MARK 6
6
Nazareth ching Jisu Bahyukkhi
(Mt 13.53-58; Lk 4.16-30)
1Judüki apinü ju chingnü wukhiuk tüsho nihbuh lomi ching arü, tüsho ajingyanrübonü api dunglim yan. 2Tüsho küyimki Amuni arükhea, apinü sinagog ching thsangyupü tankih. Tüsho ahihkhühnü api yu sobah müyinsah, “Ha mihtsürünü hadürü tümü chingnü angükhea? Tüsho apinü hadürü khinthiyinbe rhimopü thsüde api kilim lümlung jihkhi ha tümü a? 3Ha Mari tsührü, tüsho Jakob, Josep, Juda, tüsho Simon pürü akhiung sangrhimosorü yung de? Tüsho api niurü aliberübo ha ching isa lung lah.” Tüsho arünü api bahyuk.
4 #
Jhn 4.44
Tüshe Jisunü arü ki tha, “Wukihrü khülang ju nihbuh lomi, betsührü, tüsho yamkhün ching lang düna alala ching wüntre jihchoh.” 5Apinü ju ching tukthsü mihtsürü anükhüh kheak akhahnü qiude thsüngukhi kheak hode rhimo ato mürhimokhuk. 6Arü mükinkhi dünkheak apinü müyinsah. Jushu apinü kiulongbo ching thsangyude mükamde yü.
Jisunü Jingyanrübo Thiyikhi
(Mt 10.5-15; Lk 9.1-6)
7Apinü thürükheak mahne ju anihbuh kilim ji, tüsho mahnenenü thiyia yüshihpü tankih, tüsho amünean mebo kurungkheak arü kilim wu jih, 8tüsho arü ki thiyukhüm jih, “Nüsa hantsahchoki tso khülang kheak hode yikhap, qiuqiu, shoyukpung ching sho tümü dühan, 9jingkhümpübo khümang, tüshe pangkhümpü alü dühan.” 10Kheaküshe apinü arü ki tha, “Kürü dangpung ching nüsa thüyam ching yüzahbanü, nüsa müchamachihyikia ju ching binang. 11#Yunir 13.51#Lk 10.4-11Tüsho sherünü nüsa müleangkhiba yungsho nüsa ki maniba, nüsa ju chingnü chamachihchoki arü azhihkhi thiyumütsan thsüde nüsa jing kheaknü asungthulung adankhia bahang.” 12Jumonü arünü wukhiuk tüsho mihtsürübonü mulong müthripü thsangyuthsangra. 13#Ja 5.14Arünü amünean mebo ahihkhüh yankhit, tüsho tukthsürü ahihkhüh müdangke mujujihde thsüngujih.
Johan Baptijihbuh Shekhi
(Mt 14.1-12; Lk 9.7-9)
14 #
Mt 16.14; Mk 8.28; Lk 9.19 Kheakü kiulongthsüpuh Herodnü api dünkheak so, tümüde api mung thude kam. Tüsho apinü tha, “Johan Baptijihbuh ashe chingnü arhang kamloa lah, tüsho harü wubonü api kheak rhimochoh.” 15Khürünü tha, “Ha Elija ah.” Tüsho püpürünü tha, “Ha wukihrü, yungsho khakhih wukihrü khülang nangde lah.” 16Tüshe küyimki Herodnü asokhea, apinü tha, “Ha inü aku lipshakkhi Johan ashe chingnü arhang kamloa lah!” 17#Lk 3.19,20Tümüde Herodnü thiyia yüshihbah Johan ram tüsho rhükbah aniurü Philip niube Herodia dünkheaknü rihyam ching zo; tümüde apinü anihbe lu. 18Tümütüsho Johannü Herod ki, “Nünü nü niurü niube lupü yakzan müla” de tha. 19Jumonü Herodianü api azhih tüsho api laksahpü kün, tüshe alibenü müthsükhuk; 20tümütüsho Herodnü api thiyuro tüsho amüsüh mihtsürü thsükhinü Johan tre, tüsho api kümdo. Kim aban api dünkheak sobah khide phümüsüpa lalashe apinü anihbuh ki anipü kün. 21Judüki Herodnü api zübe thünio ching api yo achangbe atorübo, bonungrü wühkenorübo tüsho Galilee ching adungto mihtsürübo jiyukkhi nimung arü. 22Tüsho küyimki Herodia tsührübenü azah tsünbah Herod le api hanrübo asühshihkhea, kiulongthsüpuhnü anünübe ki tha, “Nünü tümü künlanü I ki kheangang, tüsho inü nü kilim ju jihanü.” 23Apinü alibe ki ha she thiyuchihchim, “Nünü I ki tümüpürü kheangbanü, inü I kiulongthsü thripkhüh thsüa lalashe nü kilim jihbah.”
