ROM 2
2
Thrünpuh Mahkhap
1 #
Mt 7.1; Lk 6.37 Jumonü, O mihtsürü, nüsa shepünü püpürü kheak mahkhapchonü amudopü müla; tümüde api kheak mahkhapkhinü nü küdah thsüde bahyukchoh, tümütüsho nü, mahkhaprünü ju nangde rhimochoh. 2Thrünpuh mahkhap ju hadürü rhimorü kheak lungkide keamchoh de isanü mükheahlah. 3O mihtsürü, nünü hadürü rhimode labah ju rhimorü ki mahkhapchoki nünü Thrünpuh mahkhap tsokhibah de lümcho shi? 4Yungsho Thrünpuh tsükhinü nü mulong müthripü lim bechoh de mümükheahde api tsükhi, arümkheam tüsho arorikhi mükhemükimcho de? 5Tüshe nü nihnihkhi tüsho nü mulong müküpkhinü Thrünpuh bukakhiukkhi, api thiyuro-lungki mahkhap amikheak akhiuk nimung thsungkheak nü azhihde bukakhiukkhi zomukhungchoh. 6Tümüde mihtsürü aban apinü arhimokhi yande Thrünpuhnü thsambah jihbah. 7Atsü rhimode, müretah, wüntre, tüsho amüshebe rhangdung yimrü kilim apinü lün rhangdung jihbah. 8Tüshe yihnelunerü tüsho thiyuro bahyukbah amütsü yimrü thsungkheak mulong zhipzhip tüsho bukakhiuk labah. 9Amütsü rhimorü mihtsürü aban akhuhde Jihudarü tüsho Greekrü thsungkheak thsümütsü tüsho lümthsünü labah; 10tüshe atsü rhimorü aban, akhuhde Jihudarü tüsho Greekrü thsungkheak müretah, wüntre tüsho mungtsü labah. 11Tümüde Thrünpuhnü jakkheahkhi muhuhchoh.
12Yakzan mübede neak yihbeakrü alala yakzan mübede adükheakbah, tüsho yakzan bukkhüpnü neak yihbeakrü alala yakzannü mahkhapbah. 13Tümüde Thrünpuh miki thiyuro-lungkirü ju yakzan anirü yung, tüshe alim mütsanpü larü ju yakzan yande arhimorübo lah. 14Küyimki yakzan mülarü khiungkerünü yakzannü yihnüpü lakhi yande mihnü arhimobanü, arübo yakzan mülaa lalashe arü thsungkheak ju yakzan kamchoh. 15Arü mulong ching yakzan thrüta lakhi rhimonü ahuhkhi arü lümkhinü thiyumütsan thsüchoh, tüsho arü dükeak ching arü lümkhinü amülim jihchoh yungsho amülim bahachihchoh. 16Ha I yo thiyusheak-atsü yande Thrünpuhnü Jisu Khrista hode mihtsürü lümkhibo mahkhap nimung dünjibah.
Jihudarü tüsho Yakzan
17Tüshe nünü nü küdah thsüde Jihudarü de jisho tüsho yakzan kheak mulong tode Thrünpuh kheak chingkihkhi kükheangsho, 18tüsho nünü yakzan chingnü anikhitkhinü api lümkhi mükheahde tümü atsüanü leangkhisho, 19tüsho nü ju müktukrü thsungkheak limthorü, amiting ching larü thsungkheak ayin khülang ah de mütsansho, 20yakzan chingnü mükheahmudu tüsho thiyuro lade makharü thsangdanrü tüsho amümükheahrü thsangyurü thsüsho– 21dale tüsho nü shepünü püpürü thsangyuchonü, nü küdah thsüde müthsangyu de? Ahühkhi azhihde nünü thsangyuchoki nünü ahühcho shi? 22Mihtsürünü müzammüram müyihbeakbeah de nünü thabah, nünü müzammüram yihbeakcho shi? Nünü sangthsü thraneanchosho, arüngyam jangkhicho shi? 23Nü shepünü yakzan ching kükheangchonü, nünü yakzan thsümünimde Thrünpuh ki wüntre müjihcho shi? 24Tümüde ha thrüta lah, “Nü dünkheaknü khiungkerü bolung Thrünpuh mung mükhemükima lah.”
25Nünü yakzan anisho tsütabahkhi ju adün-amo lah; tüshe nünü yakzan thsümünimsho, nü tsütabahkhi ju tsütamübahkhi kamchoh. 26Jumonü mihtsürü khülang tsütamübahde yakzan yukhüm anisho api ju tsütabahkhi nangde mükhebea de? 27Nü shepü athrütkhi la tüsho tsütabah-a lalashe yakzan thsümünimkhi lanü, shih tsütamübah tüshe yakzan zobuhnü nü bahyukbah. 28Mihtsürü ju amikheak lang a sho, yungsho amikheak shih tsütabahkhi lang a sho Jihudarü yung. 29Shepü alunglim lanü api Jihudarü ah tüsho atsütsü tsütabahkhi ju mulong tüsho me ah tüshe atsütsünü yung. Api mungshi ju mihtsürü kilimnü yung tüshe Thrünpuh kilimnü lah.
Currently Selected:
ROM 2: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
