NASEPTE 10
10
Kornelia in Peter ahansah
1Kaisaria khuo ah amin Kornelia kichi mi khat a um a, Itali pawl achi ua galkap zahoutu. 2Pasian ngaisahmi ahia, a innkuonpite zousie toh Pasian giing mi ahi ua, mite kungah kiphal tahin hepina silpieh ape leeng hi, tualeh Pasian kungah zong thu angen ngitnget hi. 3Nitah lam khat, nai thum ding velin mengmuna kichientahin, Pasian vansawlsieng khat akunga hing lut a, “Kornelia,” chiin amu hi.
4Kornelia in ama a en a, azauta a, “Bang ahiei Mangpa?” achi hi. Tuachi’n vansawlsiengin akungah “Na thungetnate leh na sil piehte theizing dingin Pasian masang ah ahing tungtouta hi. 5Tuin Joppa khuo ah mi sawl inlen, Simon Peter va han sah in. 6Ama tuipi gei a um, savun bawlpa Simon inn a tung ahi; aman na bawl ding ahing hil ding hi,” achi hi. 7Tualeh Kornelia houpi vansawlsieng khu apeizou tahin, Kornelia in ainnsunga nasem asuohte ni leh ama venga umte lah akipat Pasian adinga kipumpieh galkap khat ahan a; 8Amaute kunga thu umdan teng ahilchien zou in Joppa khuo ah asawlta hi.
Peter in van akipata bawm hing kikhai suh a muna
9Azing ni a apei lai un, tualeh khopi atunding kuon un, Peter khu thungen dingin inntung ah akaltou a, sun nai sawmleni hun vel ahi a; 10Peter agil ahing kiel a, bang ahiei khat neh a ut hi; hinanleh neh ding abawl lai un, mengmu bangin ahing um a, 11Tualeh van ahing kihonga, bang ahiei puon bawm lientah bang, aningli a kikhi a leitunga hing kikhaikhesuh amu hi. 12Tua bawm sungah, leitunga kengli nei ganhing namkim, gamsate leh ganhing bohvahte leh tungleeng vate a um hi. 13Tualeh aw khat in akungah, “Peter thou inlen, gou inlen ne in,” achi hi. 14Hinanleh Peter in, “Hilou e, Mangpa; Ken asienglou leh abua mawngmawng bangma ka ne ngai sih hi.” 15Tualeh aw in ani veina dingin ama ahoupi a, “Pasian in asuhsiengthousa, nang sienglou na chi teitei ding ahi sih,” achi hi. 16Tuabangin thumvei ahing um a, tuachi’n bawm khu van ah akilatou kiata hi.#Peter mengmuna pen sa siengleh sienglou genna hilou in, Gospel pen in Judate leh Jentelte akhen sih a michin a ding ahi, china ahi.
17Peter in tam amengmu khu bang genna adiei chia lamdangsa kawm a angaituo buoi laiin, Ngai vawi, Kornelia mi sawlten, Simon inn akandohta ua, kotkhah bul ah ading uhi. 18Tualeh amauten ahan ua, Simon amin khem Peter kichipa tuana atun leh tunlou ana dong uhi. 19Peter in mengmuna asil mu khu, angaituo tuo laiin Hagau in akungah, “Ngai in, mi thum in ahing sui uhi. 20Tuaziehin thou inlen, kumsuh inlen, bangma ginglel louin amaute zui in, amaute keima hing sawl ahi uh,” achi hi. 21Tuachi’n Peter khu Kornelia hing sawl mite kungah apeisuh a, akung uah, “Na mi suipa uh Keima ka hi, nang peina uh azieh bang ahiei?” achi hi.
22Tualeh amaun galkap zahoutupa “Kornelia midihtat Pasian zaudan siem mi Juda nam zousiete lah a minphatna neipa kungah, Pasian akipat vansawlsieng khat in ama ahoupi a, ama inn a haw dinga nang hing hansah ding leh na thugen ngaikhe dingin ahil hi,” achi uhi. 23Tuachi’n amaute ahanlut a, agieh sahta hi. Tualeh azingni in, Peter amaute toh azawhkhawma, tualeh Joppa khuo a unau koite ahiei in zong ama azui uhi.