24Jumonü alibenü wukhiuk tüsho abe ki tha, “Inü tümü kheangba?” Tüsho alibenü tha, “Johan Baptijihbuh ku!” 25Niokheamde alibenü kiulongthsüpuh ki yüzah tüsho kheangde tha, “Kheakü nünü I kilim Johan Baptijihbuh ku phuru chingnü jihshihnelah.” 26Kiulongthsüpuh khide mulong mütsüde alakheah; tütüshe thiyuchihchimkhi tüsho api ki binrü dünkheaknü apinü anihbe ki reanglopü mükün. 27Tüsho nahdü lang kiulongthsüpuhnü api ku lude arüpü aheangrü thiyukhüm jih-a yüshih. Apinü yü tüsho rihyam chingnü aku lipshak, 28phuru chingnü api ku lude arü, tüsho ju anünübe kilim jih, tüsho anünübenü ju abe kilim jih. 29Tüsho küyimki api jingyanrübonü ju sokhea, arünü arübah mi shuh-a lu tüsho kiuyukabah.
Chithürü Phüngü Yimkipkhi
(Mt 14.13-21; Lk 9.10-17; Jhn 6.1-14)
30Judüki amüsüh-thsangyurübo Jisu ki mukhungbah arünü arhimokhi le thsangyukhibo alala api ki thaa huh. 31Tüsho apinü arü ki tha, “Isabonü azhik dangpung ching tsomuwuhde yübah sühkhüh sühakhimanü.” Tümütüsho ahihkhüh arüla yüla dükhinü arü yimtsühpü kim she müngü. 32Jumonü arünü sangkung chingnü azhik dangpung khülang ching yü.
33Tüshe botobonü arü yükhi ngü tüsho ahihkhühnü api mükheahbah kiuto alala chingnü jingnü alihde yünü arü müngühnü khiung. 34#Mt 9.36Tüsho küyimki Jisu akhiukkhea, yimto ato ngü tüsho muzhode lüm, tümütüsho arübo aneakrü mülakhi namfimihnubo nangde alakheah. Jumonü apinü arü ki ahihdo thsangyupü tankih. 35Tüsho küyimki nimung zhomakhea, api jingyanrübonü arübah tha, “Ha azhik dangpung ah, tüsho kim zhomado. 36Arübo tsoshang, junangde arünü aphüni lomi tüsho kiulongbo ching yüzahbah arü yikhap thulobah; tümüde arü atsühpü tümü müla.” 37Tüsho arünü api ki tha, “Nünü isa yübah shotoyinchi 200 bahde arü kippü yikhap thuloshihpü mulongla de?” 38Jumonü apinü arü ki keo, “Nüsa yikhap küdükhüh la? Yüang tüsho kheahang.” Tüsho arünü ngübah tha, “Yikhap 5 tüsho thüngüh 2.” 39Judüki arübo akhunungbo thsübah rimkiu aphüyak kheak binshihpü arü ki thiyukhüm jih. 40Jumonü arünü akhinashu thsüde chichi tüsho thünimnim thsübah bin. 41Küyimki apinü yikhap 5 tüsho thüngüh 2 lukhea, apinü thüning lim abinkih-a kheahbah makshe jih tüsho yikhapbo yihnakbah arü ahiuhakhipshihpü jingyanrübo kilim jih; tüsho apinü thüngüh 2 ju arü alala bolung chamjih. 42Jumonü arü alala bukthsüde tsüh. 43Tüsho arünü yikhap le thüngüh dütre muluk 12 hanmukhung. 44Yikhap tsührü ju athrürü 5000 bande alakheah.
Jisunü Kemi kheak Tsahkhi
(Mt 14.22-33; Jhn 6.15-21)
45Apinü boto müzütshihchoki, nahdü lang ajingyanrübo sangkung ching yüzahshih tüsho api müngüh Bethsaida lim yüshih. 46Arü yüshih dunglim, apinü tamkhüntamnüpü müzüng lim yü. 47Küyimki arelim kamkhea, sangkung ju keto phulung ching lakheah; tüsho api a alangzü alo kheak lakheah. 48Judüki apinü arübo küpkhukde sangkung bede ngü, tümüde apungnü arü thsunglode alakheah. Tüsho ayinkhipü tsangchoki apinü kemi kheaknü arü hode ayüpü tsahde arü. 49Tüshe küyimki arünü api kemi kheak tsahkhi ngükhea, me ah de arünü lüm, tüsho zhi; 50tümüde arü alalanü api ngü tüsho trede alakheah. Apinü nahde arü ki asukachih tüsho tha, “Mulong toang! I ah; dütre.” 51Judüki apinü arü kilim sangkung ching yüzah, tüsho apung ju keamlo. Tüsho arübonü müthakhukpü thsüde khide müyinsah. 52Tümüde arünü yikhapbo dünkheak manikhit, tümütüsho arü mulong müküpde alakheah.
Gennesaret ching Thsüngukhi
(Mt 14.34-36)
53Küyimki arü hode ayükhea, arünü Gennesaret lomi ching arü tüsho ju ching sangkung chinga zo. 54Tüsho küyimki arü sangkung chingnü akhiukkhea, nahdü lang mihtsürübonü api kheahkhit. 55Arünü lomi alala ching yü tüsho api lah de arünü asokhi dangpungbo ching tukthsürübo arü yapkiu kheaknü shuhbah api kilim arü. 56Api yüzahpung kiulongbo, kiutobo, yungsho lomi ching, arünü yinzüyindopung ching tukthsürü yapshih, tüsho arünü api khim müngam kheak lang she qiushang de api ki mushu. Tüsho küdükhühnü api qiukheanü thsüngu.
Currently Selected:
MARK 6: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
