ROM 5
5
Thrünpuh kheak Alim
1Jumonü akin hode alim kamshihkhinü isa Tungpuh Jisu Khrista hode Thrünpuh lung isa mungtsü lah. 2Akin hode apinü kheakü isa zhipde alakhi amüthsüm ching isa bedarü. Tüsho Thrünpuh müretah mulonglam ching isa asühachihchoh. 3Ju lang yung, thsünükhinü arümkheam akhiukchoh de mükheahbah isanü isa thsünükhi ching asühachihchoh, 4arümkheamkhinü yakliyakko akhiukchoh, tüsho yakliyakkonü mulonglam akhiukchoh, 5tüsho mulonglamnü isa müshangmangshih, tümütüsho isa kilim jihkhi Amüsüh Me hode Thrünpuh amuzho isa mulong ching yüzahshih.
6Isa yiuhyiuhde alachoki, kim dükdü ching amükinrü thsungkheak Khrista she. 7Tümütüsho khürünü thiyuro-lungki mihtsürü thsungkheak shepü achakato ah; judüalalashe khürünü mihtsürü atsü thsungkheak shepü mürangpü kuklah. 8Tüshe isa aneakrü lachoki isa thsungkheak Khrista shekhinü Thrünpuhnü isa thsungkheak api muzho huh. 9Jumonü kheaküa api thiyih hode isa alim kamshih, alü thsüde Thrünpuh bukakhiukkhi chingnü apinü isa khümkhitbah. 10Tümütüsho thiriri lachoki api tsührü shekhinü Thrünpuh kheak isa tsüarihshih-a lasho, alü thsüde kheakü tsüarih-a lale, api rhangdungnü isa khümkhitbah. 11Ju lang yung, tüshe shepü hode kheakü isa tsüarihkhi leangkhia la, isa Atungpuh Jisu Khrista hode Thrünpuh lung she isa asühachihchoh.
Adam tüsho Khrista
12Jumonü mihtsürü khülang hode alomi ching neak tüsho neak hode ashepü arükhi nangde, mihtsürü alalanü neak yihbeakkhi nangde ashepü ju mihtsürü alala kheak bu. 13Yakzan müjihyide neak ju alomi ching lakheah, tüshe yakzan mülapung ching a neak ju mükhe. 14Tütüshe Adam kheaknü Mosa khiungde, Adamnü Thrünpuh yukhüm manide arhimochoki nangde neak müyihbeakrü mihtsürü alala kurungkheak she yakzan shuh.
15Tüshe akeang thsambah ju alakmihkhi nangde yung. Tümütüsho mihtsürü khülangnü alakmihkhi hode ahihdo shekheasho, mihtsürü khülang Jisu khrista amüthsüm ching ahihdo thsungkheak Thrünpuh amüthsüm tüsho akeang thsambah lah. 16Tüsho akeang thsambah ju mihtsürü khülang neaknü adünjishihkhi nangde yung, tümüde khülangnü alakmihkhi mahkhapnü abahyukkhi hande arü, tüshe ahihdo lakmihkhi dunglim akeang thsambahnü alim mütsanjihkhi hande arüchoh. 17Tümüde mihtsürü khülangnü alakmihkhi hode ashepünü yakzan shuhchosho, mihtsürü khülang Jisu Khrista hode Thrünpuh amüthsüm suhdahde tüsho rhangdung ching thiyuro-lungki thsambah leangkhipü larü küdükhüh she alaba.
18Junangde khülangnü alakmihkhinü mihtsürü alala thsungkheak abahyukkhi nangde, khülangnü thiyuro-lungki rhimokhi hode mihtsürü alala thsungkheak rhangdung handarükhi alim mütsanjihchoh. 19Tümüde mihtsürü khülang mihyumanikhinü ahihdo aneakrü kamshih, junangde mihtsürü khülang mihyuanikhinü ahihdo thiyuro-lungki kamshihbah. 20Alakmihkhi alü kamshihpü yakzan arü, tüshe küching neak alü kamchonü mihmüthsüm alü kamchoh, 21junangde neaknü ashekhi ching yakzan shuhkhi ruk, isa Atungpuh Jisu Khrista hode mihmüthsümnü lün rhangdung lim thiyuro-lungki yande yakzan shuhbah.
Currently Selected:
ROM 5: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
