MARK 5
5
Amünean Me Lakhi Mihtsürü Thsüngukhi
(Mt 8.28-34; Lk 8.26-39)
1Judüki arünü keto thripkhüh lim, Gadara lomi ching arü. 2Tüsho küyimki api sangkung chingnü akhiukkheanü, zukleangnü amünean me yüzahkhi mihtsürü khülangnü mibahpung chingnü api shoru, 3api ju kiuyuk bolung lakheah; tüsho shenü she api ju wuhrünliunü she mürhükkhuk, 4tümütüsho api khah tüsho jing rhükkheah, tüshe apinü wuhrünliu ju yihshak tüsho ajing kheaknü yinchibo yihshak. Sheshe api danyukpü sühmüh mülade alakheah. 5Azhing tüsho ayin, api ju müzüngbo le mibahpungbo ching zhide tüsho lungbonü aküdah thsüde tsütde alakheah. 6Tüshe küyimki apinü limshu chingnü Jisu ngükhea, apinü alihde yü tüsho api ki khukning. 7Khide Achang Thrünpuh tsührü Jisu, inü nü ki tümü thsüba? I düthsümüchi de Thrünpuh mung tamde inü nü ki thachoh. 8Tümüde apinü anihbuh ki tha, “Amünean me, mihtsürü kheaknü akhiukang!” 9Judüki apinü anihbuh ki keokhi, “Nü mung she a?” Tüsho apinü alo, “I mung Boto ah; tümüde isa ahihkhüh ah.” 10Tüsho lomi chingnü apinü yankhita mübahpü anihbuhnü api ki mushu. 11Kheakü müzüngbo thüninde kheaknu boto ato khülang motsühmoyungde alakheah. 12Tüsho amünean mebo alalanü api ki mushude tha, “Kheaknubo kilim isa yübah jurü ching yüzahshang.” 13Jumonü apinü arü ki mülüjih. Amünean mebonü akhiukbah kheaknu boto ching yüzah, tüsho kheaknu 2000 bande lungrhün ching nanachihde keto lim yüki tüsho ke ching thüraksah.
14Kheaknu neakrübonü alihde yübah kiuto tüsho lomi ching tha. Tüsho arünü ju dünjikhi kheahpü wukhiuk. 15Küyimki arü Jisu kilim arükhea, amünean mebo yüzahkhi mihtsürü thsü khim phuyubah lümkhi atsü kama binde ngü; tüsho arübonü tre. 16Tüsho sherünü angükheanü, amünean me yüzahbuh kheak dünjikhi, tüsho kheaknubo dünkheak arü ki thaa huh. 17Judüki arünü arü lomi chingnü chamachihde atsopü api ki mushupü tankih. 18Tüsho küyimki api sangkung ching yüzahkhea, amünean me yüzahbuhnü api lung yüpü anihbuh ki mushu. 19Jisunü api yanlo, tüshe api ki tha, “Nü müyamrübo kilim thüyam lim yüang, tüsho Atungpuhnü nü thsungkheak ato rhimokhi tüsho apinü nü ki muzhokhi dünkheak arü ki thaa huhang.” 20Apinü chamachih tüsho Jisunü api thsungkheak rhimokhi alala Dekapoli ching zhiyukpü tankih; tüsho alalanü müyinsah.
Jairus Tsührübe tüsho Aliberü Arhang Kamloshihkhi
(Mt 9.18-26; Lk 8.40-56)
21Küyimki Jisu ju sangkung chingnü püpü thrip hode ayükhea, yimto ato khülang api ki mukhungde arü; tüsho api keto ki lakheah. 22Tüsho kheahang, sinagog yakzanshuhrü bolung khülang amung Jairus arü. Tüsho küyimki anihbuhnü api ngükhea, apinü ajing ki mükhüm 23tüsho api ki mushude tha, “I tsührü akheambe ashepü thsüde lah. Arübah anihbe kheak nü khahnü qiujang, junangde anihbe angubah tüsho rhangdung labah.” 24Jumonü Jisunü api lung yü tüsho yimto atonü api dunglim arü tüsho anihbuh mükamdo.
25Kheakü aliberü khülang kam thürükheak mahne thiyih müyande alakheah, 26tüsho anihbe küpkhuk ato lude thümürü kilim lakhit phinphurukde kheahshihshih she angupü dün amütsübe lang kam. 27Küyimki alibenü Jisu dünkheak sokhea, anihbenü boto ching api dunglim arü tüsho api khim qiu; 28tümüde alibenü lüm, “Inü api khim lang she qiusho, I angubah.” 29Zukleangnü alibe thiyih müyankhi tukloabah, tüsho alibenü anihbe pang ching thsünü ngukhi mükheah. 30Tüsho api kheaknü wu wukhiukkhi Jisunü nahde mükheahbah boto ching rholo tüsho tha, “Shenü I khim qiukhea?” 31Tüshe ajingyanrübonü api ki tha, “Yimto atonü nü mükamdokhi nünü ngülah, tüsho nünü thachoh, ‘Shenü I qiukhea?’ ” 32Tüsho shepünü ha rhimokheanü apinü mükamde kheah. 33Tüshe alibenü trede tüsho ajande, anihbe kheak dünjikhi mükheahde arü tüsho api ki mükhümde api ki thiyuro alala tha. 34Tüsho apinü alibe ki tha, “I tsah-a, nü yo akinnü nü thsüngudo. Akhimahede tsoang, tüsho nü tukthsü nguabahang.”
35Api thiyu thade alachoki, sinagog yakzanshuhbuh yam chingnü khürü arübah tha, “Nü tsührübe shea lah. Tümü thsüpü thsangyurü küpkhuk jihpü?” 36Jisunü thiyu soakede sinagog yakzanshuhbuh ki tha, “Dütre; akin lang laang.” 37Tüsho apinü Peter, Jakob, tüsho Jakob niurü Johan kheak hode api dunglim yüpü sheshe mümülü. 38Jushu apinü sinagog yakzanshuhbuh yam ching arü, tüsho arhunganimde achangnü tüzhode mitripkhi ngü. 39Küyimki api yükheanü, apinü arü ki tha, “Tümü thsükhi ha arhunganimkhi tüsho atripkhi la? Azürü ju müshe, tüshe ayapkhi lang ah.” 40Arünü api mükhemükimde münejih. Tüshe küyimki apinü arü wukhiukshihkhea, azürü abuh le abe, tüsho ane lung lakhi bea lubah azürü yappung ching yüzah. 41Judüki apinü azürü ju akhahnü shuh-a lubah anihbe ki tha, “Talitha, kumi,” amütsan, “Azübe, inü nü ki thachoh, asürang.” 42Zukleangnü alibenü asürü tüsho tsah, tümüde anihbe kam 12 lakheah. Tüsho arübo müyinsah. 43Tüshe shenü she ju mümükheahshihpü arü ki müküpde thiyukhüm jih, tüsho alibe kilim atsühpü tümükhüh jihpü tha.
Currently Selected:
MARK 5: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
