NASEPTE 7
7
Vaihawmna masanga Stephen thugen
1Tuachi’n siempu lien in, “Tam thute adih ahina amah?” achi hi. 2#Siem. 12.1Tualeh Stephen in unaute leh pate aw, “Ngai un, ipu uh Abraham, Haran khuo a aum masanga Mesapotamia gam a a um lai in, thupina Pasian khu akungah ahing kilah a, 3Akungah na gam leh na innkuonpite lah a kipat hing peidoh inlen, keiman ka hing etsah ding gam ah hing pei in achi hi. 4#Siem. 11.31; Siem. 12.4Tuachi’n ama Kaldaite gam a kipat apeidoh a, Haran ah atengta hi. Tualeh apa shi nuain, Pasian in khuna pat in, tu a na tenna gam uah ahing pemlut sahta hi. 5#Siem. 12.7; 13.15; 15.18; 17.8Tualeh tam gam ah Pasian in ama mun luo ding ape sih a, akeng tatna ding khop nangawn ape sih hi. Hinanleh Abraham in ta aneilou lai nangawnin, Pasian in ama goutan ding leh anua a ahah asuonte goutan dingin pieh achiem hi. 6#Siem. 15.13,14Tualeh Pasian in tambangin agen hi, ahah asuonte mi gam ah atam ding ua, suohin akhawi ding ua, kum zali sung asugenthei ding uhi. 7#Pawt. 3.12Tualeh Pasian in, suoh a aumna ding uh nam khu keiman ka gawt dinga, tuazou chiengin ahing pawlkhe ding ua, tam mun ah ka nna asem ding uh, achi hi. 8#Siem. 17.10-14; Siem. 21.2-4; Siem. 25.26; Siem. 29.31—35.18Tuachi’n Pasian in akungah, teptan thuhun apie hi, tuachi’n Abraham in Isaak ahinga ani giet ni in atep atan hi; tuachi’n Isaak in Jakob ahing a, Jakob in chi suong mi sawm leh nite ahing hi.
9 #
Siem. 37.11; Siem. 37.28; Siem. 39.2,21 “Tualeh chi suong miten thangsietna a hing nei ua, Joseph khu Izipt gam ah azuata uhi. Hinanleh Pasian in Joseph a umpi a; 10#Siem. 41.39-41Agentheina zousie apat ahunkhe zel a, Izipt leengpa Pharaoh mitmu ah deisahna leh pilna apie a, tuachi’n ama khu Izipt gam leh a inn sung mite tungah uhpipa in abawl hi. 11#Siem. 42.1,2Tuachi’n Izipt gam pumpi leh Kanaan gam ah kiel ahing tunga, gimthuohna nasatah ahing umta a, ipu ipate un neh ding mawngmawng amuta sih uhi. 12Hinanleh Jakob in Izipt gam ah bu a um chi azahtah in ipute uh asawldoh a, tuakhu apei masahna pen uh ahi. 13#Siem. 45.1; Siem. 45.16Tualeh anivei peina uah, Joseph in asanggamte akitheisah a, tualeh Joseph sanggamte khu Pharaoh atheisahta uhi. 14#Siem. 45.9,10,17,18; Siem. 46.27Tuachi’n Joseph in apa Jakob leh a innkuonte han dingin mi a sawl a, tualeh a innkuonte abawn un sawmsagi leh nga, ahi uhi. 15#Siem. 46.1-7; Siem. 49.33Tuachi’n Jakob khu Izipt gam ah apeisuh a, tualeh ama leh ipute uh ashita ua, 16#Siem. 23.3-16; 33.19; 50.7-13; Josh. 24.32Aluonguh Sekem khuo ah apotung ua Abraham in Sekem khuo a, Hamor tapate kunga dangka sum a alei, han ah avuita uhi.
