MARK 7
7
Jipürü Yakli
(Mt 15.1-9)
1Judüki Pharisirü tüsho athrütrü khürü Jirusalem chingnü api kilim rukhüh arü. 2Arünü api jingyanrü khürü khah mümütsakde yimtsühkhi ngü. 3Tümütüsho Pharisirü tüsho Jihudarü alalanü arü jipürü yakli yande arü khah tsüde mümütsakdüa mütsüh. 4Küyimki arü yinzüyindopung chingnü arübanü arünü mümütsakdüa mütsühchoh. Tüsho arünü yakli püpü ahihdo, pungbo, phühbo tüsho kelamphüh müsühmürade kheakchoh. 5Judüki Pharisirü tüsho athrütrübonü api ki keokhi, “Tümü thsükhi nü jingyanrübonü jipü yakli yande mütsahde, khah mümütsakde yimtsühcho?” 6Apinü arü ki alo, “Isaianü nüsa yiuhkhaprübo dünkheak müchitkhi dükdüa ah, ha thrüta lah:
‘Harü mihtsürünü arü münbonü I wüntre jihchoh,
tüshe arü mulong a I kheaknü limshulah.
7Arünü akeangkeang ching I kingaünchoh;
mihtsürü yuzüng yande kingaün-yakzan thsangyuchoh.’
8Nüsanü Thrünpuh yukhüm zomuwuhbah mihtsürü yakli shuhlah.”
9Tüsho apinü arü ki tha, “Nüsa nihbuh yakli rhimopü thsungkheaknü Thrünpuh yukhüm zomuwuhpü limro tsüde lah! 10Tümüde Mosanü tha, ‘Nü buh tüsho nü be wüntreang; tüsho shepünü abuh yungsho abe athrubanü, api sheshang.’ 11Tüshe nüsanü thachoh, ‘Mihtsürü khülangnü abuh yungsho abe ki, tümüpürü alü nünü I kheaknü leangkhichonü ju Korban (Thrünpuh kilim müsühkhitkhi thsambah) de thasho’; 12tüsho nüsanü abuh yungsho abe thsungkheak kheaküa tümü mürhimoshihsho, 13nüsanü shuhde arükhi nüsa yakli hode Thrünpuh yu tümü nangde mülade kamshihchoh. Tüsho hanangde nüsanü ahihkhüh rhimochoh.”
Mihtsürü Mümüsühde Akamshihbe
(Mt 15.10-20)
14Tüsho küyimki apinü boto alala api kilim jikhea, apinü arü ki tha, “Alalanü I ki aniang, tüsho anikhitang: 15Aleanglimnü yüzahbah mihtsürü khülang müneanjihpü tümü müla, tüshe mihtsürü chingnü tümü akhiukchonü junü api müneanjihchoh. 16Asopü nüsa nükhün kihlasho aniang!”
17Tüsho küyimki boto kheaknü chamkhibah apinü thüyam ching yüzahkhea, api jingyanrübonü shihdanglimyu dünkheak api ki keokhi. 18Jumonü apinü arü ki tha, “Nüsanü ha she manikhit de? Tümüpürü aleangkheaknü mihtsürü ching yüzahchonü api mümüneanjih de nüsanü müngücho de? 19Tümüde ju api mulong ching yungde ho ching yüzahchoh, tüsho akhiukabahchoh, hanangde tsühyungbe alala amüsüh ah.” 20Tüsho apinü tha, “Tümü mihtsürü chingnü akhiukchonü, junü mihtsürü müneanjihchoh. 21Tümütüsho alunglim mihtsürü mulong chingnü amütsü lümkhi, yüliyüra, müzammüram, mihlaksah, 22ahühpü, yihnelune, mihbukmuyuk, akeangyu, yakli-amütsü, mükjomükra, lülüshishi, makhakhi akhiukshihchoh. 23Harü amütsü alala alunglimnü akhiukchoh tüsho mihtsürü müneanjihchoh.”
Aliberü Akin
(Mt 15.21-28)
24Tüsho ju chingnü api tsahmusubah Tair tüsho Sidon lomi ching yü. Apinü thüyam khülang ching yüzah tüsho shenü she ju mümükheahshihpü mulong, tüshe apinü müyima mülakhuk. 25Tümüde atsührübe amünean me lakhi aliberü khülangnü api dünkheak so, tüsho arübah ajing ki mükhüm. 26Alibe ju Greekrü, Siria ching, Phoenikia chingnü asürükhi lakheah, tüsho alibenü atsührübe kheaknü amünean me yankhitshihpü mushu. 27Tüshe Jisunü alibe ki tha, “Akhuhde azürübo yimtsühshang, tümüde azürübo yo yikhap lua khihnubo kilim jipa jihpü alungki yung.” 28Tüsho alibenü api ki alo, “Am, Atungpuh, khihnubonü she dükhüm khüp azürübo mündüdre a tsühchoh.” 29Judüki apinü alibe ki tha, “Ha thakhi hode nü limro ching yüang; amünean me nü tsührübe kheaknü wukhiukdo.” 30Tüsho küyimki alibe ju ayam ching arükhea, atsührübe ju amünean me wukhiukabahbah yapkiu kheak yapa ngü.
Nükhünpeangrü Aduhrü Thsüngukhi
31Tüsho kheaküshe Tair le Sidon lomi chingnü chamachihbah apinü Dekapoli lomi phulungnü hode Galilee keto ching arü. 32Judüki arünü nükhünpeangrü thiyu müthakhukde alakhi api kilim bedarü, tüsho arünü anihbuh api khahnü aqiupü mushu. 33Apinü boto chingnü anihbuh ju bemuwuh, tüsho anükhünbo ching ayingkhingbo chungyuk, tüsho apinü mükeke mukhiuk tüsho amulo qiu. 34Judüki thüning lim abinkih-a kheahde apinü sheak thsü, tüsho anihbuh ki tha, “Ephphatha,” ju amütsan, “Khimshuhang.” 35Judüchokinü anükhünbo khimshuh, mulo kuduka lakhi tsüabah, tüsho apinü tsüde tha. 36Judüki she ki she dütha de apinü arü ki thiyukhüm jih; tüshe apinü küdükhüh arü ki thiyukhüm jihkhea, ju dükhüh arünü ju alü thari. 37Tüsho arünü hodakde müyinsahde tha, “Apinü alala tsüde rhimodo. Apinü nükhünpeangrünü soshih tüsho mulokikrünü thashih.”
Currently Selected:
MARK 7: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
