LUK 11

Mangpa thumna

1Tualeh hichi ahi a, Jesu heisung mun ahiei khat ah thu angen a, athunget zou in anuazuite khat in akung ah, “Mangpa Johan in anuazuite ahil bangin, kou zong thunget dan ding hing hil in” achi hi.

2Tuachi’n Aman akungah, “Na thunget chiengun:

“Ka Pa uh van a um,

Na min kizatat hen,

Na gam hing tung hen,

Na deilam van a akibawl bangin,

Leitung ah zong kibawl hen.

3Nichin in ka neh khop uh ann hing pie in.

4Ka tung ua leibat neite ka ngaidam mabangun,

ka khelnate uh hing ngaidam in,

tualeh solna ah hing puilut sinlen,

gilou lah apat hing hunkhe zaw in,

chi un,”

achi hi.

Thumna kukal ding thu gentena

5Tualeh Aman akung uah, “Na lah ua koi ahiei in lawm khat nei henlen, zankhang laiin akungah va peiin, lawm aw, tanghou pheng thum hing palah sahin; 6Aziehpen ka lawm khat khuolzin ahing tunga, amai a lui pieh ding bangma ka nei sih hi, chi henlen; 7Tualeh innsunga um pa’n dawngin, hing subuoi sin, tun vang kot kha ahita, Ka tate zong ka kungah lupna ah a imuta uh, thouin ka hing pe thei sih chiin dawngta leh, 8Ka hing hil ahi, alawm ahiziehin vathouin vape sih nanleh, anget teitei ziehin, vathouin adei zaza ava pe ding hi.

9Ka hing hil ahi ngen un piehin na um ding uh, sui un, na mu ding uh, tualeh kiu un, honpieh in na um ding uhi. 10Aziehpen angen pouma pieh in a um a, asui poumain amu hi, tualeh akiu pouma akihonpieh ding hi. 11Na lah ua pa khat pou in, atapa in tanghou ngenta leh koi ahiei suong pe ding? ahisihleh nga ngen leh nga taangin gul ape diei le? 12Ahisihleh aatui ngen leh mom ai ape diei mah? 13Tuachia Nou migilouin bawn na tate u’kunga sil hoi pieh dan na thei uleh, na Pa uh van a um in angen mite kungah Hagau Siengthou atamzaw tham hing nahpieh zawsem lou ding ahiei mah? achi hi.

Jesu thuneina Setan akipat ahisih

(Mat. 12.25-30,43-45; Mak. 3.22-27)

14Tualeh Jesu’n dawi ham theilou khat anotdoh a, tualeh dawi apawtdoh bepin hamtheilou khu ahing hamta a; tuachi’n mipi in lamdang asa mama uhi. 15#Mat. 9.34; 10.25Hinanleh pawlkhat in “Dawimangpa Beelzebub zieh a dawite adeldoh ahi,” achi uhi. 16#Mat. 12.38; 16.1; Mak. 8.11Tualeh mi dangten Ama ze etna in van a kipat chiemtena angen uhi. 17Hinanleh Aman angaituo uh athei a, akung uah, “Leenggam chinteng ama leh ama kidou pouma amangthai leng uhi, tualeh inn sung khat zong akidou uleh apua leng hi. 18Setan zong ama leh ama kidou taleh bangchin agam ading thei diei? Aziehpen Beelzebub zieh a dawite ka deldoh ahi na hing chi uhi. 19Tualeh Ken Beelzebub zieh a dawite notdoh ka hileh, na tapate un koi zieh a ana deldoh zel uh ahiei? Tuaziehin amauh khu noute vai hing hawmpieh dingte ahi uhi. 20Hinanleh Ken Pasian khutme zieha dawite deldoh ka hileh, Pasian gam na kung uah ahing tung tahtah ta ahi.

21Mihat in galvankim tawi a, a innpi aven leh anei alamte abit hi. 22Hinanleh ama sanga hatzaw khat ahing pei a, abulu a, azawchiengin akimuonna agalvan zousie alah pieh a, tualeh anei alam alahpiehte ahawmzah zel hi. 23#Mak. 9.40Kei lam a panglou pouma, Kei hing dou ahi a, tualeh koipou ahing lahkhawmpi lou in athezah hi.

Kisiemphatna bukimlou zauhuoi dan

24“Dawibua mi sunga kipat apawtdoh chiengin, khawlna ding sui in gamgaw mun ah avah kawikawi a, amu sih a; ka hing pawtdohna ka inn ah ka kinuale mai ding, achi hi. 25Tualeh khuna ahing tun in, phiet siengsa leh hoitah a kizem amu hi. 26Tuachi’n apei a, ama sanga gilou zaw dawi dang sagi ahing zawpi a, asungah alut ua, atengta uhi; tualeh tua mipa umdan amasang a sangin ahing sezaw semta hi.”

27Tualeh hichi ahi a, tam thute agen lai in mipi lah akipat in numei koiahiei khat ahing kikoudoh a, “Nang hing kipaina gil leh na nawitep khu ahampha hi,” achi hi. 28Hinanleh Aman tuate sangin “Pasian thu za a zuite ahampha zaw uhi,” achi hi.

