LUK 20

Sakhuo lamkaiten Jesu thuneina adohna uh

(Mat. 21.23-27; Mak. 11.27-33)

1Ni khat Pasian biehinn a mipite thu ahil a, khantan hoi agen laiin, siempu liente, laigielmite leh upate akungah ahing pei uhi. 2Tualeh akungah, “Bang thuneina in ahiei tam silte na bawl? hing hil in” achi uhi.

3Aman adawnga akung uah, “Ken zong sil khat ka hing dong ding, hing dawng un. 4Johan Baptisma khu van akipan ahiei, mihing akipan?” achi hi.

5Tuachi’n amauh akingaituo ua, “Van a kipan chileilah, ahileh bangdinga gingta lou, ahing chi ding a, 6Tualeh mihing akipat chileilah mipiin suongin ahing sep ding uhi, aziehpen Johan pen guolnei ahi achi chiet uhi.” 7Tuachi’n amaun hei a kipat a hiei ka gen thei sih uhi, chiin adawng uhi. 8Jesu’n akung uah, “Ken zong bang thuneina a tam silte ka bawl ahiei chi ka hing hil sih ding hi,” achi hi.

Grep huon gentena thu

(Mat. 21.33-44; Mak. 12.1-11)

9 # Isai. 5.1 Tuachi’n mipite kungah tam gente thu agen a, “Mi koi ahiei khat in grep huon abawl a, a huon kemmite kungah, kilaw a hou ding in apekhie a, gam tuom ah sawtpi tam dingin a hawta hi. 10Tualeh aga law hun in, huon a grep gate ana pieh dingun lou houte kungah, suoh khat asawl a, hinanleh lou houmiten, ama ana vuo ua, khut guoh in asawlmang ta uhi. 11Aman suoh dang khat a sawlkia a, ama zong ana vuo ua, zumhuoi tahin abawl ua, khutguohin asawlmangta uhi. 12Tuachi’n aman athumna asawl kia a, ama zong ana vawliem ua, adeldoh ta uhi. 13Tuachi’n grep huon neipa’n bangchi bawl ding ka ta diei? Ka tapa deitah sawl mai vang, ama beeh amu chiengun, ana zatat khamaw sih ding uhi, achi hi. 14Hinanleh huon bawl miten ama ana mu tah un, Tam mipa gouluo dingpa khu ahi, agou itan theina dingin that vai, chi’n akihou uhi. 15Tuachi’n grep huon apat adeldoh ua, athat ta uhi. Tuaziehin grep huon neipa’n amauh bang alawta diei leh? 16Ahing pei ding a, grep huon kemte a sumang ding a, grep huon khu midangte kungah ape ding hi,” achi hi. Amaun tam thu azah tah un, “Tambang pen tun da heh” achi uhi.

17 # Late. 118.22 Tualeh Aman amauh a en a, “Ahileh tam thu kigiel bang ahiei?

Inn lam mite suongdeilou pen tua suong mama khu,

aning a suong poimaw pen ahing hita,

achi hi.

18Koipou tuami suong tunga pua khu akitatkehgawp dinga, tualeh akhiehkhum poumate a gawt guoi ding hi,” achi hi.

Sie pieh thua a dohna

(Mat. 22.15-22; Mak. 12.13-17)

19Tua hun laitahin siempu liente leh laigelmiten Ama mat atum ua; hinanleh mipite agiing ua; tua gente thu amauh demna-a agen ahi chi athei uhi. 20Tuachi’n Ama khu abuhdap ua, gam uhpa vaihawmna leh thuneina a, atut theina ding un athu genkhiel man dingin midih kipang enkhemi asawl uhi. 21Tualeh amaun akungah, “Siepa, dihtahin thu na gen a na hil zel hi, tualeh koima deisahtuom neilou in Pasian lampi dihtahin na hil zel chi ka thei uhi. 22Kou dinga Kaisar kunga sie ka pieh uh sieng ahiei sienglou?” chiin adong uhi.

