NASEPTE 8
8
Khristiante suhgentheina leh adalzahna uh
1Tualeh Saul in zong Stephen shi khu pha asahpi hi. Tua hun laiin Jerusalem khuo a hattuom umte, nasatahin abawlgenthei panta ua, sawltahte chiloungal Judia leh Samaria gamte ah akithezah siengta uhi. 2Pasian a mi kipezou koite ahiei in Stephen avui ua, nahpitahin akap uhi. 3#Nasep. 22.4,5; 26.9-11Hinanleh Saul in hattuom pawlte asugenthei mama a, innchin ah alut a, numei pasal akaidoh a, suongkul ah akhum zel hi. 4Tuachi’n akithezahte khu khochin ah apei ua thu agenta uhi.
Samaria gam a Philip nasep
5Tuachi’n Philip khu Samaria khopi ah apeisuh a, akung uah Khrist thu agenta hi. 6Mipi tampi in Philip thugen aza ua; chiemtena lamdang abawlte amu ua, lungsim munkhat puoin, angaikhie uhi. 7Dawibuate aw ngaitah a kikouin mi tampi amatte sunga kipat in ahing pawt ua, tualeh zeng leh Kengbai tampi zong adam uhi. 8Tualeh tua khopi ah lungnopna thupitah aumta hi.
Dawisiem Simon
9Hinanleh amin Simon kichi mi khat a um a, ama’n milien ka hi chiin tumasang lamin tua khopi ah mitphieldawi zangin Samaria mite lamdangsatahin ana koi leng hi. 10Mi zousie aneupen apat alienpen tandongin, “Tam mipa Pasian silbawltheina thupi ahi,” achi uhi. 11Aman mitphieldawi zang a hun sawtpi lamdangsataha ana koitah ziehin athu angaisah uhi. 12Hinanleh Philip in Pasian leenggam thu leh Jesu Khrist min agen khu, agintat tahun numei leh pasalten baptisma atangta uhi. 13Tuachi’n Simon nangawnin zong agingta a, baptisma atan nuain Philip kungah a umden a, sillamdang leh chiemtena kibawlte mu in lamdang asa thei mama hi.
Peter leh Johan Samaria gamah
14Tuachi’n Jerusalem khuo a um sawltahten Samariten Pasian thu a awita uh chi azah tah un akung uah Peter leh Johan asawl uhi. 15Amautegel Samaria ava tunsuh tahun, Hagau Siengthou atan theina dingun thungetna anei pieh uhi. 16Aziehpen amaute lah a koima tungah Hagau Siengthou atung nai sih hi. Mangpa Jesu min a baptisma tang ahi bou uhi. 17Tuachi’n Peter leh Johan in atung uah akhut uh anga ua, Hagau Siengthou atangta uhi. 18Tualeh Simon in sawltahte khut ngah zieh a, Hagau Siengthou kipie ahi chi amu in; 19“Tambanga thuneina kei zong hing pie un, koi tungah zong khut ka ngahna pouin, Hagau Siengthou atan theina dingun, chiin sum pieh asawmta hi.”
20Hinanleh Peter in akungah, “Pasian silpieh dangka sum a lei na tup zieh in, na sum nangma toh mangkhawm heh. 21Pasian mitmu a na lungtang adihlou ziehin, tam thu ah panna na nei sih a, tan zong na nei sih hi. 22Tuaziehin tam gitlouna kisia inlen, Pasian kungah thungen in, tuachi’n na lungtanga na ngaituote ahing ngaidam kha maw sih ding hi. 23Aziehpen khatna sinkha leh gitlouna khainienga kankhawm na hi chi ka mu hi,” achi hi. 24Tuachi’n Simon in adawnga, “Na sil gente uh ka tunga bangma atun louna dingin, nouman Mangpa kung ah thu hing ngetpieh un,” achi hi. 25Tuachi a, Peter leh Johan in theipina thu leh Mangpa thu agen zou un, Jerusalem khuo ah apei kiata ua, lampi ah Samaria gam a khuo tampi ah, khantanhoi agen kawm zel uhi.
Phillip leh Ethiopia mi sumkempa
26Mangpa vansawlsieng khat in Philip ahoupi a, “Thou inlen simlam a, Jerusalem khuo akipat Gaza zotna lampi ah pei inlen, tua lampi khu gamdai tawnsuh peh ahi,” achi hi. 27Tuachi’n Philip athou a apeita hi. Tualeh Ngai vawi, Ethiopia mi khat, Ethiopia leengnu Kandaki nuoi a michilge thunei lientah agou zousie kempa ahia, Jerusalem khuo a Pasian be dinga va haw ahi. 28Apeikia lamin a sakolleng a toukawmin guolnei Isai laibu asim hi. 29Tuachi’n, Hagau in Philip kungah “Va pei inlen tua sakolleng va nai inlen,” kithuopi in achi hi. 30Tuachi’n Philip khu akungah ava tai a, guolnei Isai laibu asim azata a, Philip in akungah, “Na laisim na theisiem ei?” achi hi.
31Tualeh Ethiopia mipa’n “Koima hilchet louin bang kachi theisiem diei?” achi hi. Tualeh Philip a kaltou a akunga tou dingin achiel hi. 32#Isai. 53.7,8Laisiengthou asimna mun khu tami ahi:
“Tha ding Belam kipeipi bangin,
ama apeipi ua,
Tualeh belamnou amulmette mai a,
asip khinkhian bangin,
Aman akam zong akeeh sih hi.
33Akingiemkhieh laiin,
Atunga thudih genna lahmang ahi a,
Ahahlesuonte tanchin koiin ahing gen diei?
Leitung a kipat ahinna lahpieh ahi ngal a,”
chi khu ahi.
34Tuachi’n michilge in Philip ahoupi a, akungah “Tam thu guolneiin koi tungthu agenna ahiei? ama tungthu ahiei, ahisihleh midang khat tungthu?” ka hing dong ahi, achi hi. 35Tuachi’n Philip in akam akaah a, tua Laisiengthou apat in akungah Jesu tangthupha ahilta hi. 36Tuabanga lampi a apei suh lai un, tui umna mun khat ahing tung ua, michilgein “En vawi, tanah tui a um hi, baptisma ka tanna ding bangin ahing dal ei?” achi hi. 37Tuachi’n Philip in “Na lungtang zousie a na gintat leh na tang thei hi.” Tualeh aman adawnga, “Jesu Khrist khu Pasian Tapa ahi chi ka gingta hi,” achi hi.#5.37 = pen KJV chilou Laisiengthou dangte ah a um sih hi. 38Tuachi’n a sakolleng khawldingin thu apie a, Philip leh michilge ani un tui sung ah apei suh ua, Philip in ama abaptista hi. 39Amautegel tui akipat ahing peitou tahun, Mangpa Hagau in Philip alamangta a, michilgein ama amu nawn sih hi, tualeh michilge khu lampi ah nuomsa tahin apeita hi. 40Hinanleh Philip pen Azotus khuo ah amu uhi, tualeh aman Kaisaria khuo atun masangsie in apeina khochin ah khantanhoi thupha agenta hi.
Currently Selected:
NASEPTE 8: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
