MARK 14

Jisu Laksahpü Rük Yimkhi

(Mt 26.1-5; Lk 22.1-2; Jhn 11.45-53)

1Nimung mahne dunglim phungho-thünio tüsho phaüm muyukkhi yikhap thünio lakheah. Tüsho amükeam putungrübo le yakzan thsangyurübonü rük thsüde api rambah asheshihpü yim. 2Tüshe arünü tha, “Thünio kim ching a mürhimo, jude yungsho mihtsürübo arhunganimbah.”

Bethani ching Müdangke Mujukhi

(Mt 26.6-13; Jhn 12.1-8)

3 # Lk 7.37,38 Tüsho Bethani ching aphamrü Simon yam ching lachoki, aliberü khülangnü lung-langpung chingnü amo-achak rhümthünea müdangke lubah arü, tüsho api dükhüm ki binde alachoki aku kheak dungkihjih. 4Tüshe khürünü arü bolung bukakhiukde tha, “Tümüde ha rhümthünea müdangke phinphurukkhea? 5Tümütüsho ha shotoyinchi 300 akumung dün yinbah zhochihrü kilim jihpü lado.” Tüsho arünü anihbe thsokihde müneah. 6Tüshe Jisunü tha, “Alibe langzü zojang. Tümüde nüsanü alibe küpkhuk jihcho? Alibenü I thsungkheak rhimo atsü rhimodo. 7Tümütüsho nüsa lung zhochihrü a kamruhroro labah, tüsho küyimki nüsanü alümbanü arü ki atsü rhimopü kuklah; tüshe I a nüsa lung kamruhroro lapü yung. 8Alibenü tümü kuklanü anihbenü rhimodo. Alibenü I mi bahpü thsungkheak müdangkenü I pang mujupü amüngühnü arüdo. 9Atsütsü inü nüsa ki thachoh, alomiküp kürü ching ha thiyusheak-atsü thsangyuthsangrabanü, ha liberünü arhimokhi she anihbe lümkhitde athabah.”

Judanü Jisu Yinatsühpü Alokhikhi

(Mt 26.14-16; Lk 22.3-6)

10Judüki thürükheak mahne bolung khülang, Juda Iskariotnü arü ki api yinatsühpü amükeam putungrübo kilim yü. 11Jumonü küyimki arünü ju sokheanü arübo asüh, tüsho api kilim sho jihpü alokhi. Jumonü apinü anihbuh rama jihpü kim atsü yim.

Phungho-thünio Yimtsühkhi

(Mt 26.17-25; Lk 22.7-14,21-23; Jhn 13.21-30)

12Kheakü phaüm muyukkhi akhuhbe nimung, arünü phunghothünio namfimihnunu laksahchoki, ajingyanrübonü api ki tha, “Nü phungho-thünio yimtsühpü thsüde nünü isa kükheak yübah thsakhamshihnela?” 13Jumonü apinü jingyanrü mahne thiyia yüshihde tha, “Kiuto ching yüzahang, tüsho mihtsürü khülang ke phüh hanbah ashorubah; api yande yüang. 14Tüsho api küching yüzahbanü, thüyam putungrü ki thaang, ‘Thsangyurünü thachoh, “Inü I jingyanrübo lung phunghothünio yimtsühpü thsüde hanrü khiungshak küching la?”’ 15Judüki apinü nüke ki alungbe khiungshak binpungbo thsakhamkhi huhbah; ju ching isa thsungkheak thsakhamang.” 16Api jingyanrübonü wukhiuk tüsho kiuto ching arü, tüsho apinü ane ki thakhi nangde ju ngü; tüsho arünü phungho-thünio thsakham.

17Arelim thürükheak mahne lung api arü. 18Arü binbah yimtsühde alachoki, Jisunü tha, “Atsütsü inü nüsa ki thachoh, I lung yimtsühkhi nüsa khülangnü I yinatsühbah.” 19Arünü mulong rozhakpü tankih, tüsho arü abannü api ki tha, “Ju I a shi?” Tüsho püpürünü tha, “Ju I a shi?” 20Judüki apinü arü ki alo, “Ha I lung phuru ching khah amayukkhi thürükheak mahne bolung khülang ah. 21Mihtsürü Tsührü a api dünkheak thrütkhi nangde yüchoh, tüshe mihtsürü shepünü Mihtsürü Tsührü yinatsühchonü ayokhe! Ju mihtsürü thsungkheak müzübejungkhi atsübe lado.”

