JUHAN 8
8
Chinunchakkai ma Kopkya Mixcha
1Pangnu wüi mahomhom to fan, ikoxle Jisu a Olip haxhua to pao. 2Ofüinop chix anaole Zangshwom-Hom to chat. Khünaknu pangnu wüi chix hato ngui; ilaxle chix thung üntoxle hwom hama hwon-ano ang süt. 3Wanlom nwotmixbu hia farisibue, chinunchakkai ma kopkya mixcha tuita laxlaxle nguile hwom osung wama dan. 4Hwome chix ang thüi: “Nwotmix, ija mixcha a chinunchakkaile ngopong khae kopkya changpu. 5#Liw 20.10; Tsk 22.22-24.Wanlom ma kwom ang Mosa-e, ija ningkya sheko to long füi thuple lang angkya akaxle; ikoxle nange chemle thüiüi?” 6Hwome ija kax, chix tsünle, chix lang angkya chifün lomle akaxkya changkya. Ikoxle thung laxle Jisu-e chak-khi füi hax to za.
7Ikoxle hwome chix ma, kaxtik ang sütle ngopong ma, chix ajong laxle hwom ang thüi: “Hünzom khama ochax chitüi le ngokya mixe she to long füi thoma shongthup kox.” 8Anaolechu chix thung ilaxle hax towüi za. 9Ija kax atatlaxle, hwom tuita füima tuita le, tüichongbu ma atho laxle laile pao. Ikhama Jisu hia kople apüikya mixcha nyi tata danle tox. 10Chix ajong laxle ija mixcha füi akax: “Mixcha, hwom omaün? Tutae ngaxchu nang to long füi münthup hia?”
11She-e lan: “Changle, Jowanpa, ku tha owaechu münajao.” Jisu-e thüi: “Kuechu wüi münajao; paolax, athax makhange ochax tam taxlyen.”
Jisu a Chaxwannu Zangngai
12 #
Mat 5.14; Jhn 9.5. Anaolechu Jisu-e farisibu ang thüi: “Ku a chaxwannu zangngai; ku füito azuikya khünakbu zangnak ma münaham, ikoxle hwom ma khüzün zangngai tüiüi.”
13 #
Jhn 5.31. Farisibue chix ang thüi: “Nang kaxkhi nange alüile fale hia? Ija nang kaxkhi otsingtsing münchang.”
14Jisu-e lanle hwom ang thüi: “Ku hanpakma kaxkhi kue alüile fakya changkoxchu ku kaxkhi otsingtsing changpu; chemthüikoxle ku ojong khatokya nguipuix chichangba ku ojong khato pao angkya hex ija kue awanpu; ikoxle hünzome, ku ojong khatokya nguipuix tamchu ojong khato pao angkya hex ija chiawan, 15Hünzome müi-hi-aji mongtex ma kaxfün fale; ikoxle kue owa angchu kaxfün münfa. 16Ilaxle kue kaxfün fale jangchang thüikoxchu; ija ku kaxfün a otsingtsing changüi; chemthüikoxle ikhama ku tata chichangle ku tsanle ajokya Apa chuwüi womle tüile. 17#Tsk 19.15.Hünzom wanlom machu mixhuak anyi notom kaxkhi a otsingtsing changüi le zakya tüile. 18Ku hanpakma kaxkhi fakya mix a ku changle tamchu ku tsanle ajokya Apaechu wüi ku hanpakma kaxkhi fale.”
19Hwome chix ma atüi: “Hünpa ojong khato tüipu?”
Jisu-e lan: “Hünzome kuchi münawan, Apa chuwüi münawan; hünzome ku awan koxle Apa chuwüi awan ang kopse.”
20Jisu-e ibu zangwün Zangshwom-Hom ma hwon-ano pongma, ngun athünkya nui to akax; ikoxle khünak owaechu chix chikop; chemthüikoxle chix ang tiale toxkya chix hanpak mahüi.
