JOHAN 10
10
Belam chingpa hoi
1“Chitahtahin ka hing hil ahi, koipou kotpi a lut lou a lam tuom a kal a belam huonga lut khu guta leh suomhat ahi. 2Hinanleh koipou kotpi alut khu belampu ahi. 3Ama khu kotpi vengpa’n ana honpieh a, belamten a aw aza uhi, tualeh aman abelam khu amin un ahan a, amauh apuidoh zel hi. 4Tualeh ama’n abelamte apuidoh chiengin amasang uah apei a, belamten anua azui uhi; a aw athei zieh un. 5Hinanleh midang pen azui sih ding ua, ataimangsan zaw ding uh, aziehpen mi dang aw aza thei sih uhi,” achi hi. 6Jesu’n tambang gentena thu zangin thu ahem gen a, hinanleh amaun akung ua bang thu ahiei agen atheisiem sih uhi.
7Tuachi’n Jesu’n akung uah agenkia a, “Chitahtahin na kung uah ka gen ahi, kei belam kotpi khu ka hi. 8Ka masanga hing pei zousie khu gutate leh suomhatte ahi uh, hinanleh belamten athu uh angai sih uhi. 9Kei kotpi khu ka hi, Koipou keima a alut leh hundam in a um dinga, tualeh lut in apawt dinga, neh ding amu ding hi. 10Guta khu gu ding leh that ding leh suse ding loungal in ahing pei sih, Kei pen amaun hinna anei na ding u’leh, kiningching tah a aneina ding ua hing pei ka hi.
11Kei belamchingpa hoi ka hi, belampu hoiin belamte dingin ahinna apie hi. 12Hinanleh nehthalaw, belamchingpa dihtah hilou, belamte ama a hilou mi in, ngie hing pei amu chiengin belamte anuasie a ataisan leng hi, tualeh ngiein belamte aman a adelzah zel hi. 13Nehthalaw ahiziehin belamte awlmawna anei sih a, ataimangsan zel hi. 14#Mat. 11.27; Luk. 10.22Kei belamchingpa hoi ka hi, Ka belamte ka thei a, ka belamten kei ang thei uhi. 15Pain kei ahing thei bangin, Ken zong Pa ka thei hi, tualeh belamte a dingin ka hinna ka pie hi. 16Tualeh tam belam huong a hilou, belam dang zong ka nei hi, amauh zong ka hing pui dinga, ka aw aza ding uhi; tuachi’n belamchingpa toh hon khat in aum ding uhi.
17Tuaziehin ka Pain Kei ahing it hi, lah kia dinga ka hinna ka pieh zieh in. 18Koiman ka hinna ahing lahpieh ahi sih a, keima thu a ka pieh ahi zaw hi. Pieh theina leh lahkia theina thuneina ka nei hi. Tam thupieh ka pa apat ka mu ahi,” achi hi. 19Tuaziehin tam thute ziehin Judate lah ah kikhenna a um kia ta hi. 20Tualeh alah ua tampi in “Dawi lawm ahi, amo ahi, Bangdinga athu na ngaikhieh uh ahiei?” achi uhi. 21Adangten, “Tam thute dawi lawm nei mi thugen ahi sih, dawi in mittote mitte avah sah thei amah?” achi uhi.
Jerusalem ah Jesu anuol uh
22Tualeh Jerusalem a kipumpiehna pawi hun lai ahia, Phalbi lai ahi. 23Jesu khu biehinn huong Solomon innliep ah aviel vah kawikawi hi. 24Tualeh Judate akim ah ahing kikhawm ua, akungah, “Bangtan vei lungnawngkai a hing koi ding na hiei? Khrist na hileh, chientahin hing hil in,” achi uhi.
25Jesu’n amauh adawnga, “Ka hing hilta a, na tahsang sih uhi; Ka Pa min a ka sil lamdang bawlte’n ka khantan ahing theipi uhi. 26Hinanleh na kung ua ka gen tah mabangin ka belamte na hilou ziehun na gingta sih uhi. 27Ka belamte’n ka aw aza ua, ken amauh ka thei hi, tualeh amaun ahing zui uhi. 28Tualeh ken kumtawn hinna ka pie hi; kumtawnin amangthai sih ding ua, koiman ka khut apat ahing lahpieh thei sih ding uhi. 29Ka pa amauh hing pepa mi zousie sangin athupizaw hi; Koima’n ka Pa khut apat ahing lahpieh zou sih ding hi. 30Kei leh Ka Pa khat ka hi uh,” achi hi.
31Tuachi’n Judate’n asena dingin suong ala kia uhi. 32Jesu’n akung uah, “Ken ka Pa akipat nasep hoi tampi noute ka hing musahta hi. Tuate laha hei pen zieh a, suonga hing se sawm na hi uoi?” achi a, adawng hi. 33#Siempu. 24.16Judaten adawng ua, “Nasep hoi ziehin suonga se ka hing tum sih ua, hinanleh Pasian na gensiet zieh leh Nang mihing hi ngal a, Pasian banga na kibawl zieh ahi zaw hi,” achi uhi.
34 #
Late. 82.6
Jesu’n akung uah, “Na dan laibu sung uah, noute pasiente na hi uh ka hing chi hi, chi akigiel asiei mah? 35Pasian thu tunnate nangawn pasiente na hi uh chi ahileh, Laisiengthou thu lah suhsiet ahi sih hi. 36Ken Pasian tapa ka hi kachi zieh a, Pain asuh siengthou a, leitunga a Sawlpa tunga Pasian gensie na hing chi uh ahi maw? 37Ka Pa nate semlou ka hileh hing gingta sih un. 38Hinanleh ana ka sep ahileh, kei hing gingta sih nan u’lachin zong, na kisemte beh gingta un, Pa keima ah a um a, Kei Ama ah ka um chi na thei ua, na gintat theina ding un,” achi hi.
39Tuaziehin Ama mat atum kia ua, hinanleh akhut ua pat asuohta hi. 40#Jn. 1.28Johan in achiil a baptisma abawlna mun Jordan gal ah apei kiata a, khunah ava umta hi. 41Tuachi’n mi tampi akungah ahing pei ua, “Johan in sillamdang bangma bawl anei sih a, hinanleh Tam mipa tungtang Johan in agen zousie adih kim hi,” achi uhi. 42Tualeh khunah mi tampi in Ama agingta uhi.
Currently Selected:
JOHAN 10: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