Atungpuh Thünio

(Mt 26.26-30; Lk 22.14-20; 1 Kor 11.23-25)

22Arü yimtsühde alachoki, Jisunü yikhap lubah makshe jih tüsho yihnakbah arü kilim jihde tha, “Ha lua tsühang; ha I pang ah.” 23Jushu apinü pung lu, tüsho küyimki apinü makshe jihbah arü kilim jihkheanü arü alalanü ju chingnü yung. 24Tüsho apinü arü ki tha, “Ha ahihkhüh dünkheak thiyih bukkhi tangzüng aso I thiyih ah. 25Atsütsü inü nüsa ki thachoh, inü Thrünpuh kiulongthsü ching aso muyungyi khiungde kheaküa inü ha muyunglo.” 26Tüsho küyimki arünü khün thsükheanü Oliv Müzüng ching yü.

Peternü Malokhipü Müchitkhi

(Mt 26.31-35; Lk 22.31-34; Jhn 13.36-38)

27Judüki Jisunü arü ki tha, “Nüsa alalanü I bahbah alihde atsobah, tümüde ha thrüta lah: ‘Inü namfimihnu neakrü shikbah, tüsho namfimihnubo hiumüzütbah.’ 28#Mt 28.16Tüshe I arhang kamlo dunglim, I nüsa müngüh Galilee ching yübah.” 29Tüshe Peternü api ki alo, “Alala tsotso she inü a jude müthsü.” 30Tüsho Jisunü api ki tha, “Atsütsü khihni inü nü ki thachoh, khihre thununü mahne ki mukhungyide, nünü I mahsam ki malokhide alabah.” 31Tüsho Peternü müküpde alo, “I nü lung shebah, inü nü malokhidüa müla!” Tüsho arü alalanü junangde tha.

Jisunü Gethsemane ching Tamkhüntamnükhi

(Mt 26.36-46; Lk 22.39-46)

32Judüki arünü Gethsemane de ajikhi dangpung ching arü; tüsho apinü ajingyanrübo ki tha, “I tamkhüntamnüchoki ha kheak bincholang.” 33Tüsho apinü anihbuh lung Peter, Jakob, tüsho Johan bea lu tüsho küpkhukpü tüsho sükde lümthsünüpü tankih. 34Judüki apinü arü ki tha, “I ashepü thsüde khide mulong rozhaklah. Ha kheak bincholang tüsho kurhangang.” 35Apinü anükhüh limshude yübah alo kheak khukning, tüsho kuka lasho ha kim api kheaknü akhinshang de tamkhüntamnü. 36Tüsho apinü tha, “Abuh, Abuh, nü thsungkheaknü alala akukbe lah. I kheaknü ha pung luakhinjang; judüalalashe, I lümkhi yung, tüshe nü lümkhi ah.” 37Jushu api arü tüsho arübo yapa ngü, tüsho Peter ki tha, “Simon, nü yapla de? Nüsanü kimkhü 1 she mukurhangkhuk de? 38Nüsa rükaki ching müyüzahpü thsüde kurhangang tüsho tamkhüntamnüang. Menü a künlah, tüshe shih ching sühmüzah.” 39Kheaküshe apinü yübah tamkhüntamnü. 40Tüsho küyimki api alode arükhea, apinü arübo kheaküshe yapa ngü, tümüde arü mük mürheakkhuk; tüsho arünü api ki tümü alobanü mümükheah. 41Judüki apinü mahsam kipü arü tüsho arübo ki tha, “Nüsa kheakü khiungde yapla de tüsho sühakhimla de? Ha suhdo! Kim arüdo; kheahang, Mihtsürü Tsührü aneakrübo khah ching jihdo. 42Asürang, isanü yüanü. Kheahang, I yinatsührü ha kheak arüchoh.”

Jisu Ramkhi

(Mt 26.47-56; Lk 22.47-53; Jhn 18.3-12)

43Tüsho zukleangnü, api thiyu thade alachoki, thürükheak mahne bolung Judanü boto ato lung nukshangbo le shinukbo shuhbah amükeam putungrü tüsho yakzan thsangyurübo le azothsürübo kilimnü arü. 44Kheakü api yinatsühbuhnü arü kilim amütsan khülang jihde tha, “Shepü inü müthsüpbanü api ah; api ramang tüsho aheangde bebah tsoang.” 45Tüsho api arü müleangnü, apinü nahde wutubah api ki tha, “Thsangyurü, Thsangyurü!” tüsho api müthsüp. 46Judüki arünü api tholo tüsho ram. 47Tüsho ju kheak zhiprü khülangnü api nukshang dukkhitbah achangbe amükeambuh yamlarü nuku thsüpkhijih. 48Judüki Jisunü arü ki tha, “Nüsabo jangkhijangrarü khülang azhihkhi nangde nukshangbo le shinukbo shuhbah I rampü arükhea de? 49#Lk 19.47; 21.37I nüsa lung arüngyam ching thsangyude alakheah, tüsho nüsanü I müram. Tüshe amüsühyubo ju adünjibe ah.” 50Judüki jingyanrübo alalanü api bahbah hiumüzütde tso.

