MARK 3
3
Khah Thripshekhi Mihtsürü
(Mt 12.9-14; Lk 6.6-11)
1Apinü sinagog ching yüzahlo, tüsho ju ching khah thripshe thsükhi mihtsürü khülang lakheah. 2Tüsho arünü api amülim jihpü thsüde apinü Amuni anihbuh thsünguba shi yungnü api kheahmüripde alakheah. 3Judüki apinü khah thripshe thsükhi mihtsürü ki tha, “Mikhuhlim arang.” 4Tüsho apinü arü ki tha, “Amuni atsü rhimobe yakzan la shi amütsü rhimobea, yungsho rhangdung khümkhitbea shi dashi alaksahbea?” Tüshe arünü malande la. 5Jumonü küyimki apinü arü mulong müküpkhinü mulong mütsüde arü kheak bukakhiukde mükamde akheahkhea, apinü mihtsürü ki ju tha, “Nü khah chungang.” Apinü chung, tüsho api khah ju püpü thrip nangde tsüabah. 6Judüki Pharisirübonü wukhiuk tüsho Herod jingyanrübo bebah küde thsübah api laksahbanü api azhihde rük yim.
Jisu Dunglim Boto
7Tüshe Jisunü api lung jingyanrübo bebah keto lim yü, tüsho Galilee chingnü yimto ato khülangnü api dunglim yan. 8Küyimki arünü apinü arhimokhi sokheanü, Judea, Jirusalem, Idumea, Jordan hobah kewungbo tüsho Tair le Sidon chingnü mihtsürübo api kilim arü. 9#Mk 4.1; Lk 5.1-3Tüsho yimto ato lakhi hode api muyurishihpü sangkung anikhüh khülang api khilim thsakhama zopü apinü ajingyanrübo ki tha. 10Tümütüsho apinü ahihkhüh thsüngu, junangde tukthsü larübonü api qiupü mikhuhlim nimde arü. 11Tüsho amünean mebonü api ngüchoki, api miki mükhüm tüsho zhide tha, “Nü a Thrünpuh tsührü ah.” 12Tüshe api sheanü dümükheahshih de arü ki müküpde thiyukhüm jih.
Jingyanrü Thürükheak Mahne Mokhitkhi
(Mt 10.1-4; Lk 6.12-16)
13Tüsho apinü müzüng kheak yükihbah apinü amulongrübo anihbuh kilim ji. Tüsho arünü api kilim arü. 14Judüki apinü amüsüh-thsangyurübo de jide arü thürükheak mahne mokhit, junangde arübo api lung labah tüsho arübo thsangyuthsangrapü thiyia yüshihpü, 15tüsho tukthsü thsüngupü tüsho amünean mebo yankhitpü thiyukhüm-sühmüh lapü lakheah: 16apinü Peter de ajikhi Simon; 17Zebedee tsührü Jakob tüsho aniurü Johan (apinü arü ki Tsüngmuk tsührübo dükhi amütsan Boanerges de ji); 18Andria, Philip, Bartholoma, Mathi, Thoma, Alphia tsührü Jakob, Thadia, Kananrü Simon 19tüsho api yinatsühbuh Juda Iskariot.
Jisu tüsho Beelzebub
(Mt 12.22-32; Lk 11.14-23; 12.10)
20Judüki Jisunü thüyam ching yüzah, tüsho kheaküshe yimto atonü mükamlode arü, junangde api le ajingyanrübo yimtsühpü she mütsüde alakheah. 21Tüshe küyimki api betsührübonü ha dünkheak sokhea, arünü api tholopü wukhiuk, tümüde arünü tha, “Api yingyinga lah.” 22#Mt 9.34; 10.25Tüsho Jirusalem chingnü akikhi athrütrübonü tha, “Api Beelzebub lah, tüsho amünean mebo yakzanshuhbuhnü amünean mebo yankhitchoh.” 23Jumonü apinü arübo anihbuh kilim ji tüsho shihdanglimyu chingnü arü ki tha: “Arimrinü küde thsah Arimri yankhitpü? 24Kiulongthsü khülangnü ju azhihde chamnaksho, ju kiulongthsü müzhipkhuk. 25Yamkhün khülangnü ju azhihde chamnaksho, ju yamkhün müzhipkhuk. 26Tüsho Arimrinü nihbuh azhihde wususho tüsho chamnaksho, apinü müzhipkhuk, tüshe api akheam arüa lah. 27Sühmüh lakhi mihtsürü ju akhuhde rhükjungbah thüyam yankhia mulusho, shenü she sühmüh lakhi mihtsürü yam ching yüzahbah api kukruk mulukhuk.
28“Atsütsü inü nüsa ki thachoh, mihtsürü tsührübo kilim neak alala tüsho arünü tümüpürü mükhemürangyu thabanü abahjihbah; 29#Lk 12.10tüshe shepünü Amüsüh Me azhihde mükhemürangyu thabanü küyimkishe neak mübahjih; tümütüsho apinü akheam mülakhi neak yihbeakdo.”– 30Tümütüsho arünü tha, “Api amünean me lah.”
Jisu Abe tüsho Keoniorübo
(Mt 12.46-50; Lk 8.19-21)
31Judüki abe le akeoniorü arü wungdo zhipbah api jipü khürü yüshih. 32Yimto ato api mükamde bina lakheah; tüsho arünü api ki tha, “Kheahang, nü be le nü keoniorübo wungdo ching nü yimchoh.” 33Tüshe apinü arü ki alo, “I be tüsho I keoniorü ju she a?” 34Tüsho apinü anihbuh mükamdoa binrübo kheak mühide kheah tüsho tha, “Ha ching I be tüsho I keoniorübo lah! 35Tümütüsho shepünü Thrünpuh lümkhi rhimochonü I khiung, I chi tüsho I be ah.”
Currently Selected:
MARK 3: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
