LUK 19

Jesu leh Zakai

1Tuachi’n Jesu Jeriko khuo ah alut a, apeisuoh hi. 2Tualeh Ngai vawi, mi khat amin Zakai kichi, siedong lamkai lien khat a um a, ahausa mama hi.

3Tualeh aman Jesu khu mi bangchibang ahiei chi, mu atum a, hinanleh adin ngiem ziehin mipi lah ah amu thei sih hi. 4Tuaziehin amasangah ana tai masa a, Ama en dingin theipi dawn ah akal tahi, Jesu’n tua lampi hing zui ding ahiziehin. 5Jesu tuamun ahing tun in adah tou a, ama amu a, akungah, “Zakai hing kum mengin, tunia na inn a tungding ka hi,” achi hi.

6Tuachi’n kintah in ahing kumsuh a, kipah tahin Ama azintunta hi.

7Hinanleh tami amutahun, “Mikhielpa inn a tung dingin a pei tave, chiin aphun uhi.” 8Tuachi’n Zakai adinga Mangpa kungah, “Ngai vawi, Mangpa Ka nei zousie akimkhat mi zawngte kungah ka pe dinga, tualeh mi neitah dihlou tah a ka lah a um leh ale li in ka sang ding hi,” achi hi. 9Tuachi’n Jesu’n akungah, “Tuni’n tam inn ah hundamna ahing tungta hi, ama zong Abraham tapa ahi ziehin. 10#Mat. 18.11Aziehpen Mangthaite suidoh a, hundam dinga Mihing Tapa hing pei mawng ahi,” achi hi.

Talent gentena

11Tualeh tam thute angaikhiet laiun, Jerusalem anai tah zieh leh, Pasian gam hing kilang pai ding a angaituo zieh un, gente thu dangkhat agenbe hi. 12Tuazieh in Aman, “Mi thupi koi ahiei khat, a leenggam vaihawmna ding thu la a, hing kinuale kia dingin khuolgamla tah ah a zinkhie hi. 13Tuachi’n aman asuoh sawmte ahan a, akung uah, dangka mina#Mina-Kichipen Greekte dangka sia ahi. khat chiet apie a, ka hing peikia masangsiein tamteng toh summet na bawl un, achi hi. 14Hinanleh amiten ama a muda ua, Tam mipa ka tung ua vaihawm dingin ka dei sih uh, chiin anua ah patong ataisah uhi.

15Tuachia leenggam vaihawmna thu la a, ahing kinuale kia tahin, asum veipung dan uh, theina dingin sum apieh asuohte khu akungah ahan sahta hi. 16Tuachi’n khatnapa ahing pei a, Pu aw, na mina sawm in, kana pungsah hi, achi hi. 17Aman akungah hoi e, suoh gin um, tawmnoukhat tunga na gin um ziehin, kho sawm tungah vaihawm in pangin, achi hi. 18Tuachi’n aninapa ahing pei a, Pu aw na mina nga in a pung hi, achi hi. 19Aman tuachimabangin akungah, nang zong kho nga tungah vaihawmin pangin, achi hi.

20Tualeh midang ahing pei a, Pu aw, en in, na dangka mina tanah a um hi, khosanawtna puon in ka tun a kana kemtup chinten hi. 21Nang khu mi gumtat na hiziehin ka hing giing hi, na koilou zong na lazel a, tualeh na tulou zong na at zel hi, achi hi. 22Aman akungah, nang suoh gilou na kamsuoh ngelngel in siemlou ka hing tangsah ding hi. Migumtat ka hi a, ka koilou zong ka lah a, ka tulou zong ka at zel na thei ngel ei? 23Tua ahileh bang ding a, ka hing pei kia chienga a pung toh ka lah theina ding a, ka sum khu sum koina inn a na koilou na hiei? achi hi.

