NASEPTE 9
9
Saul pienthana
1Tuachi’n Saul in Mangpa nuazuite a vau thu leh tha atup thu genkhe kawmin, siempu lien kungah ava pei a, 2Tualeh Damaska khuo a kikhopna innte a pieh ding leh tami lampi zui#Tami lampi zui pouma Khristian pouma, china ahi. pouma pasal hi in numei hitaleh amumu hensa a Jerusalem khuo a ahing pui theina ding lai angen hi. 3Tualeh azinkhie a, Damaska khuo atun kuon tahin, thakhat in van akipat in vah akimah ahing taang suat hi. 4Tuachi’n leiah apua a “Saul, Saul, nang bang dinga kei na hing bawlsiet ahiei?” chiin aw khat aza hi.
5Tualeh aman “Mangpa koi na hiei?” achi hi. Tuachi’n “Mangpa’n adawnga, na bawlsietpa Jesu ka hi, kilna sia zum peh khu nanga ding in ahasa hi, #Kilna siazum peh khu nanga dingin ahasa hi. Chi khu KJV lou Laisiengthou dangte ah um sih hi. achi hi. 6Tuachi’n aman chitun kawm leh lamdangsa tahin, Mangpa bang bawl dingin na hing dei ei? achi hi. Tualeh Mangpa’n akungah, Thou inlen khopi sungah lut in, tuachi’n na bawl ding hilin na um ding,” achi hi. 7Tualeh ama toh zin khawmte khu gen ding thei louin ading den ua, aw ging pen aza ua, hinanleh koima amu sih uhi. 8Tuachi’n Saul khu leilah a kipat in athou a, amit aha leh Koima amu theisih hi. Hinanleh akhut in akai ua, Damaska khopi sungah apuilutta uhi. 9Tuachi’n ni thum sung khomulouin a um a, bangma ne lou, bangma dawn louin a um hi.
Saul hagau a adimna
10Damaska khuo ah nuazui khat a um a, amin Anania ahi, tualeh Mangpa’n mengmuna a kilahin akungah, “Anania,” achi a, tualeh aman “Mangpa tanah ka um hi,” achi hi. 11Tuachi’n Mangpa’n akungah, “Kisa inlen gawlzing tang achi uah pei inlen, Juda inn a um, Tarsas kho mi, amin Saul kichipa va kandoh in, Ngai vawi, athunget laitah ahi. 12Tualeh manglam bangin, mi khat amin Anania kichi hing lut a, akhomu theina dinga atunga khut ngain amuta hi,” achi hi.
13Tuachi’n Anania in adawnga, “Mangpa tam mipa tungtang thu leh Jerusalem khuo a na misiengthoute tung a atatsiet dante mi tampi gen ka na zata hi. 14Tualeh tanah zong, Na min loute zousie mat a henna dingin siempu liente akipat in thuneina tawi a hing pei ahi,” achi hi. 15Hinanleh Mangpa’n Anania kungah, “Ama Jentelte, leengte leh Israel tate kunga ka min polut dinga ka belguot ahi ziehin na va haw ding ahi. 16Aziehpen ka min zieh a gentheina bangzata thuoh ding ahiei chi ama ka theisah ding hi,” achi hi.
17Tuachi’n Anania ava pei a, inn ah alut a, atunga khut ngain, “Sanggampa Saul, na mit vahna ding leh Hagau Siengthou a na dim theina dingin, Mangpa na hing peina lampi a na kunga kilahpa Jesu ngel in a hing sawl ahi,” achi hi. 18Tualeh thakhat in amit apat in alip bang khat ahing kesuh a, khuo amu theita a, tuachi’n athoua baptisma atangta hi. 19Tualeh ann ane a, atha ahatta hi. Tuachi’n Saul khu Damaska khuo a nuazui umte kungah ni tam kuomtah atam hi.
