MARK 4
4
Müjih-hiurü Shihdanglimyu
(Mt 13.1-9; Lk 8.4-8)
1 #
Lk 5.1-3
Kheaküshe apinü keto yeannü thsangyupü tankih. Tüsho yimto ato api ki mukhung, jumonü apinü sangkung ching yüzah tüsho keto kheak ju ching bin; tüsho yimto athrünkhi keto lim abinde alo kheak lakheah. 2Judüki apinü shihdanglimyu chingnü ahihkhüh arü ki thsangyude tha: 3“Aniang! Thuluthsürü khülang nihbuh müjih hiupü yü. 4Tüsho apinü müjih hiuchoki khürü limmungyean hiuyuk; tüsho wuhnubo arübah; ju tsühabah. 5Khürü alo abüde alapung lungmi kheak hiukih; tüsho alo sükde mülakhinü nahde mukhuhde asürü. 6Tüshe küyimki ani akhiukkhea, ju phu, tüsho aying mülakhi hode yiuhabah. 7Tüsho müjih khürü ayangrungbo ching hiuyuk; ayangrungbo asürübah ju khüpdoabah, tüsho hi tümü maso. 8Tüsho püpü ju alo atsü kheak hiuyuk tüsho hi mukhuhde asürübah khürünü samrü bande, khürünü rukrü bande, tüsho khürünü chi bande alü asojih.” 9Apinü arü ki tha, “Nüsa asopü nükhün kihlasho aniang!”
Shihdanglimyubo Amütsan
(Mt 13.10-17; Lk 8.9-10)
10Tüshe küyimki api alangzü lakhea, thürükheak mahne lung api mükamde alarübonü shihdanglimyubo dünkheak api ki keokhi. 11Tüsho apinü arü ki alo, “Nüsa kilim a Thrünpuh kiulongthsü aramyu mükheahpü jih-a lah; tüshe aleangkheak larü kilim a alala shihdanglimyubo chingnü ah, 12junangde ‘arünü kheahkheah she mükheahkhit, arünü anini she muso tüsho manikhit; jude yungkhülaa arünü arholobah tüsho neak bahjihbah!’ ”
Müjih-hiurü Shihdanglimyu Thanakkhi
(Mt 13.18-23; Lk 8.11-15)
13Tüsho apinü arü ki tha, “Nüsanü shihdanglimyu ha manikhit de? Judüasho nüsanü küde thsah shihdanglimyubo alala anikhitpü? 14Müjih-hiurünü thiyu ju hiuchoh. 15Tüsho limro mungyean thiyu hiua larübo ju harü ah; küyimki arünü anibanü judüakede arimri arübah arü mulongbo ching hiua lakhi yu lude tsochoh. 16Lungmi kheak müjih hiua larübo she küyimki arünü thiyu sobanü nahdü lang asühde leangkhichoh; 17tüsho arü kheak aying mülakhinü anükhüh kheak lang lachoh. Ju dunglim küyimki thiyu hode thsümütsü-ato yungsho thsümüchi akhiukbanü, nahdü lang arü ayokhichoh. 18Kheakü khürü ayangrungbo ching hiukhibo lah; arünü thiyu anichoh, 19tüsho ha lomi mulong sansan, lakhitbo muzhokhi, tüsho püpü yihnelunekhinü thiyu ju khüpsahshihchoh, tüsho ju aso masokhi kamchoh. 20Tüshe alo atsü kheak hiukhi ju, arünü thiyu sobah leangkhichoh, tüsho khürünü samrü bande, khürünü rukrü bande, tüsho khürünü chi bande asochoh.”
Muluk khüp Tsünpung
(Lk 8.16-18)
21 #
Mt 5.15; Lk 11.33 Tüsho apinü arü ki tha, “Tsün khülang ju muluk khüp yungsho yapkiu khüp zopü lude arücho de? Ju adubopung kheak zopü yung de? 22#Mt 10.26; Lk 12.2Tümütüsho amikheak makhiukpü thsüde tümü müyima müla, yungsho tümüpürü yihdoa lanü alahkhitbah. 23Nüsa nükhün kihlasho aniang!” 24#Mt 7.2; Lk 6.38Tüsho apinü arü ki tha, “Nüsanü tümü sochonü mulong jihang, Nüsanü adünkhi yande, nüsa kilim adüna jihbah; tüsho nüsa sherünü anichonü, alü she ajihbah. 25#Mt 13.12; 25.29; Lk 19.26Tümütüsho shepü lanü, api kilim alü jihbah; tüshe shepü mülanü, api lakhi she anihbuh kheaknü lude atsobah.”
Müjih Mukhuhkhi Shihdanglimyu
26Tüsho apinü tha, “Thrünpuh kiulongthsü ju mihtsürü khülangnü alo kheak müjih hiukhi kiphahlah. 27Apinü azhing ching yapchoh tüsho animung asürüchoh tüsho müjih ju mukhuhbah tochoh, tüshe ju küdeanü apinü mümükheah. 28Alonü aküdah thsüde hi akhiukshihbah asochoh–akhuhde adung, jushu amüchekhi, tüsho aye akhiukchoh. 29Tüshe küyimki hi münbanü, apinü hirhüpbenü arhüppü tankihchoh, tümütüsho yimlupü kim khiungdo.”
Woninji Shihdanglimyu
(Mt 13.31-32,34; Lk 13.18-19)
30Tüsho apinü tha, “Isanü Thrünpuh kiulongthsü ju tümünü akeba, yungsho ju thanakpü shihdanglimyu tümü laba? 31Ha nünü müjih aninibe alo ching hiukhi woninji khülang kiphahlah; 32tüshe küyimki ju hiubanü, asürüchoh tüsho sangrung alala kheaknü atobe kamchoh, tüsho akhahbo dübeakde yüchoh, junangde thüning wuhnubonü ju khüp asap shuchoh.”
33Ha ruk shihdanglimyu ahihdo hode arünü anikhitkhi thülün Jisunü arü ki thiyu tha. 34Tüshe shihdanglimyu mübedüa apinü arü ki mütha. Tüsho küyimki arü mükhingde lakhea, apinü ajingyanrübo ki alala thanaka huh.
Jisunü Chinthrüm Keamloshihkhi
(Mt 8.23-27; Lk 8.22-25)
35Ju nimung, arelim apinü arü ki tha, “Isanü püpü thrip hode yüanü.” 36Arünü yimto ju zojihbah Jisu binde alakhi sangkung ching yüzah tüsho api ju arü lung bebah yü. Tüshe api lung sangkung püpü she alakheah. 37Tüsho chinthrüm ato khülang arübah sangkung ching ke abükyukde yüzah, junangde ju mide alakheah. 38Tüshe api a yamkiung lim aku mükhambah yapa lakheah. Arünü api yihmusu tüsho tha, “Thsangyurü, isa dükheakpü nünü tümü mülüm de?” 39Judüki api asürü tüsho apung ki thürüh, tüsho keto ki tha, “Keamloang, zhikde laang!” Apung ju kheamabah tüsho akhimahe ato lakheah. 40Tüshe apinü arü ki tha, “Tümüde nüsa khide trecho le? Kheakü khiungde nüsa akin müla de?” 41Arünü khide tre tüsho khülangnü khülang ki thaachih, “Apung le ketonü she api yu anipü thsüde ha tümü mihtsürü a?”
Currently Selected:
MARK 4: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
