JOHAN 20

Jesu thawkia na

(Mat. 28.1-8; Mak. 16.1-8; Luk. 24.1-12)

1Nipikal khat a ni masapen zingmawng khuo miel nalai in Mari Magdalene han ah ava haw a, tua hankot kisinna suong kilakhesa in amu hi. 2Tuachi’n amanu ataipai vingveng a Simon Peter leh nuazui dang Jesu’n a itpa kungah, “Hankhuh akipat in Mangpa luong alamangta uhi, heisung a asiel uh ahiei ka thei sih uhi,” avachi hi.

3Tuaziehin Peter apawtdoh a, tualeh nuazui dangpen zong, tualeh han lam azuonta uhi. 4Tuachi’n ani un ataikhawm ua, nuazui dang khat penin Peter amakhel a, han atung masa hi. 5Aman kunsuh in hankhuh sung a en a, dielpuonnem kipha khu amu a, hinanleh hankhuh sung ah alut sih hi. 6Tuachi’n Simon Peter zong ama nua ah ahing tunga, hankhuh sungah alut a, dielpuonnem umte amu hi. 7Tualeh Jesu lutang tuomna puon pen dielpuonnem toh umkhawm lou a, atuom a mun khat a kiziela um amu hi. 8Tua nuazui dang khat han a tung masapa zong asungah alut a, amu a, agingta ta hi. 9Aziehpen amaun Jesu mishi lah a kipat in athou kia ding ahi chi, Laisiengthou thu athei nai sih uhi. 10Tuachi’n nuazuite amauh inn lam chiet ah anua pei kiata uhi.

Mari Magdalene kunga Jesu kilahna

11Hinanleh Mari khu han pulam ah kap in ading a, tualeh kap kawmin akuun a han sung a en hi. 12Tualeh Jesu luong kisielna mun ah vansawlsieng ni, aluhung lam ah khat, akenghuontaw lam ah khat, puon vam sil a tou amu hi. 13Tua vansawlsiengten akungah, “Numei bang dinga kap na hiei?” achi uhi. Amanu’n akung uah, “Ka Mangpa alamangta ua, hei a asiel uh ahiei chi ka theilou ziehin,” achi hi.

14Tam thu genkawma akinuahei leh tuana Jesu ding amu hi. Hinanleh Jesu ahi chi athei sih hi. 15Jesu’n akungah, “Numei bangding a kap na hiei? Koi ahiei na sui?” achi hi. Amanu’n huon bawlpa hiva achi ziehin, “Pu aw Ama na puohkhiet ahileh, na sielna hing hilin, tuachi’n ken. Ama ka lakhe ding hi,” achi hi. 16Jesu’n akungah, “Mari” achi a, amanu akihei a, akungah “Rabboni”#Rabboni-Hebru ham ahia, Siepa sinsahpa china ahi. achi hi. Tua pen Siepa china ahi.

17Jesu’n akungah, “Hing tuden sin, ka Pa kungah ka peitou nai sih hi. Hinanleh ka sanggamte kungah va pei inlen, akung uah, Ka Pa, na pa uh, tualeh ka Pasian na Pasian uh kunga peitou ding ka hita chi’n va gen in,” achi hi. 18Mari Magdalene ahing pei a, nuazuite kungah, “Mangpa amu” thu leh tam silte ama’n akungah agen hi, chi amaute kungah ahilta hi.

Thomas umlou kaala Jesu nuazuite kunga akilahna

(Mak. 16.14; Luk. 24.36-43)

19Tuani mama nipi kaalkhat a ni masapen nitahlam in, nuazuite mun khat ah aumkhawm ua, Judate agiin zieh ua, kot kikhakhum uh hinapi, Jesu ahing pei a alah uah ahing ding a, akung uah, “Na tung uah hamuonna um hen,” achi hi. 20Tam thute agen zouin, akhutte leh anah amaute ala hi. Nuazuiten Mangpa amu tahun akipah mama uhi. 21Tuachi’n Jesu’n akung uah, “Na tung uah lungmuonna um hen; Ka Pa’n ahing sawl mabangin noute ka hing sawl hi,” achi kia hi. 22Tam thute agen zouin atung uah ahu ahakhum a “Hagau Siengthou tangta un achi hi. 23#Mat. 16.19; 18.18Mi koipou khelna na ngaidam u’leh, ngaidam ahi ding a, mi koipou khelnate na ngaidam sih u’leh ngaidam lou ahi ding hi.” 24Hinanleh Thomas didum kichipa nuazui sawm leh nite lah a khat, Jesu hing pei lai in alah uah a um sih hi. 25Tuaziehin nuazui dangten akungah, “Mangpa ka muta uh” achi uhi. Hinanleh ama’n akung uah, “Akhut a siakilna pawnte ka mu a, siakilna pawnte sunga ka khutme ka guon vateh a, tualeh anah ka khut a ka tham vateh sih leh ka gingta sih ding,” achi hi.

Thomas zong tel Jesu nuazuite kunga kilahna

(1 Kor. 15.5)

26Tualeh ni giet nua in nuazuite inn sungah aum kia ua, Thomas zong alah uah a um hi. Kotte kikil hinapi Jesu ahing pei a, alah uah adinga “Na tung uah Hamuonna um hen,” achi hi. 27Tuachi’n Jesu’n Thomas kungah, “Na khutme in hing tham inlen, ka khutte en in. Na khut in ka nah tham inlen sawhin. Ginglel nawn sinlen, gingta tain,” achi hi. 28Thomas in adawnga akungah, “Ka Mangpa leh ka Pasian aw,” achi hi. 29Jesu’n akungah, “Thomas nang kei na hing mu ziehin na gingta ahi, mulou a gingtate ahampha uhi,” achi hi.

Johan in khantan hoi agelna zieh

30Adihtahin Jesu’n anuazuite mitmu a chiemtena dang tampi abawlte tam laibu a kigiel lou a um hi. 31Hinanleh tamte pen nouten Jesu Khrist Pasian Tapa ahi chi na gintat na ding u’leh, na gintat zieh ua amina hinna na nei na ding ua kigiel ahi.

Currently Selected:

JOHAN 20: ZOUBSI

Highlight

Copy