JUHAN 9
9
Jisu-e Nuput ma wüi Mik Aduakle puxkya Mix Amüi
1Chix le le ngopongma, pux pong tokhange wüi mik male puxkya mikduak sün tuita chixe ngün. 2Chix wangshembue chix ang thüi: “Ija mixsün mik chimüile pux angkya chixe achax pia hia honu hopa nyi ochax khoma changpuix?”
3Jisu-e lan: “Ija a ochax khomale münchang; tamchu honu hia hopa nyi ochaxchu münchang; ikoxle chix makhange Jowanpa mwottho kotok to ngaile aho angkya kuxmale changpu. 4Zangngai mik ma keme ku tsanle ajokya mix mwot mok angkya changpu; owaechu mok ang chithokya lima zangnaknu nguile ngole. 5#Mat 5.14; Jhn 8.12.Ku chaxwannu ma ngo tanto, ku a chaxwannu zangngai changle.”
6Chixe ija akax füima haxkha to thuak füi thuak; ilaxle ija thuak füi haxthom zing ilaxle ija füi ija mixsün mik to pale kox. 7Ilaxle chix ang thüi: “Paolax, ilaxle Silom tiküi ma thün tsuxlax.” (Ija mün a paolax le tsankya tha). Ifüima chixe pao üntoxle so, ifüima chixe ngünle chat.
8Chix tomzibu hia wanma chix jusax mix ang achangle ngokya ngündaokyabue thüi: “Ija mixsün a thung makhange jusax mix ang achangle ngokya mix münchang kox hia?”
9Mamabue thüi: “Ija a chix wüi changle.” Chatlechu mamabue thüi: “münchang, ikoxle ija mixsün a chix lailaikya owawa tüchangle.” Ikoxle chix tomtatae ija mix a chix wüi changpu le akax.
10Ikhoma hwome chix ang thüi: “Jangchangba nange büthüikya ma ngün ang koppu?”
11Chixe lan: “Jisu le amünkya mix e haxthom zinglaxle ku mik to pale koxpu, ija füi Silom tiküi to paolaxle solax le thüikya khoma paolaxle so koxle kue ngün ang kopkya changpu.”
12Hwome chix ma atüi: “Chix ojong to tüi?” Chixe lan: “Kue münawan.”
Farisibue ija Mik Amüikya bama Otua Lom
13Hwome mik male ngokya müikya mixsün farisibu hato apüi. 14Jisu-e haxthom zinglaxle ija mixsün mik daple koxkya a nazak nyix kha changkya. 15Farisibuechu chatle wüi, chixe chemle ngün ang kopüile atüi. Ilaxle chixe hwom ang thüi: “Chixe ku mik to haxthom füi pale koxpu, üntoxle kue ija sole awüt füima athaxpi kue ngün ang koppu.”
16Farisi kha angkya züizüie thüi: “Ija khünak a Zang tokhange nguikya münchang; chemthüikoxle chixe nazak nyix wanlom münto.” Ikoxlechu mamabue thüi: “Ochax khünak tuitae ija ningkya ohünotün mwot chemle mok ang thoüi?” Ile hwom khakha ma wüi kax ma alanle ahan.
17Ikhoma hwome tamchatlechu wüi ija mixsün ma atüi: “Nange thüile, chixe nang mik amüile fapu; jangchangba nange chix a owa le texpu?”
Chixe lan: “Chix a jepa tuita changle.”
18Ikoxle ija mixsün honu hia hopa hwom manyak tanto, chix to, chix mik a aduakle ngokya amüipu le pünpa-chongwangbue ongse chitsu. 19Ilaxle hwom ma atüi: “Ija a hünzome mik chimüi homle puxpu le thüikya hünsa changcha? Jangchangba athax chixe chemle ngün ang koppu?”
