JUHAN 15

Jisu a Otsingtsing Ponu Tuita

1Jisu-e akax: “Ku a otsingtsing hopupa ilaxle ku Apa a opün zangkya mix changpu. 2Ku ma tüikya pünkang ojae oziak chiziaküi hex, ija a ngople awütüi; ilaxle pünkang oja pang ma oziak ziakle tüipuix, ija onüi sütle ziak angkya kuxma, chixe ija hanle atsaoüi. 3Kue anokya hwon-nwot zangwün makhange hünzom a tsaole tüile. 4Ku ma ngolax ilaxle ku hünzom ma ngoüi; hopupa ma chimyen thüikoxle pünkangsae oziak chemle ziak ang thoüi? Ija lailaile ku ma myenle chingo thüikoxle hünzomechu oziak ziak ang müntho angkya changle.

5“Ku a hopupa ilaxle hünzom a pünkangbu changle; owa ku ma ngopuix tamchu ku owa ma ngopuix, ija khünake huanuma oziak ziaküi; chemthüikoxle ku füi atsai laxle hünzome chemchu mok ang müntho. 6Ku ma chingokya mix a pünkang ngople awütkya ningle ngople awütüi ilaxle zi ang tomüi; ilaxle ija ningkya pünkangbu a afoxlaxle wün kha to awütüi üntoxle ibu ikhato shun ang tomüi. 7Hünzom ku ma jangngo tamchu ku kax hünzom ma ngo ang jangtom, hünzome chem laxse tsupuix, ajuju pangwüi hünzom ang mokle koxüi. 8Hünzom ma tüle oziak ziakkya makhange Apa fuazang ang tomle; ile hünzom a ku wangshembu ang achangle. 9Apae ku to chemle mongkün puix, ija lailaile kuechu hünzom to mongkünpu; idaile hünzom ku mongkün ma ngolax. 10Ku chemle Apa kax ma laxle ngopuix, tamchu chix mongkün ma ngopuix, ija ningle hünzomechu ku kaxtom kax ma laxle jangngo thüiba, hünzom chuwüi ku mongkün ma ngoüi.

11“Ku mongmüi hünzom ma naxngo; ija a hünzom mongmüi okho angui angkya kuxma; ibibi kax kue hünzom füi akaxdaoa.

Tata Füi Mongkün ma Ngo angkya

12 # Jhn 13.34; 15.17; 1 Jn 3.23; 2 Jn 1.5. “Kue hünzom to chemle mongkün, ija ningle hünzomchu zuikhui hia zuikhui bama mongkün ma ngolax; ija a ku kaxtom changpu. 13Khünak tuita ma tüikya mongkün akhokya a; chixe hozui hanpakma ma tsün kox ang thokya tix changle. 14Kue hünzom ang chem kaxtom fapuix, ija hünzome jangmok thüiningle, hünzom a ku zongto zuikhui changpu. 15Athaxpi kue hünzom ang dale münnyak; chemthüikoxle da tuitae ma hopupae mokkya mwot münawan; ikoxchu kue hünzom ang zuikhui le nyak daoa; chemthüikoxle kue Apa tokhange chempang atatle laxpuix ibu pangwüi kue hünzom hama wünpu. 16Hünzome ku zünle kopkya chichang, ikoxle otsün lole ngokyali oziak huanuma ziakle pao angkya hanpakma kue hünzome zünlaxle kamle koppu. Ikhoma hünzome ku mün ma chix ma ajuju komle chixe kox angkya changle. 17Ija khoma kue hünzom ang koxkya kaxtom a ija changpu: Hünzom a tata füi mongkün ma ngolax.

Chaxwannu Miktsak

18“Chaxwannue hünzom thua jang-anuba; ija a pongwang ma ku thua anule kopkya changpu le hünzome awanlax. 19Hünzom chaxwannu kux jangchang thüikoxle, chaxwannue makuxle mongkünle tüise; ikoxle hünzom a kue chaxwannu angkya zünle kopdaoa, ija khoma chaxwannue hünzom thua anu angkya changle. 20#Mat 10.24; Luk 6.40; Jhn 13.16.‘Ma hopunu füi da wüi achongkya münchang’ le kue hünzom füi akaxkya ku kax texle ataklax. Hwome ku ang sikngün fadaokya jangchangba, hünzom sikchu wüi angün angkya changle. Hwome ku hwon-nwot kax ma laxkoxle, hünzom kax machu lax angkya changle. 21Ikoxlechu hünzom a ku kux changkya khoma, hwome hünzom to ibu pangwüi mokpu. Chemthüikoxle hwome ku tsanle ajokya mix chitsing. 22Ku nguilaxle hwom füi chiakaxkya hex thüikoxba, hwom achaxkya chitüise; ikoxlechu athax a hwom ochax khoma paole azang tsuak angkya olom müntüi. 23Owae ku thua anupuix, chixe Apa thuachu wüi anukya changpu. 24Otuechu tamchu owaechu mamokkya mwot kue hwom khama münmok hex thüikoxle hwom ma ochax chemchu chitüise; ikoxle athax a hwome ngünle kopdaoa tamchu Apa kukhi pangnyi thua anudaoa. 25#Mts 35.19; 69.4.‘Ikoxle hwome ngat-khüza to ku thua anu’ le wanlom ma zale tüikya kax changle ngai angkya kuxma ile changpu.

26“Ikoxlechu fongmix, oja Otsao Chasa, owae Zang otsingtsing ngaile aho angkya changpuix, tamchu owa Apa tokhange hüipuix, chix nguikya zuma, chixe ku bama kaxkhi fale zangwün angkya changle. 27Ilaxle hünzomechu wüi ku bama kaxkhi fa angkya changle. Chemthüikoxle hünzom a pongwang tokhange wüi ku füi ngole hüikya changle.

Currently Selected:

JUHAN 15: WANCBSI

Highlight

Copy