24Tuachi’n aman akunga dingte kungah adangka mina khu lahpieh unlen, sawm neipa kungah pie un, achi hi. 25Tuachi’n amaun akungah, Pu aw aman mina sawm anei hi, achi uhi. 26#Mat. 13.12; Mak. 4.25; Luk. 8.18Ka hing hil ahi koizong anei pouma pieh belap ahi dinga, tualeh koizong aneilou khu aneisun zong lapieh in a um ding hi. 27#Mat. 25.14-30Hinanleh tua ka galte, atung ua ka vaihawm ding deiloute hing zawpi unlen, ka masang ah that un, achi hi, achi hi.

Jesu guolzou a Jerusalem alutna

(Mat. 21.1-9; Mak. 11.1-10; Jn. 12.12-19)

28Tam thute agen zouin, amasang ua pei in Jerusalem lam azuon touta uhi. 29Tualeh hichi ahi a, Bethphage leh Bethani khuo kung a Olive muol ahing tun un, anuazuite lah a mi ni asawl a, 30Na masang ua khuo ah va “Pei unlen, na luttah chiengun, sabiltungnou koima tuonna ngainailou nava mu ding ua, tua khu hing sut unlen, hing kai un. 31Mi koipou in, Bangdinga na sut uh ahiei? chia ahing doh leh, Mangpa’n atulmaw a hi, hing chita un,” achi hi.

32Tuachi’n asawlte khu ava peita ua, agen bang ngei in ava muta uhi. 33Tualeh sabiltungnou kikhina asut laiun, aneiten akung uah “Sabiltungnou bangding a na sut uh ahiei?” achi uhi. 34Amaun “Mangpa’n atulmaw ahi,” achi uhi. 35Tuachi’n Jesu kungah ahing kai ua, tualeh Sabiltungnou tungah apuonte uh apha ua, atungah Jesu atuongsah uhi. 36Tuachi’n apei lai in, apuonte uh lampi ah apha uhi.

37Tuachi’n Ama Olive muol kumsuhna ahing tun kuon tahin, anuazui mipi zousie in asil bawl thupi zousie amu zieh un akipah ua, aw ngaitah in Pasian apahtawi uhi. 38#Late. 118.26“Mangpa min a hing pei kumpipa ahampha hi, van ah lemthu leeng henlen, tungnung pen ah thupina um hen,” achi uhi.

39Tualeh mipi lah a Pharisai pawlkhat in akungah “Siepa aw, na nuazuite phawh in” achi uhi. 40Aman adawng a, akung uah, “Ka hing hil ahi, tamte asip uleh suongte akikoudoh pai ding uhi,” achi hi.

Jesu’n Jerusalem akakhumna

41Tualeh atun kuon in khopi amu a, akakhum hi. 42“Aw! nangma mama in, tu na hun sung beeh in na hamuonna thu hing theita mai lachin maw! Hinanleh tuin na mit apat akiphuolta hi. 43Na galten na kimvel ah leipal ahing tawkhum ding ua, pawtdoh theilouin na kimkotin ahing imkhum ding uhi. 44Tuachi’n nang leh na sunga na tate tuol satna’n ahing nei ding ua, na sung ah suong khat beh kithuop in anuasie sih ding uhi, ve a na umlai nite na theilou ziehin.”

Pasian biehinn asuh siengna

(Mat. 21.12,13; Mak. 11.15-17)

45Tuachi’n Ama Pasian biehinn ah alut a, sil zuate leh leite anotdoh hi. 46#Isai. 56.7; Jer. 7.11A kung uah “Ka inn khu thungetna inn ahi, chi gel ahi; hinanleh nouten gutate munpi in na bawlta uhi,” achi hi.

47 # Luk. 21.37 Tualeh Aman nichin in Pasian biehinn ah thu ahil hi. Hinanleh siempu liente leh laigiel mite tualeh mipi lamkaiten Ama tha atum chinten uhi. 48Hinanleh mipi zousie in athugen angai nuom ziehun, abawl dingdan athei tuom sih uhi.

Currently Selected:

LUK 19: ZOUBSI

Highlight

Copy