ROM 3
3
1Dale tüsho Jihudarü alü tümü la? Yungsho tsütabahkhi alü tümü la? 2Limro aban ching hihde lah. Akhuhde, Jihudarü ju Thrünpuh müchityu bede thiyia lah. 3Khürünü akin mülamo tümü la? Arü akin mülakhinü Thrünpuh thiyuro lakhi amülim kamshihcho de? 4Jude yung! Ha thrüta lakhi nangde mihtsürü aban arükchih lalashe Thrünpuh a thiyuro lashang,
“Nünü athachoki nü alim huhbah tüsho nü mahkhapchoki akuk ngübah.”
5Tüshe isa mihbukmuyukkhinü Thrünpuh thiyuro huhpü thsüsho, isanü tümü thaba? Apinü isa thsümüchichoki Thrünpuhnü amülim thsüchoh de isanü athakhukba de? (Inü mihtsürü ayannü thachoh.) 6Jude yung! Jude thsüsho, Thrünpuhnü küde alomiküp mahkhapkhukpü? 7Tüshe I arükchih hode api müretah alü kamshihsho, tümü thsükhi kheakü khiungde I aneakrü nangde bahyuka la le? 8Dale tüsho, “Atsü arüpü thsungkheak isanü amütsü rhimoanü” de isanü tümüde müthapü? Mihtsürü khürünü hadürü thade I mükhemükimdo! Arü thülünde abahyukbah.
She Thiyuro-lungki Müla
9Dale tüsho isa ju arü kheaknü atsübea shi? Jude yung. Tümüde isanü akhuhlim Jihudarü le Greekrü chido neak bukkhüp lah de thado.
10Ha thrüta lah:
“She thiyuro-lungki müla, sheshe müla;
11Shenü she manikhit,
shenü Thrünpuh müyim.
12Alala rholode tsodo, arü rukhühnü amülim thrip tsodo;
Shenü she atsü mürhimo, sheshe müla.
13Arü thrukeang ju akhimshuhkhi kiuyuk ah,
arü mulonü mülapyukchoh.
Arü münküpbo khüp phuruto müzüm lah.
14Arü mün athruajibo tüsho akhühnü milah.
15Thiyih bukpü arü jing athrilah,
16arü limro ching athsümünim tüsho thsümütsü lah,
17tüsho arünü mungtsü limro mümükheah.
18Thrünpuh trekhi arü mük ki müla.”
19Kheakü tümüpürü yakzannü thachonü yakzan bukkhüp larü ki thachoh de isanü mükheahlah, junangde mihbüm aban mün tuklobah, tüsho alomiküp athrünkhi Thrünpuh mahkhapkhi khüp lah. 20#Gal 2.16Tümüde mihtsürü sheshe yakzan rhimokhinü api miki alim müthsü, tümütüsho yakzan hode neak mükheahkhi arüchoh.
Akin Hode Thiyuro-lungki
21Tüshe kheakü yakzan tüsho wukihrübonü thiyumütsan thsüa lalashe, Thrünpuh thiyuro-lungki ju yakzan kheaknü büthsüde akhiukdo. 22#Gal 2.16Ha thiyuro-lungki ju Jisu Khrista ching akin hode akinrü alala kilim Thrünpuh kilimnü arüchoh. Ju ching büthsüde tümü müla, 23tümütüsho alalanü neak yihbeakdo tüsho Thrünpuh müretahpü thamaa lah, 24tüshe Jisu Khrista hode arükhi api amüthsüm hode akeangnü alim kamshih. 25Thrünpuhnü akin hode thiyihnü dünthsükhishihpü, api thiyuro-lungki huhpü arüshih, tümütüsho akhuhlim yihbeakkhi neakbo api arümkheamkhinü Thrünpuhnü khenoabahjih– 26apinü ju kheakü kim ching api thiyuro-lungki huhpü thsü, junangde api alungki tüsho Jisu kheak akin larü alim-kamshihrü thsübah.
27Dale tüsho isa lülüshishikhi tümü kamcho? Tümü müla! Ha thsungkheak amütsan tümü a? Isanü yakzan animonüa shi? Yung, tüshe isanü akinkhinü ah. 28Tümütüsho yakzan rhimokhinü yungde akin hode mihtsürü alim mütsanchoh de isanü athazhak thsüchoh. 29Yungsho Thrünpuh ju Jihudarü Thrünpuh lang a de? Api ju khiungkerü Thrünpuh she yung de? Am, khiungkerü thsungkheak she ah, 30#Gal 3.20tümütüsho Thrünpuh ju khülang ah; tüsho apinü tsütabahkhi tüsho tsütamübahkhi arü akin hode alim mütsanjihbah. 31Dale tüsho ha akin hode yakzan isanü bahkhicho de? Jude yung! Judübüdün a, isanü yakzan shuhchoh.
Currently Selected:
ROM 3: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
