JOHAN 13

Nuazuite keng asilpiehna

1Tualeh Peikaan pawi akipat masangin, Jesu’n tam leitung nuasie a, Pa kunga apei hun atungta chi athei hi. Leitunga um ama ate a it a, atawp dongin a amauh a it hi. 2Nitah ann aneh lai un dawimangpa’n Simon tapa Juda Iskariot lungtangah Jesu matsah ding angaituosah zouta hi. 3Jesu’n Pain sil zousie akhut ah apeta chi leh, Pasian akipat a hing pei a, Pasian kunga pei kia ding ahidan athei hi. 4Nitah ann ne lai adingdoh a, apuonsilte akoikhie a, kinawtna puon ala a, ateng hi. 5Tualeh kisilna kuonga tui asun zouin nuazuite keng asil pieh a, kinawtna puon atenin a nawt hul pieh zel hi. 6Tuachi’n Simon Peter kunga a hing pei tahin, Peter in akungah, “Mangpa Nang ka kengte sil talawm ding na mah?” achi hi.

7Jesu’n adawnga, akungah, “Ka sil bawl tuin na thei sih, hinanleh tunua chiengin na hing thei ding,” achi hi. 8Peter in akungah, “Nang ka kengte sil talawm lou e!” achi hi. Jesu’n adawnga “Ka hing sil sihleh kei kungah tan bangma na nei sih ding hi,” achi hi. 9Simon Peter in akungah, “Mangpa ka kengte guoh hilouin, ka khut leh ka lu zong sil in,” achi hi.

10Jesu’n akungah, “Koipou akipumsilsa mi pen akengte loungal sil angai sih hi, hinanleh apum in asieng ahita, na unpi un vang na hi sih uh,” achi hi. 11Aziehpen Aman Ama lebawl a mansah dingpa athei a, tuaziehin, “Na unpi un na sieng kim sih uh,” achi ahi. 12#Luk. 22.27Tuachia akengte uh asil zouin, apuonsilte asil a, atou kia a, akung uah, “Na tung ua ka silbawl bang ahiei na thei uoi? 13Nouten Kei pen Siepa leh Mangpa na hing chi ua, na chi dih ngel uhi, ahi ma ka hi. 14Tuachia kei na Mangpa u’leh Siepa un bawn na kengte uh hing silpieh ka hileh noute zong khat leh khat, keng na kisilpieh ding uh ahi. 15Na tung ua ka bawl bangbang a na bawl na ding ua, etton ding ka hing pieh ahi. 16#Mat. 10.24; Luk. 6.40; Jn. 15.20Chitahtah in ka hing hil ahi, suoh khu apu sangin alienzaw sih a, tualeh sawl a umpa zong asawlpa sangin alien zaw sih hi. 17Tam silte na thei ua na bawl u’leh mi hampha na hi ding uhi.

18 # Late. 41.9 Na unpi uh tungtangthu gen ka hi sih, ka telte ken ka thei hi, hinanleh ka annkuong impipa’n ka tungah aketul alehta chi Laisiengthou sunga kigiel a tangtun theina ding ahi. 19Ahun tun masangin tuin ka hing hil ahi, ahun tun chienga Ama ka hi chi na gintat theina ding un. 20#Mat. 10.40; Mak. 9.37; Luk. 9.48; 10.16Noute thutah ka hing hil ahi, koi hinanleh ka mi sawl khat poupou na kipahpi khu, kei hing kipahpi ahi, tualeh koipou kei hing kipahpi in ahing sawlpa akipahpi hi,” achi hi.

Jesu’n amansah dingpa agendohna

(Mat. 26.21,22; Mak. 14.18,19; Luk. 22.21-23)

21Jesu’n tambanga agen zouin, alunggim mama a, “Noute thutah ka hing hil ahi, na lah ua khat in kei ahing mansah ding hi,” chiin atheisahta hi. 22Anuazuite khat leh khat aki entuo ua, koipen gen adiei chi theilouin lamdang asa uhi. 23Nuazuite lah a khat Jesu’n a itpa khu Jesu angah akingam phei hi. 24Tuaziehin Simon Peter in “Koi pen agenna ahiei chi dong dingin amitmei in ahoupi hi.” 25Tuachi’n aman Jesu anga kingam kawm in, “Mangpa koipen ahiei?” achi hi.

26Jesu’n adawnga, “Tanghou them ka die zou a, ka pieh penpen ahi ding,” achi hi. Tuachi’n Aman tanghou them adie zouin Simon tapa Juda Iskariot apie hi. 27Tanghou them asan zouin, asungah Setan alutta hi. Jesu’n akungah, “Na bawl ding pen bawl meng in,” achi hi. 28Hinanleh dawkan a toute koima in, bang zieh a tam thu akunga agen ahiei chi athei sih uhi. 29Amaute pawlkhat in, Juda in dangka ip akep zieh a Jesu’n akunga, “Annzaluina dinga kisam silte lei ding ahiei,” ahisihleh mizawngte kunga bang ahieikhat pe ding ahiei a asawl hiva chiin angaituo uhi. 30Juda in tanghou them alah zouin apawtdoh pai hi. Tua hun khu zanlai ahita hi.

Ki itna thupieh tha

31Tuachi’n Juda apawtdoh nuain, Jesu’n: “Tuin Mihing Tapa pahtawi in a umta, tualeh Pasian zong Ama vangin pahtawi in aumta hi. 32Ama a Pasian pahtawi a aumleh, Pasian in zong Ama mama ah Tapa apahtawi dinga, apahtawi pai ta ding hi. 33#Jn. 7.34Naute aw noute toh tomnoukhat sung um nalai ding ka hi, Nouten na hing sui ding ua, Judate kunga ka peina ah na hing pei thei sih ding uh, ka chi mabangin tuin noute kungah zong ka chi ahi. 34#Jn. 15.12,17; 1 Jn. 3.23; 2 Jn. 1.5Thupieh tha ka hing pie hi, noute khat leh khat ki ittuo chiet un, ken noute ka hing it bangin noute ki ittuo chiet un. 35Noute khat leh khat na ki it tuo chiet uleh, ka nuazuite na hi uh chi miten ahing thei ding uhi,” achi hi.

Peter in akitheimawbawlna ding genlawhna

(Mat. 26.34,35; Mak. 14.30,31; Luk. 22.33,34)

36Simon Peter in akungah, “Mangpa hei a pei ding na hiei?” chi’n a dong hi. Jesu’n adawnga “Ka peina dingah, tuin na hing zui thei nai sih ding, hinanleh tunua chiengin nang zui ding hi,” achi hi. 37Peter in akungah, “Mangpa bangdinga tu a hing zui thei lou ding ka hiei? Nang dingin ka hinna ka pekhe ding,” achi hi. 38Jesu’n ama adawnga, “Keima ziehin na hinna na phal ngel na diei? Chitahtahin na kung ah ka gen ahi, aa khuon masangin thum vei na hing kilepsan ding hi achi hi.

Currently Selected:

JOHAN 13: ZOUBSI

Highlight

Copy