Jonah khu Khrist chiemtena ahidan

(Mat. 12.39-42)

29 # Mat. 16.4; Mak. 8.12 Tualeh mipi nasatah ahing kikhop khawm lai un, Jesu’n “Tulai khangthate pen khang giloutah ahi uh; chiemtena asui ua, hinanleh guolnei Jonah chiemtena loungal chiemtena dang pieh ahisih ding uhi. 30#Jon. 3.4Aziehpen Jonah khu Nineveh khuo a mite dinga chiemtena ahi bangin, Mihing Tapa zong tulai khangthate dingin chiemtena ahi ding hi. 31#1 Leeng. 10.1-10; 2 Khang. 9.1-12Vaihawm ni chiengin simlam kumpinu khu tulai khangthate toh ahing ding ding a; amauh amawpai ding hi; aziehpen amanu Solomon pilna ngaikhe dingin kawlmong a kipat in ahing pei hi; Ngai un, Solomon sanga thupi zaw tanah a um hi. 32#Jon. 3.5Thukhen ni chiengin Nineveh khuo a mite khu tulai khangthate toh ading ding ua, siemmaw atangsah ding uhi; amauh Jonah thugen ziehin akhelnate uh akisia uhi, Ngai un, Jonah sanga thupi zaw tanah a um hi.

Meivah akipat gentena

33 # Mat. 5.15; Mak. 4.21; Luk. 8.16 “Mi koima’n meivah adet chiengin mun simtham leh law nuoi ah akoi ngai sih hi, ahing lutten amu theina dingun, meivah tunna ah akoi zaw uhi. 34Na tahsa meivah khu na mit ahi, na mit ahoi laisie na tahsa pumpi abawn in avah suoh hi, hinanleh na mit ahoilou chiengin na tahsa pumpi zong amiel sieng zel hi. 35Tuaziehin na sunga vah um khu amiel ahilou na dingin pilvangin. 36Tua hileh na tahsa pumpi amielna mun umlou a, avah suoh leh, meivah in ahing tan vah bangin avah suoh sieng ding hi.”

Jesu’n Pharisaite leh laigiel mite ademna

37Tualeh athugen lai in, Pharisai koi ahiei khat in akunga ann ne dingin Ama achiel a, tuachi’n alut a, ann ne dingin atouta hi. 38Tualeh Pharisaipa’n a ann neh masanga akhut asil masah lou amu in lamdang asa mama hi. 39Hinanleh Mangpa’n akungah, “Nou pharisaiten nou leh kuong pulam na silsieng nguttah ua, hinanleh na sunglam ulah, lepguhna leh gitlouna in adim hi. 40Nou mimote aw, apulam bawlpa’n, asunglam zong abawl sih amah? 41Hinanleh nou leh kuong sung a umte migentheite kungah pezaw unlen, tuachi’n Ngai un, sil zousie nou a dingin asiengthousa ahi.

42 # Siempu. 27.30 “Hinanleh Pharisaite aw, na tunguh agih hi! aziehpen nouten leengmasel leh Pasikhawmte nasan leh haichi zousie sawma khat na pie ua, vaihawmna dih leh Pasian itna na thudon sih uhi. Tamte ahi na bawl ding uh, adangte bawllou tuonlou in. 43Nou Pharisaite na tunguh agih hi; kikhopna innte ah touna hoipente leh vanzuona mun laha mi’n ahing chibai ding na ut uhi. 44Nou laigielmite leh Pharisai lepchiete aw, na tunguh agih hi! Aziehpen noute pen, mi’n hankhuh ahilam thei vateh lou a, atunga lampi ahahna uh akimulou hankhuh bang na hi uhi,” achi hi. 45Tuachi’n alah ua dansiemmi khat in adawnga akungah, “Siepa, tam na thugen in Koute zong na hing phawh kha hi,” achi hi.

46Tualeh Aman “Nou dansiemte zong na tunguh agih hi, aziehpen noute’n vangih puo hasa tahtah mi na guon ua, nouma’n lah tua puohgihte na khutme khat un zong na khoi nuom sih uhi. 47Na tunguh agih hi, aziehpen na pu na pate un athasa uh, guolneite han inn na lampieh uhi. 48Na pu na pate uh silbawlte na theipi ua, hoi nasahpi tahtah uhi; amaun ana that ua nouten ahan uh na lampieh uhi. 49Tuaziehin Pasian pilnain zong, Akung uah guolneite leh sawltahte, ka sawl ding a alah ua, pawlkhat ana that ding ua, pawlkhat abawl genthei ding uh achi hi. 50Leitung siemchil a kipat a guolnei sisan kisuo zousie, tulai khangthate tungah phu akila thei ding hi, 51#Siem. 4.8; 2 Khang. 24.20,21Abel sisan kisuo akipat maitam leh biehinn kikaal a shi Zekariah sisan dongin, achi hi, Ahi, ka hing hil ahi, tam phuba tulai khangthate tungah akila ding hi.

52Nou dansiem mite aw na tunguh agih hi! aziehpen nouten pilna chabi na pei mangpi ua, nouma lah na lut sih ua, mi lut ding lah na khaam zel uhi,” achi hi. 53Khuna kipat a Jesu apawtdoh tahin laigiel mite leh Pharisaiten Ama aphin panta ua, sil tampi gensah atum ua; 54Aheh theina dingun, ahamkhielna mat tum in, abuhdap denta uhi.

Currently Selected:

LUK 11: ZOUBSI

Highlight

Copy