23Hinanleh Aman ze etna a adoh uh ahi chi athei a, akung uah, Bang ding a hing ze et na hi uoi? 24“Makhai khat hing ensah un, koi lim leh koi min atuong ei?” achi hi. Amaun “Kaisar a,” chiin adawng uhi.

25Aman akung uah, “Tuaziehin Kaisar silte Kaisar kungah pie unlen; Pasian silte Pasian kungah pie un,” achi hi. 26Tuachi’n mipite mai ah athugen khiel mat ding amu sih ua, adawnnate lamdang asa mama ua, asipta uhi.

Thawkiana thu a dohna

(Mat. 22.23-32; Mak. 12.18-27)

27 # Nasep. 23.8 Tuachi’n thawkiana a um sih chi, Saddukaite pawlkhat akungah ahing pei ua, Ama adong ua, 28#Danp. 25.5“Siepa, Mosi in koipou asanggampa’n zi anei a, ta neilou in ashisan leh anaupa’n azi aluo dinga a upa dingin hahlesuon anei pieh ding hi, chiin Mosi in ahing na gel pieh hi. 29Tuachi’n sanggam pasal sagi a um ua, a upa penin zi anei a ta neilou in ashi hi. 30Tuachi’n aninapa in aluo a, taneilou in ashi hi. 31Tuachi’n athumna in aluo a, tuachimabangin sagi in anei ua, ta neilou in ashi chietta uhi. 32Amauteng nua in numeinu zong ashita hi. 33Tuaziehin thawkiana ni chiengin amanu koi zi pen ahita diei? a sagi un ziin anei chiet zieh un,” achi uhi.

34Jesu’n adawnga, akung uah, “Tulai khanga mite akiteng ua, zi leh tain akilatuo uhi. 35Hinanleh khum hun chienga tel taah leh mishi lah akipat thawkiana tang taah a simtel pouma zi leh tain akinei nawn sih ding uhi; 36Amauh shi zong ashi thei nawn sih ding uhi, aziehpen vansawlsiengte bang ahi ua, tualeh thawkiana tate ahizieh un, Pasian tate ahita uhi. 37#Pawt. 3.6Tuachi’n mishite kaithawin a um chi Mosi in zong singbawh kuong thu ah, Mangpa khu Abraham Pasian, Isaak Pasian leh Jakob Pasian achi lai in alangsahta hi. 38Ama mishi Pasian ahi sih a, mihing Pasian ahi zaw hi; aziehpen Ama Ngai in, mi zousie ahing ahi,” achi hi.

39Tuachi’n laigielmite pawl khat in adawng ua, “Siepa, na gendih ngel hi,” achi uhi. 40Tuami nua in thudang mawngmawng adong ngam nawn sih uhi.

Khrist khu David tapa ahiei mah

(Mat. 22.41—23.4; Mak. 12.35-40)

41Tualeh Aman akung uah, “Bangchi dan a Khrist khu David tapa achi uh ahiei?

42 # Late. 110.1 Ama David ngel in zong Late bu ah,

Mangpa’n Ka Mangpa kungah,

43na melmate na kengngapna a,

ka bawl masangsie ka ziet lam ah tou in,

achi hi, ana chi hi.

44David in Ama Mangpa achi ngal leh bangchi dan a atapa hi thei ding ahiei?”

achi hi. 45Tuami nuain Aman mipi zousie zahin anua zuite kungah; 46“Puontuol sil a vah lunggula, van zuona munte a, chibai buh bang, kikhopna inn a touna hoipente leh pawibawlna a, mun hoipente deituom sese laigielmite lah ah pilvang un. 47Meithaite innsungte anegam ua, mi solna in sawtpipi thu angen uhi. Tam mite siemloutanna athupi sem ding hi,” achi hi.

Currently Selected:

LUK 20: ZOUBSI

Highlight

Copy