Ku Paokya khato Hünzom Ngui ang Müntho
21Anaolechu Jisu-e hwom ang thüi: “Ku a pao angkya changle; hünzome ku lomüi, ikoxlechu hünzom a ma ochax ma zile ngoüi; ku paokya khato hünzom ngui ang münthoüi.”
22Ikhoma Jehudi nok pünpa-chongwangbue thüi: “Chix paokya khato kem ngui ang münthoüile thüikya, chix alüile zi max angkya kax changdaisi?”
23Jisu-e hwom ang thüi: “Hünzom a fang tokya, ikoxle ku a thak tokya changle; hünzom a ija chaxwannu angkya ikoxle ku a ija chaxwannu angkya chichang. 24Ikhoma kue hünzom ang thüipu, hünzom a ma ochax ma ziüi; chemthüikoxle hünzome ku to ‘Ku a Ku changpu’ le ma-ong tanto hünzom a ma ochax ma zi angkya changle.”
25Hwome chix ang thüi: “Nang a owa changkya?”
Jisu-e hwom ang thüi: “Pongwang tokhange wüi kue hünzom füi chempang akax daopuix, ibu a ija changle. 26Hünzom hanpakma akax angkya hia kaxfün fa angkya ku ma tüihu le. Ikoxlechu ku tsanle ajokya mix otsingtsing ilaxle kue chaxwannu füi chix makhange atatkyakya akaxpu.”
27Hwome Jisu-e hwom füi Hopa bama akax ngokya changpu le texle chiatak. 28Ija khoma Jisu-e thüi: “Otue hünzome Khünak Hosa nwonlaxüi hex, ija ma hünzome: Ku a Ku changpu ilaxle kue ku mongmong ma chemchu chimok ikoxle ijabu kue Apae adangle fakya ningle akaxpu; 29Tamchu ku tsanle ajokya mix ku füi tüile; otuechu chixe ku kutata danle müntox, chemthüikoxle kue chix mong amüi angkyakya mokpu, le hünzome awan ang kopüi.”
30Jisu-e akaxkya ibu kax atatlaxle chix to mongongkyabu chuwüi tüle lai.
Otsingtsing e nang Khangkho Angaiüi
31Ija khoma Jisu chix to ongkyabu füi akax: “Hünzome ku kax ma janglax, otsingtsingsa ma hünzom a ku wangshembu changpu; 32hünzome otsingtsing awan ang kopüi, ilaxle ija otsingtsinge hünzom ang khangkho angai le faüi.”
33 #
Mat 3.9; Luk 3.8. Hwome chix kax to lan: “Kwom a Abraham susabu changle ilaxle kwom a owa da angchu achangle münngo. Jangchangba nange kwom khangkho angaile koxüile thüikya a chem hanpak?”
34Jisu-e hwom kax to lan: “Otsingtsingma kue hünzom ang thüipu, ochax lyenle ngokya mix a ochax da changpu; 35da tuita a hom ma othuithuima ngo angkya chichang; ikoxle Hosa a othuithuima ngo angkya changle. 36Hosae hünzom ang khangkho angai le jangfa daoba ija khangkho zangngai a othuithui hanpak ang changüi. 37Kue hünzom a Abraham susabu changpu le awanle; ibachu hünzome ku lang ang lompu; chemthüikoxle hünzom ma ku kax pongle kop angkya onui chitüi. 38Kue a, Apae ku hama aho daokya kax akaxpu, ija ningle hünzomechu ma hopa hwom makhange atatle laxkyakya mokpu.”
39Hwome chix kax to lanle thüi: “Abraham a kwom Hopa changpu.” Jisu-e hwom ang thüi: “Hünzom Abraham susabu hex thüikoxle Abrahame chem mokpuix ija mokse. 40Kue amokmok pangnu wüi, kue Zang tokhange atatkya otsingtsing bama hünzom hama apua ang mokpu; ikoxlechu hünzome ku lang ang azongpu. Ikoxle Abrahame ile chimok! 41Hünzome hünzom hopa mwot mokpu.”
