MARK 12
12
Kurungasolu-thsürü Shihdanglimyu
(Mt 21.33-46; Lk 20.9-19)
1Judüki apinü arü ki shihdanglimyu chingnü athapü tankih: “Mihtsürü khülangnü kurungasolu thsübah ju mükamde awündo, anitpung alokhün kiu tüsho aheangsadam thsü. Tüsho apinü thulu-thsürübo ki amüche jihbah lomi ashang ching hantsah yü. 2Yimlu kim ching apinü yamlarü khülang thulu-thsürübo kilim kurungasolu chingnü kurungaso shihcham lupü yüshih. 3Arünü bea lubah lak tüsho khah keangkeang thiyia tsoshih. 4Kheaküshe apinü yamlarü püpü yüshih, tüsho arünü api kheak lungbonü aku ching yurijih, tüsho achih kipde mükhemükimbah thiyia tsoshih. 5Tüsho kheaküshe apinü püpü yüshih, tüsho arünü api laksah; tüsho püpürü ahihkhüh thiyi, khürü shik tüsho khürü laksah. 6Jumonü akheam thsüde apinü muzhokhi atsührü arü kilim yüshihde tha, ‘Arünü I tsührü akin jihbah.’ 7Tüshe thulu-thsürübonü arü bolung thaachih, ‘Ha yamrüplurüp lubuh ah. Arang, isanü api laksahanü tüsho yamrüplurüp isa yo thsübah.’ 8Arünü api bea lubah laksah tüsho kurungasolu aleanglim jipa bah. 9Jumonü kurungasolu putungrünü tümü thsüba? Apinü arübah thulu-thsürübo laksahbah tüsho kurungasolu ju püpürü kilim jihbah. 10Nüsanü amüsühyu ha mükhe de:
‘Thüyam thsürübonü abahyukkhi lung ju
adungtobe amühit-lung kamdo.
11Ha Atungpuhnü arhimokheah,
tüsho isa mükbo ki amüyinsahbe lah’? ”
12Tüsho arünü api rampü rük yim, tümütüsho apinü arü azhihde shihdanglimyu thado de arünü mükheah. Tüshe arünü boto trede alakheah; jumonü arünü api bahjihbah tsoabah.
Ruk Jihkhi dünkheak Keokhikhi
(Mt 22.15-22; Lk 20.20-26)
13Judüki arünü Pharisirü tüsho Herod borü khürü api yu rük rampü anihbuh kilim yüshih. 14Küyimki arübo arükhea, arünü api ki tha, “Thsangyurü, nü a thiyuro tüsho nünü mihtsürü kheyuka müla, tüshe thiyuro ching Thrünpuh limro thsangyuchoh de isanü mükheahlah. Isanü Kaesar kilim ruk jihpü yakzan la shi müla? 15Isanü ajihba shi müjihbea?” Tüshe apinü arü yiuhkhapkhi mükheahde arü ki tha, “Tümüde nüsanü I rükakicho? I kilim adholi 1 lubah arang, tüsho inü ju kheahanü.” 16Jumonü arünü lude arü tüsho apinü arü ki tha, “Ha she miro tüsho mung a?” Arünü alo, “Kaesar ah.” 17Judüki Jisunü arü ki tha, “Küju Kaesar yoanü Kaesar kilim jihang, tüsho küju Thrünpuh yoanü Thrünpuh kilim jihang.” Tüsho arünü api kheah-a müyinsah.
Arhang Kamlodarükhi dünkheak Keokhikhi
(Mt 22.23-33; Lk 20.27-40)
18 #
Yunir 23.8
Judüki arhang kamlokhi müla de athakhi Sadukirü khürü api kilim arü; tüsho arünü api ki keokhi, 19“Thsangyurü, keoniorü khülang tsührü mülade aniube bahjihbah shesho, aniurünü aniube ju lubah akhiung thsungkheak münü lashihbah de Mosanü isa ki thrütkheah. 20Kheakü keoniorü thüne lakheah. Akhuhbuhnü aniube lu; tüsho münü mülade sheabah. 21Mahnepünü alibe ju lu, tüsho api sheabah; apinü she münü muzojih. Tüsho mahsampü she jude alakheah. 22Junangde thünenü alibe ju lu tüsho münü müla. Akheam ching alibe she sheabah. 23Jumonü arhang kamlokhi ching, küyimki arü asürübanü alibe ju shepü niube laba? Tümütüsho arü thüne alalanü alibe ju arü niube thsüpü lukheah.”
