ROM 6
6
Neak ching Ashekhi tüshe Khrista ching Arhang Lakhi
1Dale tüsho isanü tümü thaba? Mihmüthsüm suhdahpü thsüde isanü neak ching mutuklode alabea shi? 2Jude yung! Isanü küde thsah neak ching shebah judü lang rhangdung lakhukpü? 3Isa alala Jisu Khrista ching baptirü ju api shekhi ching baptikheah de nüsanü mümükheah de? 4#Kol 2.12Jumonü ashekhi ching baptikhinü isa api lung kiuyukabah, junangde Abuh müretahkhi hode Khrista ashe chingnü asürüshihkhi ruk isa she rhangdung aso ching tsahbeah.
5Tümüde isanü api nangde ashekhi ching api lung arihkhülaa, atsütsü api nangde arhang kamlokhi ching api lung arihbah. 6Isa awün api lung yümkihdo de isanü mükheahlah, junangde neak lakhi pang thsümünimbah tüsho kheaküa isa ju neak azhorü müthsü. 7Tümüde shepü shedünü neak chingnü zuzu kamdo. 8Tüshe isa ju Khrista lung shekhülaa, isa she api lung labah de isanü kinchoh. 9Tümüde Khrista ashe chingnü asürükhi küyimkishe müshelo de isanü mükheahlah; kheakü ashenü api kurungkheak yakzan mushuh. 10Api shekhi ju neak ching khülang ki shedo, tüshe api rhangdung lakhi ju Thrünpuh kilim lah. 11Jumonü nüsa she neak ching shebah Jisu Khrista ching Thrünpuh kilim lakhi lümang.
12Jumonü shihkünkhi ching nünü mihyuanipü thsüde ashepü lakhi nü pang ching neaknü yakzan düshuhshih. 13Nü pang shihchambo ju mihbukmuyuk rhimopü neak kilim düjih, tüshe ashe chingnü arhang kamlokhi mihtsürü nangde tüsho nü pang shihchambo thiyurolungki rhimopü Thrünpuh kilim jihang. 14Tümüde neaknü nü kurungkheak yakzan mushuh, tümütüsho nü yakzan khüp müla tüshe mihmüthsüm khüp lah.
Thiyuro-lungki Azhorübo
15Dale tüsho tümü a? Isa yakzan khüp müla tüshe mihmüthsüm khüp lamonü isanü neak yihbeakba shi? Jude yung! 16Nünü ashe lim bekhi neak yungsho thiyuro-lungki lim bekhi mihyuanikhi, küpü ki mihyuanibanü ju azhorü kamchoh de mümükheah de? 17Tüshe nüsa khülangki neak azhorü thsübah nüsanü akinkhi thsangyukhi ching mulong shuhmülanga jihde mihyuanide akamkhi Thrünpuh ki makshe jihang, 18tüsho neak chingnü zuzu kambah thiyuro-lungki azhorü kamdo. 19Nüsa yakli mukhiukdahkhinü inü mihtsürü lalim yande thachoh. Khülangki nüsa pang shihcham mütsangkhitkhi tüsho amülim atobe lim jihkhi nangde kheakü nüsanü atsangkhitpü thsungkheak thiyuro-lungki lim jihang.
20Küyimki nüsa neak azhorübo lakhea, thiyuro-lungki chingnü nüsa zuzu lakheah. 21Dale tüsho kheakü nüsanü achihde alakhi rhimokhi chingnü nüsa tümü alü thsüde? Jurübo akheam ju ashekhi lah. 22Tüshe kheakü nüsa neak chingnü zuzu kam tüsho Thrünpuh yo azhorü kam, ju müthri nüsanü atsangkhitkhi ngü tüsho akheam ju lün rhangdung lah. 23Tümüde neak mihkhah ju ashekhi, tüshe Thrünpuh akeang thsambah ju Atungpuh Jisu Khrista ching lün rhangdung lah.
Currently Selected:
ROM 6: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
