührü, 38Enosh tsührü, Seth tsührü, Adam tsührü, Thrünpuh tsührü.

Currently Selected:

LUK 3: YIMCBSI

Highlight

Copy