ROM 1
1
1Jisu Khrista yamlarü Paul, amüsüh-thsangyurü thsüpü jikhi tüsho Thrünpuh thiyusheak-atsü thsungkheak büthsükhi– 2amüsühyubo ching api wukihrübo hode atannü apinü alokhikhi, 3mihtsürü ayannü David müjih chingnü azübekhi, api tsührü isa Atungpuh Jisu Khrista dünkheak, 4amüsühkhitkhi Me ayannü ashe chingnü arhang kamlode, wulade Thrünpuh tsührü de akhipkhitkhi, 5shepü hode isanü amüthsüm tüsho api mung ching trükshih alala bolung akin ching mihyuanipü amüsüh-thsangyurü thsüpü leangkhikhea, 6Jisu Khrista yo thsüpü jia larü bolung nüsa she belanü;
7Thrünpuhnü muzhokhi, amüsührü thsüpü jikhi Rom ching larü alala kilim:
Isa Abuh Thrünpuh tüsho Atungpuh Jisu Khrista kilimnü nüsa amüthsüm tüsho mungtsü lashang.
Makshe-jihkhi Tamkhüntamnü
8Akhuhde, Jisu Khrista hode I Thrünpuh kilim inü makshe jihchoh, tümütüsho nüsa akin alomiküp alala ching zhiyukdo. 9Api tsührü thiyusheak-atsü ching I menü atankihkhi Thrünpuh ju I thiyumütsan lah, junangde I tamkhüntamnü ching kamruhroro müdüchingde inü nüsa lümkhitchoh, 10junangde Thrünpuh lümkhi hode akheam ching I nüsa kilim arüpü akuk ngüpü keokhichoh. 11Tümüde nüsa düküngshihpü thsüde me thsambah jihpü inü nüsa shorupü mulong duklah, 12junangde isabo akin hode nüsa tüsho I yanmusuachihbah. 13#Yunir 19.21I keoniorübo, püpürü khiungkerü bolung nangde nüsa bolung yimlupü thsüde inü nüsa kilim arüpü ahihdo ki lümkhi thsükhi kheakü khiungde zhipdolah de nüsanü mükheahang. 14I a Greekrü le yakzan-mülarü, lümlung larü le makharü chido ki shozüng lah. 15Jumonü nüsa Rom ching larü ki she thiyusheak-atsü thsangyuthsangrapü mulungde lah.
Thiyusheak-atsü Wu
16 #
Mk 8.38
Tümütüsho inü thiyusheakatsü dünkheak machih: ha akin larü aban kilim akhuhde Jihudarü tüsho Greekrü kilim akhümkhit thsungkheak Thrünpuh wu lah. 17Tümüde ju ching Thrünpuh thiyuro-lungki ju akin chingnü akin hode akhiuka lah; ha thrüta lah, “Shepü thiyurolungkianü akin hode arhang alabah.”
Mihtsürü Mülimkhi
18Tümüde arü amütsü tüsho mihbukmuyuknü thiyuro zhipdokhi mihtsürü alala azhihde Thrünpuh bukakhiukkhi yinmi chingnü amikheak akhiuka lah, 19tümütüsho Thrünpuh dünkheak tümü mükheahkhukbe lanü arü ki athülih lah, tümüde Thrünpuhnü arü ki ju huh. 20Thrünpuhnü alomiküp thrünchokinü, amüngübebo, api akheam müla wu tüsho Thrünpuh yakli chido thrüna lakhibo chingnü mütsande ngü. Jumonü mihtsürübonü amudopü müla; 21#Efi 4.17,18tümüde arünü Thrünpuh mükheah-a lalashe api Thrünpuh ah de wüntre müjih yungsho makshe müjih, tüshe arünü alümkhi ching zhazhade kam tüsho arü makhakhi mulong mitingabah. 22Lümlung lah de athakhinü, arü makharü kam, 23tüsho amüshebe Thrünpuh müretah ju ashebe mihtsürü, wuhnubo, shiwühbo yungsho phurutobo mejak dün müthriachih.
24Jumonü Thrünpuhnü mümüsühkhi arü mulongnü akünkhi lim, arü bolung arü pang wüntre müjihkhi lim arübo jihabah, 25tümütüsho arünü Thrünpuh dünkheak thiyuro ju akeangyu dün müthriachih tüsho lünnü müngühmühikhi Athrünrü müthri loriloko kingaün tüsho tankih! Amen.
26Ha dünkheaknü Thrünpuhnü arübo achihbe rhimo lim jihabah. Aliberübonü yakli lakhinü yakli mülakhi müthriabah, 27junangde athrürübonü aliberü kheak yakli lakhi rhimo bahbah khülangnü khülang yimachihde athrürünü athrürü kheak achihbe rhimo tüsho arü mülimkhi thülünde arünü thsümüchi leangkhi.
28Kheaküshe, arünü Thrünpuh mükheahmudu zopü athülün de mülümkhi hode amülim rhimopü lümkhi lim jihabah. 29Arü ju mihbukmuyuk, amütsü, yihnelune, lungchihpünü mide kam. Mükthsü, mihlaksah, rukachih, mülapmüji, mükzahlungzah, jipjiprara, 30dünthamungtha, Thrünpuh thraneanrü, mükmürüm, lungkhangkhi, kükheangkhi, amütsü rhimo, berübuhrü ki mihyumanikhi, 31makhakhi, akin mülakhi, mulong müzahkhi, mihmukhiuhnü mide kam. 32Sherünü jurü rhimobanü ashepü thülünlah de arünü Thrünpuh yakzan mükheahkheah she, arünü arhimokhi lang yung tüshe jurü rhimorü she alim jihchoh.
Currently Selected:
ROM 1: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