51Athrününgtsüng mihtsürü khülang khimthünak lang yihbah Jisu dunglim yande alakheah. Arünü api rampü mürang, 52tüshe apinü akhim ju dunglim bahbah bünkeang alihde tso.

Jisu Kiuthsü-binkiu Miki

(Mt 26.57-68; Lk 22.54-55,63-71; Jhn 18.13-14,19-24)

53Arünü Jisu ju achangbe amükeambuh ki bede yü; tüsho ju ching amükeam putungrübo, azothsürü, tüsho yakzan thsangyurü alala lakheah. 54Tüshe Peternü limshu chingnü api dunglim yande achangbe amükeambuh yam limkhuh khiungde yü. Tüsho api ju aheangrü bolung mo thüyüpde bin. 55Tüsho amükeam putungrübo le kiuthsübinkiu alalanü Jisu azhihde api sheshihpü yim, tüshe tümü müyimkhit. 56Tümüde ahihkhühnü api azhihde thiyumütsanbo jih, tüshe arü thiyumütsanbonü maye. 57Tüsho khürünü zhipbah api azhihde thiyumütsan jihde tha, 58#Jhn 2.19“Isanü apinü athakhi sodo, ‘Khahnü athsükhi ha arüngyam inü athsümünimbah, tüsho khahnü amüthsükhi püpü nimung mahsam dükeaknü athsübah.’” 59Tüshe arü thiyumütsan jihkhinü she maye. 60Tüsho achangbe amükeambuhnü mikhuh ching zhipbah Jisu ki keokhi, “Nünü tümü maloba de? Mihtsürübonü nü azhihde thiyumütsan jihkhi ha tümü a?” 61Tüshe apinü malan tüsho tümü malo. Kheaküshe achangbe amükeambuhnü api ki keokhi, “Nü a Müngühmühibuh Tsührü, Khrista a de?” 62Tüsho Jisunü alo, “I ah. Tüsho nünü Mihtsürü Tsührü Wuto khah tsülim binde tüsho thüning kheak amo ching arükhi ngübah.” 63Judüki achangbe amükeambuhnü api khimbo thorüp tüsho tha, “Isanü thiyumütsan püpü tümü yihnüpü la? 64Mükhemürangde athakhi nüsanü sodo! Nüsanü tümü lümcho?” Tüsho arü alalanü api ashepü thülünlah de bahyuk. 65Judüki khürünü api kheak mukhiukkihpü, amük rümpü, api kingpü, adampü tüsho api ki “müchitang” de athapü tankih. Tüsho aheangrübonü thoa lubah lak.

Peternü Jisu Malokhikhi

(Mt 26.69-75; Lk 22.56-62; Jhn 18.15-18,25-27)

66Kheakü Peter ju khikzhakpung abolim binde alachoki, achangbe amükeambuh yamlaberü khülang arü. 67Tüsho küyimki alibenü Peter mo thüyüpkhi ngükhea, anihbenü api kheak kheahbah tha, “Nü she Nazarethrü Jisu lung lakheah.” 68Tüshe apinü reanglode tha, “Nünü tümü thachonü inü mümükheah yungsho manikhit.” Apinü mükü ching wukhiuk tüsho thununü khung. 69Tüsho yamlarü anünübenü kheaküshe api ki tha, tüsho ju ki zhiprü ki thapü tankih, “Ha arü bolung khülang ah.” 70Tüshe apinü ju she reanglo. Tüsho anükhüh dunglim ju ki zhiprünü Peter ki thalo, “Tsükjide nü a arü bolung khülang ah; tümüde nü Galileerü ah tüsho nü yu thakhinü ju huhchoh.” 71Tüshe apinü athruajipü tüsho thiyuchihchimpü tankih, “Nünü athakhi mihtsürü inü mümükheah!” 72Mahne kipü thununü khung. Tüsho Jisunü api ki thakhi yu lümkhit, “Thununü mahne ki mukhungyide nünü I mahsam ki malokhide alabah.” Tüsho küyimki ha dünkheak lümkhea, apinü trip.

Currently Selected:

MARK 14: YIMCBSI

Highlight

Copy