MARK 13
13
Arüngyam Thsümünimpü Thakhi
(Mt 24.1-2; Lk 21.5-6)
1Jisu arüngyam chingnü wukhiukde alachoki api jingyanrü bolung khülangnü tha, “Thsangyurü, küdükhüh amüyinsahbe lungbo tüsho thüyam lanü kheahang!” 2Tüsho Jisunü api ki alo tüsho tha, “Nünü harü thüyam atotobo ngücho shi? Ha dangpung ching lung khülang she maningde akeambah.”
Küpkhuk tüsho Thsümüchibo
(Mt 24.3-14; Lk 21.7-19)
3Kheakü api arüngyam mikhuh Oliv Müzüng kheak binchoki, Peter, Jakob, Johan, tüsho Andria pürünü api ki mükhingde keokhi, 4“Harü küyimki dünjibanü isa ki thaang? Tüsho harü alala dünjipü lachoki amütsan tümü laba?” 5Tüsho Jisunü arü ki alojihde tha, “Shenü she nüsa mümülapyukpü kümkangang. 6Tümüde ahihkhühnü I mung chingnü thade arübah, ‘I api ah,’ tüsho ahihkhüh mülapyukbah. 7Küyimki nüsanü thirithsü düsheakbo sobanü dümüyinsah; tümüde hadürü dünjibah, tüshe akheam marüyi. 8Tümütüsho trükshihnü trükshih azhihde awusubah, tüsho kiulongthsünü kiulongthsü azhihde awusubah. Dangpung dangpung ching muliuyuk züngbah, tüsho khümzung le küpkhukbo labah. Harü ha zübe thsünü atankihbo lah.
9 #
Mt 10.17-20; Lk 12.11,12 “Tüshe nüsa thsungkheaknü kurhangang, tümüde nüsabo kiuthsübinkiu kilim jihbah, tüsho sinagogbo ching nüsa lakbah. Tüsho arü ki thiyumütsan thsüde I dünkheaknü nüsabo yakzanshuhrübo le kiulongthsürübo miki bedarübah. 10Tüsho akhuhde trükshih alala ki thiyusheak-atsü thsangyuthsangrabah. 11Tüshe küyimki arünü nüsa rama jihbanü, akhuhlimnü mulong düsansan, yungsho nüsanü tümü thabaki de dülüm. Tüshe ju kim ching tümüpürü nüsa ki lümkhitshihbanü ju thaang; tümüde athabuh ju nüsa yung, tüshe Amüsüh Me ah. 12Kheakü keoniorünü keoniorü, abuhnü atsührü sheshihpü thsungyukbah; tsührübonü berübuhrü azhihde wusubah tüsho arü sheshihbah. 13#Mt 10.22Tüsho I mung dünkheaknü mihtsürü alalanü nüsa thraneanbah. Tüshe shepünü akheam khiungde arümbanü akhümkhitbah.
Thsümütsü Ato
(Mt 24.15-28; Lk 21.20-24)
14“Tüshe küyimki nüsanü ‘adükheakshihpü athraneanbe’ Daniel wukihrünü athakhi amüzhippung ching zhipde angübanü–akherünü anikhitang–judüki sherü Judea ching lanü müzüngbo ching tsoang. 15#Lk 17.31Tüsho shepü thüyam-mün kheak lanü düyüki yungsho tümükhüh lupü nihbuh yam ching düyüzah. 16Tüsho shepü thulu ching lanü nihbuh khimmih lupü düyülo. 17Tüshe jurü nimungbo ching sherü mübünkeangde la tüsho khungarü niuh duhde alarübo are! 18Tüsho tsüngkam müdünjipü tamkhüntamnüang. 19#Ami 7.14Tümüde jurü nimungbo ching Thrünpuhnü athrünkhi atankih chingnü ha kim khiungde, yungsho küyimkishe mülabe thsümütsü labah. 20Tüsho jurü nimungbo Atungpuhnü mükhikkheamkhülaa, sheshe rhangdung mülapü lakheah; tüshe apinü amokhitrü thsülimnü, apinü nimungbo khikkheam. 21Khürünü nü ki, ‘Kheahang, Khrista ha kheak lah!’ yungsho ‘Kheahang, api ju ching lah!’ de thasho, ju akin düla. 22Tümütüsho arükchih Khristabo tüsho arükchih wukihrübo akhiukbah tüsho kuksho amokhitrü she mülapyukpü amütsanbo tüsho amüyinsahbebo huhbah. 23Tüshe kurhangang; inü amüngühnü alala nüsa ki thado.
Mihtsürü Tsührü Arüpü
(Mt 24.29-31; Lk 21.25-28)
24 #
Ami 6.12
“Tüshe jurü nimungbo ching, thsümütsü dunglim, ani mitingde akambah, tüsho khinunü ayin müjih; 25#Ami 6.13thüning ching chiningbo keamkhibah, tüsho thüning ching lakhi sühmühbo niukbah. 26#Ami 1.7Judüki Mihtsürü Tsührü wu tüsho müretah ato lade amo ching arükhi arünü angübah. 27Judüki apinü nihbuh yunirübo arüshihbah, tüsho alomi akheam chingnü thüning akheam khiungde thrip phüyi chingnü apinü amokhitrübo bemukhungbah.
Khubasodung chingnü Anikhitbe
(Mt 24.32-35; Lk 21.29-33)
28“Kheakü khubasodung chingnü ha shihdanglimyu anikhitang: Küyimki adübit chinde ayü akhiukbanü, muzhu thünindo de nüsanü mükheahchoh. 29Junangde küyimki nüsanü harü dünjikhi ngübanü, khimdopü ki thüninde lah de mükheahang. 30Atsütsü inü nüsa ki thachoh, harü alala müdünjiyikia ha lün hode mutso. 31Thüning tüsho alomi hode atsobah, tüshe I yubo a küyimkishe hode mutso.
Nimung tüsho Kim Shenü Mümükheah
(Mt 24.36-44)
32 #
Mt 24.36
“Tüshe ju nimung tüsho kim Abuh kheak hode, yinmi yunirübo yungsho Atsührü yungsho shenü she mümükheah. 33Kurhangang, aheangang, tüsho tamkhüntamnüang; tümüde kim küyimkianü nüsanü mümükheah. 34#Lk 12.36-38Ha mihtsürü khülangnü api yamlarübo aban ki nihbuh rhimo hahmülang tüsho ripit-neakrü ki thiyukhüm jihde nihbuh yam zojihbah limshu lomi ching hantsah yükhi kiphahlah. 35Jumonü kurhangang, tümütüsho thüyam putungrü ju arelim a shi, tsüngphulung a shi, thunu khungchoki a shi, dashi yapsu arübanü nüsanü mümükheah. 36Jude yungsho zukleangnü arübah apinü nü yapa ngübah. 37Inü tümü nüsa ki thachonü, mihbüm aban ki thachoh: ‘Kurhangang!’ ”
Currently Selected:
MARK 13: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