Hwome chix ang thüi: “Kwom Hopa ang Zang tata wüi ilaxle kwom a chixsu chixsabu changpu.”
42Jisu-e hwom ang thüi: “Zang hünzom Hopa tsingtsing changkoxle, hünzome ku to mongkünse; chemthüikoxle ku a Zang tokhange nguikya mix tamchu athax ku ikhama ngopu, ija a ku küntsu monglua ma chichang. 43Hünzome ku kax büthüikoxle chitsing? Ija a hünzome ku kax apa ang mong chiadu thokya khoma changle. 44Hünzom a, hünzom hopa Bao (haxshix) makhange hüikya changpu. Hünzome hünzom hopa haxshix mongtex ma mokse tsule. Ami pongwang tokhange wüi chix a mix mik amütkya mix, ilaxle chix ma sukya chitüi koxle otuechu chixe otsingtsing chima chise. Chixe kaxthai akaxkya zuma, chixe chix jaopo ma chem tüipuix, ija mokpu; chemthüikoxle chix a thaikya mix tamchu thaikya hopa. 45Ikoxle kue otsingtsing akaxkya khoma hünzome ku to mong chiongpu. 46Hünzom kha angkya opupue ku a ochax mix tuita changpu le kaxkhi fa ang thoüi? Ile kue ostingtsing akax koxle, büthüikoxle hünzome ku to mong chiong? 47Zang tokhange hüikya mixe Zang Kax apaüi; bachutix hünzom a Zang tokhange hüikya chichangkya daile hünzome chiapa angkya jao.”
Jisu hia Abraham Nyi
48Chix kax to lanle Jehudi khünakbue thüi: “Nang a Samaria khünak, nang ma bao tüile le kwome ami wüi mathüi dai hia?”
49Jisu-e hwom kax to lan: “Ku ma bao müntüi; Ku a Apa thua zapu; ikoxle hünzome ku adapu. 50Kue ku chathua zakya münlom; ija lomkya tamchu kuchima sele kaxfün fakya mix tuita tüile. 51Otsingtsingma kue hünzom ang thüipu, ku kax ma laxle tüikya mix otuechu münzi toxüi.”
52Hwome chix ang thüi: “Athax kwome nang ma bao tüile le awanle laxdaoa! Abraham zipu ilaxle ajebuchu wüi zipu; ikoxle nange thüt tüi, nang hwon nwot kax ma laxkya mix a otuechu münzi. 53Kwom apa Abraham a zidaoa; chix füi nang wüi achongkya le texpia? Ajebuchu wüi zibakdaoa, ikoxle nang a nange owa le texpu?”
54Jisu-e hwom kax to lan: “Kue alüile ku achuakle jangchang, ija ku achuakkya chemchu münchang; ikoxle hünzome hünzom Zang changpu le thüikya Ku Apae ku fuazang ang tompu. 55Ikoxle hünzome chix otuechu chiawan, kue a chix awan ngopu; kue chix münawan le jangthüi: ku chuwüi hünzom ningle thaikya ang achangpu; ikoxlechu kue chix awanpu ilaxle chix kax ma laxle tüipu. 56Hünzom hopa Abrahame ku nguikya din ngünse le tüle thütkya; tamchu chixe ija ngünlaxle chix ang tüle mongmüi.”
57Hwome chix ang thüi: “Nang zanglao punyi bün ngaxchu mangui ikoxle nange Abraham ngündaoa leo?”
58Jisu-e hwom ang thüi: “Otsingtsingma kue hünzom ang thüipu, Abraham mapuxba wüi ku tüikya.”
59Ikhoma hwome long tswonlaxle chix to thup ang tung; ikoxle Jisu azwon ilaxle Zangshwom-Hom angkya laile pao.
Currently Selected:
JUHAN 8: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
