JOHAN 14

Lampi thutah leh hinna

1“Na lungtanguh mangbangsah sih un, Pasian gingta unlen, Kei zong hing gingta un. 2Ka Pa inn ah umna tampi a um hi, a umlou hileh noute ka hing hilta ding hi. Nou a dinga mun bawla pei ding ka hi. 3Nou a dinga mun bawl a ka vapei leh ka hing pei kia ding a, ka kung ah noute ka hing la ding hi; ka umna a noute zong na um theina dingun. 4Ka peina ding na thei ua, alampi zong na thei uhi. 5Thomas in akungah, “Mangpa na peina ding mun ka thei sih uhi, alampi bangchi’n ka thei ding uoi?” achi hi. 6Jesu’n akungah, “Kei lampi leh thutah leh hinna ka hi, Keima a peilou in koima Pa kung ah atung ngai sih hi.

Jesu leh Pa pumkhat

7Nouten kei hing thei hi u’lachin, ka Pa zong na theita ding uhi; tu a kipat Ama na thei ua, mu zong na muta uhi,” achi hi. 8Philip in akungah, “Aw Mangpa, Pa khu koute hing musah in, tuachi’n ka lungkimta ding uhi,” achi hi. 9Jesu’n akungah “Philip aw, tamtanveipi na kung uah, ka uma hing thei naiva-ia lou na mah? Koipou kei hing muin, Pa amu ahi; bangchidan a Pa khu kou hing musahin na chi ahiei mah? 10Kei Pa ah ka um a, Pa keima ah a um chi gingta lou na hiei mah? Na kung ua ka thugente, keima thuin ka gen sih a, hinanleh Pa keima a um in tua nnate abawl ahi zaw hi. 11Kei Pa ah ka um a, Pa keima ah a um, chi hing gingta un, ahisihleh silbawlte zieh beeh in hing gingta un. 12“Chitahtah in ka hing hil ahi, koipou kei hing gingta in ka nasepte aman zong asem ding hi; tualeh tamte sanga thupi zaw zong asem ding, ka pa kunga ka pei ding ziehin. 13Tualeh ka min a na nget pouma uh, tua khu ka bawl ding hi, Pa Tapa a pahtawi a aum theina dingin. 14Ka min a bang ahiei na nget pouma u’leh ka bawl zel ding hi. 15“Kei na hing it u’leh ka thupiehte zui un.

Hagau pieh ding chiemna

16Tualeh ken Pa kungah ka ngen dinga, Aman noute toh kumtawn a umden ding panpitu dang khat ahing pe ding hi. 17Tuakhu Thutah Hagau ahi; leitungin Ama anei thei sih, aziehpen Ama amu sih ua, thei zong athei sih uh, ahivangin nouten Ama na thei uhi, aziehpen na kung uah a um a, na sung uah ateng hi. 18“Ken noute taga dingin ka hing nuasie sih ding, na kung uah ka hing pei ding hi. 19Hun tomnoukhat nua chiengin leitungin kei ahing mu nawn sih ding; hinanleh nouten na hing mu ding uh; aziehpen kei ka hinga, noute zong na hing ding uh. 20Tua ni chiengin, Kei Pa ah ka um a, noute keima ah na um ua, Kei nouma ah ka um, chi na thei ding uhi.

21Koipou ka thupiehte nei a, zui pouma kei hing it ahi uh, tualeh koipou kei hing it khu ka Pa’n a it ding a, ken ama ka it dinga, akungah ka kilaah ding hi” achi hi. 22Iskariot hilou pen Juda in akungah, “Mangpa koute kunga na kilaah a, leitung kunga na kilaah lou ding, bangchidan ahiei?” achi hi. 23Jesu’n adawnga akungah, “Mi koipou in kei ahing it leh ka thu azui dinga, ka Pa’n ama a it dinga, Ama kungah ka hing pei ding ua, Ama toh ka teng khawmden ding uhi. 24Koipou kei hing it lou mi in, ka thugente azui sih a, na thu zahte uh keima a ahisih a, Pa kei hing sawlpa a ahizaw hi. 25“Na kung ua ka um tahdi sungin, tam thute na kung uah ka gen hi. 26Hinanleh Hamuonpa Hagau Siengthou, Pain ka min in ahing sawl ding a, aman sil zousie noute ahing hil ding hi, tualeh na kung ua ka thugensa zousie noute ahing theidohsah ding hi.

27Hamuonna ka hing nuasie hi, Keima hamuonna ka hing pie hi, leitungin apieh bangin ken noute ka hing pe sih hi. Na lungtang uh mangbangsah sih unlen, zau zong zausah sih un. 28Ka peimang dinga, na kung uah ka hing pei kia ding, chia na kung ua ka gen na zata uhi. Kei na hing it u’leh, Pa kungah ka pei ding ka chi ziehin na kipah ding uhi, aziehpen kei sangin ka Pa alienzaw hi. 29Ahun tun masangin tuin ka hing hil ahita, ahun hing tun chienga na gintat theina ding un. 30Tukalsie na kung uah thu tampi ka gen nawn sih ding, aziehpen tam leitung vaihawmpa hing pei pai ding ahi; aman keima ah bangma anei sih hi. 31Hinanleh Ken Pa ka it a, thu ahing pieh bangin ka bawl zel hi chi leitungin atheina ding un. Dingdoh un tana pat in ipeita ding uhi.

Currently Selected:

JOHAN 14: ZOUBSI

Highlight

Copy