LUK 12
12
Lepchiena thua nuazuite vauna
1 #
Mat. 16.6; Mak. 8.15 Tuabang hun lai a mipi simsenglou khat leh khat kituonchil khop hiel a ahing kikhop khawm laiun Aman amasapenin anuazuite kungah, “Pharisaite lepchiena tol lah ah pilvang un, achi panta hi. 2#Mak. 4.22; Luk. 8.17Aziehpen langlou dinga, phuolguh bangma a um sih a, tualeh theilou dinga im zong bangma a um sih hi. 3Tuaziehin miel a na gen pouma uh vah a zah in a um ding a, tualeh inndan sunggila bilkawma na gen uh, inntungvum a tangkoupiin a um ding hi. 4“Tualeh nou ka lawmte ka hinghil ahi, tahsa thatlum thei a anua a bangma bawlthei nawnloute giing sih un. 5Hinanleh koi ahiei na giin ding uh ka hing hil ding hi, athalup nua ua zong gawtmuna paitheina thuneipa giing un, ahi, ka hinghil ahi Ama giing un. 6Vatou nga paisa san niin azua zel uh hilou ahiei mah? Hinanleh alah ua khat zong Pasian mai ah manghil in a um sih hi. 7Hinanleh na lu ua samzamte nangawn abawn a sim siengsa ahi uh. Tuaziehin zau sih un; vatou tampite sangin na manpha zaw uhi. 8“Tualeh ka hinghil ahi, koipou mite mai a kei hing hum pouma, Mihing Tapa in zong Pasian vansawlsiengte mai ah ama ahum ding hi. 9Hinanleh mite mai a hing kitheimawbawlte khu Pasian vansawlsiengte mai ah kitheimawbawlin a um ding uhi. 10#Mat. 12.32; Mak. 3.29Tualeh Mihing Tapa gensietna thu gen pouma ngaidam ahi ding ua, hinanleh Hagau Siengthou gense pouma agensietna khu ngaidam ahisih ding hi. 11#Mat. 10.19,20; Mak. 13.11; Luk. 21.14,15Tuachi’n noute kikhopna innte leh thukhente, tualeh thuneite kunga ahing pui tah chiengun, bang ka gen in bang ka chi dawn diei, chiin lungdong sih un. 12Aziehpen Hagau Siengthouin tua hun tahin na gen ding uh ahinghil ding hi.”
Mi hausa mopa gentena thu
13Tuachi’n mipite lah a khat in akungah, “Siepa aw, Ka sanggampa kungah gou hing kihoppi dingin gen in,” achi hi. 14Hinanleh Aman akungah, “Mihing aw, Koiin ahiei kei noute tunga thukhen ahiei, tanhawmpiehpa ding ahiei a hing guot?” achi hi. 15Tualeh Aman akung uah, “Pilvang unlen, enna lah ah kiveng un, aziehpen hausatna khu mihing damsan ahi sih hi.” 16Tuachi’n Aman akung uah, “Gente thu khat agen a, Mi hausa koi ahiei khat khu alou a pieng ahing pung mamata hi. 17Tualeh akingaituota a, ka bulebal koina ding lah ka nei sih a, bang law ding kata diei? achi hi. 18Tuachi’n tami ka bawl ding hi: Ka bu inn phet vangin, alienzaw in lam vangin khunah ka bulebalte leh ka nei ka lam zousie abawnin koi vang, achi hi. 19Tualeh ka hagau kungah, Hagau, kum tampi a dingin nei lelam tampi na kholkhawmta hi, kitawldam inlen, nein dawnin, tualeh nuom tahin umin, ka chi ding, achi hi. 20Hinanleh Pasian in akungah, Nang mimo, tuzan chiengin na hinna hing kilahpieh ding ahi, Tuahileh na sil kholkhawmte zousie koi a ding ahita diei? achi hi. 21Tuaziehin ama a ding maimai a gou kholkhawm a Pasian lam a hausa lou khu tuabang ahi zel uh,” achi hi.
Pasian gam sui masa un
(Mat. 6.25-33)
22Aman anuazuite kungah, “Tuazieh in ka hing hil ahi, bang ka ne diei chiin na hinna, ding uleh, bang ka sil diei, chiin na tahsa ua dingin lungdong sih un. 23Neh ding sangin hinna athupi zaw a, tualeh tahsa zong puonsil sangin athupi zaw hi. 24Va-ahte ngaituo un, bu lah atu sih ua, at zong a at sih uh, bupang leh tangsal zong anei sih uh; hinanleh Pasian in amauh avaa hi. Noute vate sanga bangzata a, manphazaw na hi uoi? 25Tualeh na lah ua koi ahiei alunggim zieh a adunglam tong khat a belap a susang thei? 26Tuabanga sil neunou khat nangawn na bawl thei sih uleh, bang dinga adangte lunggimpi na hi uoi? 27#1 Leeng. 10.4-7; 2 Khang. 9.3-6Lili pahte khandan ngaituo un, nna asem sih ua, mui zong azom sih uhi, hinanleh ka hing hil ahi, Solomon zong athupina zousie toh akizepin zong, tam lili pahte laha khat banga zepin a um sih hi. 28Tuachi’n gam laha hampa tunia hing pou a, azingni chienga lungthukhua a pai a haltum mai ding bawn Pasian in hichi va-ia a azep leh nou ginna tawmte aw, bangchituh a noute silsah a um ding na hita uoi? 29Tualeh na neh ding uh ahiei, na dawn ding uh ahiei, sui sih un, ginlana lungsim nei in zong um sih un. 30Aziehpen leitung pumpi a namten zong tam silte zousie asui uh, tualeh na Pa un tam silte na tulmaw uh chi athei hi. 31Hinanleh nouten Pasian gam sui zawun; tuachi’n tam silte ahing kipieh be ding hi. 32“Pawl tawmte aw, zau sih un, aziehpen na kung ua, leenggam pieh ding khu na Pa uh kipahna lamtah ahi. 33Na nei teng uh zua unlen, migentheite kungah pie un, van ah gutate peilouna leh leikhaten anehsiet thei louna ah, dangka ip lui theilou leh gou setheilou kikhol zaw un. 34Aziehpen na gou umna uah, na lungtang u’zong a um ding hi.