24Jisunü arü ki alo tüsho tha, “Jumonü nüsanü amüsühyubo yungsho Thrünpuh wu mümükheahkhi hode lakmih-a lah yung de? 25Tümütüsho küyimki arü ashe chingnü arhang kamlobanü, arünü mürhang yungsho yamkhün müthsü, tüshe arübo yinmi ching yunirübo nangde alabah. 26Tüshe asherü arhang kamlopü dünkheak, nüsanü sangrung aniukhi yu, Mosa hüm ching mükhe de, künangde Thrünpuhnü api ki tha, ‘I Abraham Thrünpuh, Isak Thrünpuh, tüsho Jakob Thrünpuh’? 27Api ju asherü Thrünpuh yung, tüshe arhang larü Thrünpuh ah. Jumonü nüsanü tode lakmihdo.”
Thiyuzüng Atobe
(Mt 22.34-40; Lk 10.25-28)
28Judüki yakzan thsangyurü bolung khülang arü tüsho arü atsangachihkhi so. Jisunü arü ki tsüde alodo de mütsanbah api ki keokhi, “Thiyuzüng alala bolung küpü adungtobe a?” 29Jisunü api ki alo, “Thiyuzüng bolung khide adungtobe ju: ‘Aniang, O Israel, Atungpuh isa Thrünpuh ju lang Atungpuh ah. 30Tüsho nünü Atungpuh nü Thrünpuh nü mulong alalanü, nü me alalanü, nü sulüm alalanü, tüsho nü sühmüh alalanü muzhoang.’ Ha thiyuzüng bolung khide adungtobe ah. 31Mahnepü ju ha lah: ‘Nünü nü yamhingrü ki nihbuh nangde muzhoang.’ Thiyuzüng hane kheaknü atobe püpü müla.” 32Jumonü yakzan thsangyurünü api ki tha, “Tsüde thado, Thsangyurü. Nünü thiyuro asukdo, tümüde Thrünpuh khülang lah, tüsho püpü müla tüshe api lah. 33Tüsho mulong alalanü, anikhitkhi alalanü, me alalanü, tüsho sühmüh alalanü api muzhopü tüsho yamhingrü ki nihbuh nangde muzhopü ju abümnü taka kingaünkhi tüsho laksah-a kingaünkhi kheaknü alübe ah.” 34#Lk 10.25-28Jumonü küyimki apinü tsüde alokhi Jisunü angükhea, apinü anihbuh ki tha, “Nü a Thrünpuh kiulongthsü kheaknü limshude müla.” Tüsho jushu a shenü she api ki keokhipü mümürang.
Messia dünkheak Keokhikhi
(Mt 22.41-46; Lk 20.41-44)
35Küyimki Jisunü arüngyam ching thsangyude alakheanü, apinü keokhi, “Küde thsah yakzan thsangyurübonü Khrista ju David tsührü ah de thacho? 36Tümütüsho Amüsüh Me hode Davidnü tha:
‘Atungpuhnü I Tungpuh ki tha,
“Inü nü riribo nü jing jungpung mükamshihyikia
I khah tsülim binang.”’
37Jumonü Davidnü api Atungpuh de ji, dale küde thsah anihbuh tsührü lapü?” Tüsho boto mihtsürübonü api ki asühde ani.
Yakzan Thsangyurübo dünkheak Atünadopü
(Mt 23.1-36; Lk 20.45-47)
38Judüki apinü thsangyude arü ki tha, “Yakzan thsangyurübo, sherünü amükeam khim yihbah mühide ayüpü, shothsümolo dangpungbo ching asühkhi yu muzhochonü arü dünkheak kümkangang, 39sinagogbo ching atsüdak binkiubo, tüsho atsüdak thünio dangpungbo mükühcho, 40shepünü khimoberü yambo thsümünimcho, tüsho rük thsüde ashangshang tamkhüntamnücho. Arü abahyukkhi ato leangkhibah.”
Khimoberü Kingaün
(Lk 21.1-4)
41Kheakü Jisunü rahpung-yam mikhuh ki bin tüsho mihtsürübonü künangde yukchonü ngü. Tüsho alarü ahihkhühnü hihde yuk. 42Judüki zhochihkhi khimoberü khülang arü tüsho surda 1 dünkhi shonak 2 yukjih. 43Jumonü apinü ajingyanrübo jibah tha, “Atsütsü ha zhochihkhi khimoberünü rahpungyam ching yukrü alala kheaknü alü yukdo de inü nüsa ki thachoh; 44tümüde arü alalanü arü suhdahkhi chingnü yukdo, tüshe alibenü a anihbe zhochihkhi chingnü rhangdung mütrüpü lakhi alala yukdo.”
Currently Selected:
MARK 12: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