20Ikoxle honu hopa nyie thüi: “Chix a kukhie mik aduakle puxkya nao changpu le kukhie anapu. 21Athax chixe ngün ang kopkya bama kwome münawan. Chix mik daple koxkya mix kwome müntsing. Chixchu mixmüi ang achangünkya daile chixe lan ang thoüihex, chix ma wüi atüilax.” 22Honu hia hopa nyie ile thüikya a Jehudi nok pünpa-chongwangbu thua zakya kake thüipu; chemthüikoxle owawae “Chix Khrista changpu”, le tsaokya mix jangtüiba, ija khünak a sinagok angkya mün züt angkya zangwün tsuakle thomdaokya tüikya khoma; 23“Chix mixzya changpu, chix ma atüilax”, le lan.
24Ikhoma anaolechu wüi, mik aduakle ngokya müikya mixsün se ilaxle chix ma atüi: “Zang pomtho ma otsingtsing akaxüi le nange tsaodao! Nang mik amüile koxkya khünak a ochax khünak changpu le kwome awandaoa.”
25Ija koxle chixe lan: “Chix ochax khünak chichang changpuix ija kue müntsing; kue awankya a ija tuita wüi, ija a: Tam ku a mikduak mix changkya ikoxle athax a kue ngün ang kopüna.”
26Ikhoma hwome chix ma atüi: “Chixe nang to chem mokpu? Chixe nang mik chemle amüipu?”
27Chixe hwom kax to lan: “Kue hünzom füi akaxdaoa, ikoxle hünzome ku kax chiapa; ikoxle hünzome ija bama chatle apase le chemto tsukya? Hünzome chuwüi chix wangshembu ang achangse le hia?”
28Hwome chix to thuakzomle thüi: “Nang a chix füizuimix changpu, ikoxle kwom a Mosa füizuimix changpu. 29Zange Mosa füi zangwünkya changpu le kwome awanle; ikoxle ija khünak bama, chix ojong tokya nguipuix, ija ngaxchu kwome müntsing!”
30Ija mixsüne lan: “Müile, ikhama ohünotün tuita tüile, ija a hünzome chix ojong tokya hex ngaxchu chiawan, ikoxlechu chixe ku ang mik daple fapu. 31Zange ochax khünakbu kax ma münlaxle keme awan ngopu; ikoxle owae Zang chathua zale chix kax ma laxle mokpuix, ija khünak kax chixe apale. 32Puxpong tokhange wüi aduakle puxkya mik daple amüi puta lekya kax keme otuechu maatatkya changpu. 33Ija khünak Zang tokhange hüikya chichang thüikoxle chixe ile mok ang münthose!”
34Hwome lanle chix ang thüi: “Nang a abakle ochax ma puxpaile tsonglaxle kwom hama apua ano le hi?” Ile hwome chix sinagok angkya alai.
Chasa ma Miksut
35Hwome ija khünak jwonle apaodaoale Jisu-e atat ang kop; ilaxle chix atakkya zuma thüi: “Nange Khünak Hosa to mong ongcha?”
36Chixe lanle thüi: “Kue chix to ong angkya kuxma, chix a owa changpuix apuale fahüi.”
37Jisu-e chix ang thüi: “Nange chix ngündaoa; ilaxle chix a nang füi athax ile akax ngokyamix changpu.”
38Ija mixsüne lan: “Kue ongpu, Jowanpa.” Ilaxle chixe Jisu shwom.
39Jisu-e chix ang thüi: “Mike chingünkyabu ang ngün ang tom ang ikoxle mike ngünle ngokyabu ang apwom ang tom angkya kuxmale ku Ija chaxwannu to nguipu.”
40Chix füi tomle ngokya farisibue ija zangwün atatlaxle chix ma atüi: “Kwom ang miksut changpu le thüikya kax ning münchang hexnyi?”
41Jisu-e hwom ang thüi: “Hünzom miksut jangchang thüikoxle, hünzom ma ochax müntüise; ikoxle hünzome ‘Kwome ngünle’ le thüikya khoma hünzom a ochax ma ngoüna.”
Currently Selected:
JUHAN 9: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