Khrist hing peikia na ding leh sumkempa gentena thu
35 #
Mat. 25.1-13
“Na kawng uh gah unlen, tualeh na thaumei u’zong de kuong zing un. 36#Mak. 13.34-36Mi’n apu uh moulopna akipat a ahing kilekia a, kotkha ahing kiu tah chieng a na honpieh thei pai dinga na ngah zingte bangin um un. 37Apu uh ahing pei chienga ama ngah zinga amu suohte ahampha uhi; chitahtahin ka hinghil ahi, Aman akawng agah dinga, ann ne dingin atou sah dinga, a neh uh abawlpieh ding hi. 38Zankhanglai in ahiei zingthaw hun ahieiin hing pei taleh, tuabanga ahing mu suohte khu ahampha uhi. 39#Mat. 24.43,44Hinanleh tami thei un, guta hing pei ding hun inn neipa’n thei leh, aveng dinga, a inn aphenvang sah sih ding hi. 40Tuaziehin nou zong kigingsa in um un, aziehpen na gintatlou laitah un, Mihing Tapa hing pei ding ahi,” achi hi. 41Tuachi’n Peter in akungah, “Mangpa tam gentena thu koute ding maimai a na gen ahiei, ahisihleh mi zousie ding a zong na gen ahiei?” achi hi. 42“Mangpa’n sumkempa ginum leh piltah, apu in ahunchina atan ding uh hawm pieh dinga a innkuon pite tunga vaihawm dinga abawl khu koipen ahi diei le? 43Apu ahing pei chienga suoh tuabanga bawl ahing mu dingpa khu ahampha hi. 44Na kung uah thutah ka hinghil ahi, Ama khu anei zousie tunga vaihawm dingin abawl ding hi. 45Hinanleh tua suohpain alungsim in, ka pu hing pei zuai sih nava chiin asuohpasalte leh asuohnumeite na vuain, tualeh ne a dawn in na khamta leh; 46Tua suohpa pu khu agintat lou ni khat in, atheilou kaal in ahing pei dinga, tun ni asuo dinga, ginglou mite tan bang atangsah ding hi. 47Tualeh suoh apu deilam thei napi a, ana kiginglou leh adeilam banga bawl lou khu tamveipi vuoh ahi ding hi. 48Hinanleh theiloupi a vuohna tham hiel a sil bawlpakhu tawmnoukhat vei vuoh in aum ding hi. Aziehpen tampi pieha um mi pouma kungah tampi akiphut dinga, tualeh mi’n tampi akepsahpa uh kungah atamzawsem aphut ding uhi.
Jesu mite kikhensahpa
49“Leitunga meikuong sawl dinga hing pei ka hi; tuin zong kuong panta leh chi sam ing e! 50#Mak. 10.38Hinanleh baptisma tan ding khat ka nei hi, tuami ka suhtangtun masangsie’n ka ning kitel hina va-ia e! 51Leitung a lemna leengsah ding a hing pei hiva na hing chi uh amah? Hikeilou, ka hing hil ahi, kikhenna umsah ding a hing pei ka hizaw hi. 52Tua kipat in innsung khat a mi nga umna ah kikhenna a um dinga, mi thum in nite a dou dinga, niin thum adou ding hi. 53#Mik. 7.6Pa in tapa, tapa in pa, nuin, tanu, tualeh tanuin nu; innpinuin amounu tualeh amounu in ainnpinu, adou ding hi,” achi hi. 54Tuachi’n Aman mipite kungah zong, “Nouten nitumna lam a meilum hing kai na mu chiengun guo zu ding ahi na chi pai ua, tuabangin ahing um zel hi. 55Tualeh sim hui hing laang na mu chiengun khuo hing lum ding hi e, na chi ua, tuabangin ahing lum zel hi. 56Nou milepchiete aw, lei leh van umdan na theisiem ngal ua, bang dinga tulai hun umdan theisiem lou na hi uoi. 57“Tualeh bang dinga nouten nouma tungtang a thudih kikhenlou na hi uoi mah? 58Na kihehpipa toh thukhenpa kunga na pei chiengin, lamkaal ah, ama toh kilep theina ding khat ngaituo teitei in, tuachilou in vang thukhenpa mai ah ahing tut dinga, thukhenpa’n mi man lamkaipa kungah ahing pekhe dinga, tuachi’n mi man lamkaipa’n suongkul ah ahing khum kha ding hi. 59Ka hing hil ahi, paisasan khat nangawn na pieh kim masangsie in, tuana kipat na pawtdoh nawn sih ding hi,” achi hi.
Currently Selected:
LUK 12: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