Saul in Damaska khuo ah Khrist atangkoupi
20Aman kikhopna innte ah, “Jesu Pasian Tapa” ahidan thu atangkoupi pai ngal hi. 21Tuachi’n ama thugen za zousiein lamdang asa mama ua, “Tam mipa Jerusalem khuo a Jesu min loute tunga tatsepa hilou amah, tualeh tuabang mite man a hensa a siempu liente kunga pui tum a tam mun a hing pei hilou amah?” achi uhi. 22Hinanleh Saul khu ahing hat semsem a, tam Jesu khu Khrist ahi chi ahilchien a, Damaska khuo a Juda umte gen ding theilouin akoi hi. 23#2 Kor. 11.32,33Ni tampi nuain Judaten ama tha ding thu akidapkup uhi. 24Hinanleh Saul in asiltup uh ana thei hi. Tualeh amauten ama tha tumin khopi kotpi tengah sun leh zanin abuh uhi. 25Tuachi’n nuazuiten ama azawpi ua zanlai in kulbang tunga kipat bawm lienpi khat in akhaikhe suh ta uhi.
Saul Jerusalem leh Tarsas khuo ah
26Tualeh Saul Jerusalem a ahing tuntahin nuazuite lah ah tel asawm a, hinanleh amaun nuazui khat hi tahtah dinga agintat lou zieh un, abawn un agiing chiet uhi. 27Hinanleh Barnaba in ama azawpi a sawltahte kungah apeipi hi, Lampi a Mangpa amu dan leh Mangpa’n ama ahoupi dante, tualeh Damaska khuo a Jesu min a hangsantah a thu agen dante, amaute kungah agenta hi. 28Tuachi’n Saul zong Jerusalem khuo ah, lut zel pawt zelin amaute toh a umkhawmta hi. 29Mangpa Jesu min in hangsan tahin thu agen a, tualeh Greek ham zang Judate akinielpi hi, hinanleh amaun ama tha atum uhi. 30Tua thu unauten athei tahun, Kaisaria khuo ah apui suh ua, Tarsas khuo ah asawldohta uhi. 31Tuachi’n hattuomte khu Judia gam, Galili gam leh Samaria gam zousie ah muonna anga ua, adet deu deu uhi. Tualeh Mangpa zaudan siem in, Hagau Siengthou hamuonin a um ua, ahing pung deudeuta uhi.
Lidda khuo ah Peter in Ainia asuhdamna
32Tuin tambang ahing hi a, Peter khu gingtute lah ah avah kawikawi a, Lidda khuo a misiengthou umte kungah zong apei suh hi. 33Khunah aman amin Ainia kichi mi khat azenga, kum giet lupna a lumden amu hi. 34Tualeh Peter in akungah, “Ainia Jesu Khrist in ahing damsah hi; thou inlen, na netpha ziel in” achi hi. Tuachi’n ama athou pai hi. 35Tuachi’n Lidda leh Sharon phaijanga tengte zousie in ama amu ua, Mangpa lam angata uhi.
Peter in Joppa khuoah Dorkas akaithou
36Joppa khuo ah amin Tabitha kichi nuazui khat a um hi. Tabitha min akhiehna Dorkas ahi. Tam numei pen nna hoi sem leh hepina silbawl ahau mama hi. 37Hinanleh khum hun laiin, ahing china a, ashita hi, aluong asil zou un, inndan tungnungah asiel uhi. 38Tualeh Lidda khuo khu Joppa khuo toh kinai ahi a, nuazuiten Lidda khuo ah Peter a um chi athei ua, sawt hallou a akung ua “Hing pei pai dinga va gen dingin mi ni asawl uhi.” 39Tuachi’n Peter adingdoh a amautegel toh akizawh khawmta uhi. Ahing tun tahin ama khu inndan tungnung ah apuitou ua, tualeh meithaite zousie Peter kungah dingin akap ua, Dorkas in adam lai a amaute a dinga puonah leh puon abawlpiehte alah uhi. 40Hinanleh Peter in amaute zousie apawtsah a, akhupdin a, thu angenta hi, tualeh mishi luong lam ngain “Tabitha thou in” achi hi. Tualeh amanu amit ahing hah a, Peter amu tahin ahing touta hi. 41Tuachi’n Peter in akhut ahah a, akaithouta hi, tualeh misiengthoute leh meithaite ahan a, hingdam in apeta hi. 42Tualeh tua thu Joppa khuo a mi zousie in athei ua, mi tampi in Mangpa agingta ta uhi. 43Tuachi’n Peter Joppa khuo a Savun bawlpa Simon inn ah ni tampi atamta hi.
Currently Selected:
NASEPTE 9: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
