JUHAN 13

Jisu-e Chix Wangshembu Cha So

1Athax, Kaitox Pangpwon manguiba, Jisu-e, chix ija chaxwannu dantoxlaxle Hopa hato pao angkya otu nguile hüiüna le awanlaxle, chaxwannu ma tüikyabu, opang chix kux changkya hex, chixe hwom to tüle mongkün; chixe hwom to oshuk kople akhex.

2Jisu hia chix wangshembu fongsax ang thungle tüikya. Simon sasün Juda Iskariot mong ma, Jisu owüiole kox angkya, baoe mongkho adünle kox. 3Hopae chix chak to pangnu tsakzong koxdaoa le Jisu-e awan; chix Zang tokhange nguikya changpu ilaxle chix Zang hato chat angkya changle le chixe awan. 4Idaile sax ngokya kha angkya chix ajong, otok ma laxkya chix nyi sikle tox, ilaxle chixe tsangtsa fwot nyi apüilaxle, ija khiadax ma ahinle kop, 5Ifüima chixe khua tuita ma ti thok, ilaxle wangshembu cha tsuxle kox tamchu chix khiadax ma ahinle thomkya tsangtsa fwot nyi füi hwom chabu fwotle kox ang süt. 6Simon Pitar hato hüi, ikoxle chixe Jisu ang thüi: “Jowanpa, nange ku cha so ang hi?”

7Jisu-e chix ang thüi: “Kue chem mokpuix, athax nange münawan; ikoxle nange füichi ma awanüi.”

8Pitar-e chix ang thüi: “Otuechu nange ku cha chisoüi.” Jisu-e chix kax to lan: “Kue nang sole chifa thüikoxle athax nang ku füizuimix ang münchang.”

9Simon Pitar-e chix ang thüi: “Nwotmix, cha tata chichangle ku chak hia khangchu sole fahüi.”

10Jisu-e chix ang thüi: “Owae ti ajodaopuix, chixe cha boma mama so ngo angkya oli münchang, chix a pangnu kha wüi tsaole ngole. Mixhuak tuita boma hünzom pangnu wüi tsaole tüile.” 11Owae chix khohang angkya hex, Jisu-e awanle ngo; Idaile chixe “Tuita boma hünzom pangwüi tsaole tüile”, le thüi.

12 # Luk 22.27. Jisu-e hwom cha sole fakya füima, chixe ma nyiza lax üntoxle anaole chix ngwotnui ma thung ilaxle hwom ang thüi: “Athax kue hünzom ang chem mokle aho koxdao puix, ija awanchami? 13Hünzome ku ang Nwotmix tamchu Jowanpa le nyakle; ija a hünzome otsingtsing wüi nyakpu; chemthüikoxle ku a ija changkya jao. 14Ku, Nwotmix tamchu Jowanpa-e athax hünzom ang cha sole koxpu; ilailaile hünzomechu tata cha sole kox angkya changle. 15Chemthüikoxle kue hünzom ang mokle koxkya ningle hünzomechu mok angkya hanpakma, kue hünzom ang olom tuita ahopu. 16#Mat 10.24; Luk 6.40; Jhn 15.20.Otsingtsingma kue hünzom ang thüipu, ma hopunu füi da wüi achongkya münchang tamchu owae tsanpuix, chix füi tsanle apaokya mix wüi achongkya chichang. 17Athax hünzome ija otsingtsing bama awandaoa ilaxle ija mwot ang achangle twonkya zuma hünzom ang mong otukux müiüihex!

18 # Mts 41.9. “Kue hünzom pangnu bama akax ngokya münchang; kue kamle kopdaokyabu kue awanle; ikoxlechu Otsao Lai kax ija otok to ngaile aho angkya changpu: Ku füi tomle fongsax ngokya tuita ku zan to ka angkya changle. 19Ija otue ngaile laiüi hex, ‘Ku a Ku changpu’ le hünzome ongkya hanpakma, ngaile machang tanto wüi kue hünzom hama apuale thompu. 20#Mat 10.40; Mrk 9.37; Luk 9.48; 10.16.Otsingtsingma kue hünzom ang thüipu: Kue mwot tsanle apaokya mix owae pongle kopüi hex, chixe ku pongle kopkya changpu; ilaxle owae ku pongle kopüi hex, chixe ku tsanle ajokya mix pongle kopkya changpu.”