Kornelia inn ah Peter
24Tualeh athai ni in Kaisaria khuo ahing tungta uhi. Tualeh Kornelia in amaute ana ngah a, ahieng asante leh alawm aguol ngaite ana hankhawm hi. 25Peter ahing lut kuon in, Kornelia in ana vaidawn a, akengbul ah khupboh in Pasian bieh bangin ana bie hi. 26Hinanleh Peter in ama akaithou a, “Dingin, kei zong mihing ka hi,” achi hi. 27Tualeh Peter ama toh kihoulim kawm in inn sungah alut a, mi tampi um khawm amuta hi. 28Tuachi’n amaute kungah, “Juda mi adingin nam dangte toh kipawl a, kive tuo asieng sih chi na theisa uh ahi. Hinanleh mi koima asienglou leh abua ka chi ding ahi sih chi, Pasian in ahing theisah hi. 29Tuazieh in na hing hat tahun niel sese louin ka hing pei pai hi, tuin na hing hatna zieh uh bang ahiei? chi ka hing dong ahi,” achi hi.
30Tuachi’n Kornelia in, “Ni li peita in, tu bang hun in ka inn sungah ann ka ngawl a, nitah lam nai thum hun vel in thu ka ngen a, tualeh Ngai vawi, mi khat puonvam silin ka masangah ahing ding hi. 31Kornelia na thungetna zahin a umta, na hepina silpiehte zong Pasian in athei ngitnget hi. 32Tuaziehin Joppa khuo ah mi sawl inlen, Simon Peter kichipa han sahin Ama tuipi gei a teng savun bawlpa Simon inn a tung a hi. Ama ahing tun chiengin, na kungah thu agen ding hi, achi hi. 33Tuaziehin na kungah mi ka hing sawl pai hi, na hing pei ahoi ahi. Tuaziehin tuin Pasian in na kunga ahing thupieh zousie ngai dingin, Pasian mai ah ka unpi un tanah ka um uhi.
Kornelia inn a Peter thugen
34 #
Danp. 10.17
Tuachi’n Peter in thu agen a, “Pasian in mi deisah tuom anei sih, chi dihtahin ka theita hi.” 35Hinanleh namchin lah a Ama giing a, dihtattah a gamta pouma Ama dingin pomtah ahi. 36Pasian in Israel tate kunga, a thu vaihah, Jesu Khrist tungtawna lungmuonna thu agen khu. Jesu khu mi zousie Mangpa ahi. 37Tua thu khu, Johan in atangkoupi baptisma nua in, Galili gam akipat in ahing thang pan a, Judia gam zousie ah athang suoh a; 38Pasian in Hagau Siengthou leh silbawltheina toh Nazareth Jesu sathau anu dan, Pasian in a umpi ziehin ama silhoi bawlin leh dawiin asuhgenthei zousie damsahin apei kawi hi chi nouten na thei uhi. 39Tualeh Judate gam leh Jerusalem khuo a, asil bawl zousie theipite ka hi uhi, Judaten singdawn ah Ama akhai ua athatta uhi. 40Ama khu Pasian in nithum niin akaithou kia a, mite mu dingin chientah in akilang sah hi. 41Mi zousie kungah hilou in, Pasian in theipimi hi ding a atel koute kungah, akilah hi. Koute pen mishi lah a athawkia nua a, ama toh nekhawm a, dawnkhawmte ka hi uhi. 42Tualeh Ama khu mihing leh mishite tunga thukhen dinga Pasian guot ahi chi, mite kunga tangkoupi ding leh theisah dingin Pasian in koute thu ahing pie hi. 43Koipou Ama gingta ten Ama min ziehin khelnate ngaidamna amu ding uh, chi guolnei zousie’n ana theisah sa uh ahi,” achi hi.
Jentelte tunga Hagau Siengthou tunna
44Peter in tam thute agen laitahin, athu za zousie tungah Hagau Siengthou ahing tungta hi. 45Tualeh Peter hing zui teptante lah a gingtuten, Jentelte tung nangawn a Hagau Siengthou silthawnpieh sunbuoh a um amu tah un lamdang asa mama uhi. 46Aziehpen amaute ham tuom tuom a ham a, Pasian phat in azata uhi. Tuachi’n Peter in, 47“Tam mite eima tan bangbang Hagau Siengthou tang mite tui a baptisma tan ding koi in akham thei diei?” achi hi. 48Tuachi’n Mangpa min a baptisma tang dingin amaute thu apie hi. Tuachi’n amauten ni tamlou sung tam tadi nalai dingin ama ahouta uhi.
Currently Selected:
NASEPTE 10: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