17 #
Pawt. 1.7,8 “Hinanleh Pasian in Abraham kunga athuchiem atangtunna hun ahing naitahin Izipt gam a imite ahing pung ua, atam deu deu ta ua. 18Joseph thei kha lou leeng dang ahing um masangsie in. 19#Pawt. 1.10,11; Pawt. 1.22Tua leengpa’n imite aze bawl a, ipu ipate uh abawlgenthei a, atangehte uh hing lou dingin apaidoh sah zel hi. 20#Pawt. 2.2Tua hun lai in Mosi apieng a, amel hoi mama a, apa inn sungah ha thum akem uhi. 21#Pawt. 2.3-10Ama akoidoh tah un, Pharaoh tanu in ala a, ama tapa dingin akemta hi. 22Mosi in Izipt mite pilna zousie azil a, tuachi’n thugen leh silbawl ah, athupi mama hi.
23 #
Pawt. 2.11-15
“Mosi kum sawmli ahing chin tahin, a unau Israelte ve utna lungsim anei hi. 24Tuabanga ava ve lai in, alah ua mi khat dihloutah a suhgenthei a um amu a, ava hun a, suhgenthei a umpa phuba alah pieh a, Izipt mi khu asatlum ta hi. 25Aziehpen ama’n ama khut a Pasian in a unaute hundoh ding ahi, chi amaun thei ding asa a, hinanleh amaun athei sih uhi. 26Azing niin Mosi in Israelmi ni kihau laitah atuohkha a, lawmte aw, unau khat na ve uo le, bangdinga dihloutah a kibawl na hi uoi? chiin lep ava sawm hi. 27Hinanleh a innvengpa tunga silgilou bawl zawpa’n Mosi asawndoh a, Koute tunga vaihawm ding leh thukhen dinga nang koiin ahing guot ahiei? 28Zanni a Izipt mi na tha banga, hing tha sawm na hiei mah? achi hi. 29#Pawt. 18.3,4Tuachi’n tam thu ziehin Mosi ataimangta a, Midian gam ah khuolzin mi bangin ava tamta hi, Tuanah tapa ni ava nei hi.
30 #
Pawt. 3.1-10
“Tualeh kum sawmli abei nuain, Sinai muol gamdai ah vansawlsieng khat sawlbawh meikuong in akungah ava kilah hi. 31Mosi in tuakhu amu tahin, asilmu khu lamdang asa mama a, en dinga ava nai lai in, Mangpa aw in akungah, 32Kei na pu napate Pasian, Abraham Pasian, Isaak Pasian leh Jakob Pasian, ka hi, achi hi. Tuachi’n Mosi achitun a, a en ngamta sih hi. 33Tuachi’n Mangpa’n akungah, na keng apat na kengdap sut in, na dinna mun lei siengthou ahi. 34Izipt gam a um ka mite kibawlgenthei dan chientah in ka mu zing a, athum leh maunate u’zong ka zata a, amauh hunkhe dinga, hing peisuh ka hi. Kisa in Izipt gam ah ka hing sawl ding, achi hi.
35 #
Pawt. 2.14
“Tami Mosi khu ahi, koute tunga vaihawm ding leh thukhen dinga nang koi hing guot a hiei? chia a nuolpa uh, sawlbawh lah a akunga hing kilah vansawlsieng khut in, Pasian in ama ngel khu vaihawmpa leh hunkhepa hikhawm dingin asawlta hi. 36#Pawt. 7.3; Pawt. 14.21; Kisim. 14.33Mosi in Izipt gam a tuipisan leh gamdai ah kum sawmli sung sillamdang leh chiemtenate abawl nuain amauh apuidohta hi. 37#Danp. 18.15,18Israel tate kunga, Mangpa na Pasian un na unaute lah a kipat in Keima bangbang guolnei khat noute adingin ahing piengsah dinga, Ama thu na ngaikhe ding uhi, chipa khu tam Mosi ahi. 38#Pawt. 19.1—20.17; Danp. 5.1-33Gamdai a hattuomte lah a umpa, Sinai muol tunga vansawlsiengin ahoupipa leh ipu ipate kunga umpa, eite kunga piehsawn ding a thu hingte lapa khu tam Mosi mama ahi.