Jisu-e Chix Dyen angkya bama Akax

(Mat 26.20-25; Mrk 14.17-21; Luk 22.21-23)

21Jisu-e ile akax füima, chix mongshunle hüi ilaxle angaile akax: “Otsingtsingma kue hünzom ang thüipu, hünzom kha angkya mixhuak tuitae ku khohang angkya changle.”

22Chixe opupu ang thüipuix le hwom ang khosam. Wangshembue tata to ahu. 23Wangshembu khama, owa to Jisu-e mongkünle tüikya hex, chix a Jisu hama apiale ngole tüikya. 24Simon Pitar-e chix chito hüilaxle thüi: “Chixe owa bama akaxpuix, kwom hama apua hüile thüihu.”

25Ikhoma ija füizuimix Jisu hato soxle hüilaxle atüi: “Jowanpa, ija a owa hex?”

26Jisu-e lan: “Kue an som laxle owa ang koxüi hex, ija a chix changüi.” Jisu-e an som laxle Simon sasün Juda Iskariot ang kox. 27An kopkya füi tomle bao chix ma nop. Jisu-e chix ang thüi: “Nange chem mok angkya tüipuix momle moklax.” 28Ija kax chix füi chem khoma akaxpuix le süt saxle ngokya kha angkya owaechu chiawan. 29Juda Iskariot ma ngun suak thomkya daile, pangpwon hanpakma hwom mwotkat shak angkya chichangba mixshix-zasabu ang tütali laxkoxle akaxkya changüi le züizüie thüt.

30An pongle koplan laxle Juda Iskariot ima wüi homtho to laile pao; iponge zang nakle changünkya.

Kaxtom Ozün Tuita

31Ile chix homtho to laile paokya füima, Jisu-e thüi: “Athax Khünak Hosa fuazangle tamchu chix ma Zang fuazangle aho daoa. 32Chix makhange Zang fuazang angaile jangchangba, Zangechu chix ma wüi Khünak Hosachu fuazang ang tomüi. Ija ile chixe athax wüi mok angkya changle. 33#Jhn 7.34.Ku naosombu, athaxpi ku hünzom füi aluile ngoüi münchang. Hünzome ku lomüi; kue Jehudi nok pünpa-chongwangbu füi akaxdaokya ningle hünzom angchu thüipu, ku pao angkya khato hünzom ngui ang münthoüi. 34#Jhn 15.12,17; 1 Jn 3.23; 2 Jn 1.5.Ikoxle athax kue kaxtom hozün hünzom ang koxpu: tata to mongkünle tüilax; kue hünzom to mongkünkya ningle hünzomchu tata füi mongkün ma ngo angkya changle. 35Hünzom ma tata to mongkünkya jangtüiba, hünzom a ku wangshembu changpu le pangnusae awan ang kopüi.”

Pitar-e chix Dyen angkya Kax Jisu-e Akax

(Mat 26.31-35; Mrk 14.27-34; Luk 22.31-34)

36Simon Pitar-e chix ang thüi: “Jowanpa, nang ojong khato pao ang?” Jisu-e lan: “Athax ku pao angkya khato nange ku füito ngui ang münthoüi; ikoxlechu füima tho angkya changle.”

37Pitar-e chix ang thüi: “Jowanpa, chem khoma kue athax nang man to ang chitho angkya? Ku nang bama zi angkya kople achwon ngopu.”

38Jisu-e lan: “Nange ku bama nang tsün kox ang thoüi nyi? Otsingtsingma kue nang ang thüipu, awün o haüi thoto wüi, nange ku owa hex müntsing le othom azom ma akax angkya changle.”

Currently Selected:

JUHAN 13: WANCBSI

Highlight

Copy