39I ipu ipaten athu azui ut sih ua, anuol ua, tualeh Izipt gam alunggul kia uhi. 40#Pawt. 32.1Amauten Aaron kungah, hing pui dingin pasiente hing bawlpiehin, Izipt gam a kipat a hing puidohpa Mosi lah atanchin ka thei nawn sih uhi, achi uhi. 41#Pawt. 32.2-6Tua hun lai mama in bawngnou lim akibawl ua, tua bawngnou lim ah kithoinate alan ua, amauh khut suohte tungah anuom ua, alungdamta uhi. 42#Amos. 5.25-27Tuachi’n Pasian in amaute akiheisan a van a aasite be dingin aleengatsanta hi. Guolneite laibu ah tambangin akigiel hi.
Aw Israel innkuonte,
gamdai ah kum sawmli sungin,
gantate that in kithoinate leh sillatte,
na hing lan ngai uh amah?
43Molek#Molek-Ammon mi milim pasien min khat ahi. biehbuh (puon inn) leh na Pasian uh
Remphan ahsi bieh dinga alim na kibawlte uh,
na zawng kawi kawi zaw uhi.
Tuaziehin ken noute Babilon,
khuohen lam ah sal taang dingin,
ka hing puimang ding hi.
44 #
Pawt. 25.9,40 “Ipu ipate un gamdai ah Theipina biehbuh anei uhi. Tuakhu Pasian in Mosi ahil bangbang leh ette ding a alim leh guong amu banga kibawl ahi. 45#Josh. 3.14-17Tuami biehbuh mama khu ipu ipate hahlesuonten aneiden ua, Joshua lamkaina nuoi ah Jentelte gam ah ahing polut uhi. Pasian in ipu ipate mai ah, tua Jentelte anawtdoh a, David khang dongin tua biehbuh azang uhi. 46#2 Sam. 7.1-16; 1 Khang. 17.1-14Tua David in Pasian mitmuin deisahna anga a, Jakob Pasian tenna ding biehbuh bawlpieh ding angen hi. 47#1 Leeng. 6.1-38; 2 Khang. 3.1-17Hinanleh Solomon in tua inn alam zawta hi.
48Ahivang in Tungnungpen khu khuta kilam innte ah ateng sih hi; Guolnei in:
49 #
Isai. 66.1,2 Van ka toupha ahia,
leitung ka keng ngapna ahi a,
Inn bangchibang na hing bawlpieh ding uoi?
Mangpa’n achi hi,
ahisihleh ka khawlna mun zong bang ahiei?
50Tam silte zousie ka khutin abawl hilou amah?
chia ana gen bangin.
51 #
Isai. 63.10
“Nou milungphengte leh genha, lungtang leh bil vuloute aw, na pu napate uh bawl bangin Hagau Siengthou na doudal ngitnget uhi. 52Na pu napate un guolneite laha koi ahiei abawlgenthei uh? Mi dihtahpa hing pei ding thu genlawhte athat ua, tua mi dihtahpa mansahte leh thatte khu noute mama na hi uhi. 53Vansawlsiengte pieh sawn dan munapi a, zui loute aw,” achi hi.
Stephen shina
54Tam thute azah tah un, asintang uh akhoita a, Stephen khu ahagiel khumta uhi. 55Hinanleh ama pen Hagau Siengthoua dimin, van lam a en a, Pasian thupina leh Pasian zietlam a Jesu ding amu hi. 56“Ngai un, van kihongsa ka mu a, Pasian zietlam a Mihing Tapa ding zong ka mu hi,” achi hi. 57Tuachi’n amaute Aw ngaitah in akikou ua, abil uh ahum ua, kithutuoh tahin apangkhawm ua, anot ua; 58khuo apat in adeldoh ua, suongin asep ua, tualeh atheipimite’n tangval khat amin Saul kengbul ah apuonte uh akoi uhi. 59Tualeh, Stephen in, “Mangpa Jesu ka hagau na sangin chia ahat laiin suongin asep uhi.” 60Tuachi’n akhupdin a, aw ngaitahin akikou a, “Mangpa tam akhelnate uah, amaute mawpai sin,” achi a, achi zouin a imuta hi.
Currently Selected:
NASEPTE 7: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
