LUK 21

Meithainu thawlawm khieh

1Tuazou a Jesu adahtou leh, mi hausaten sum bawm a, silpieh akhieh lut lai uh amu a, 2Tualeh Aman meithai zawng tah khat in paisa san ni akhieh laitah zong amu hi. 3Tuachi’n Aman noute “Thutah ka hing hil ahi, tam meithainu zawng tah in, midang zousie sangin akhetam zaw hi. 4Aziehpen tam mite zousiein anei valte uh Pasian adingin silpieh in apie ua, hinanleh amanu’n ahinna dinga anei sun teng apie hi,” achi hi.

Jesu’n Jerusalem siet ding leh huntawp ding agenlawhna

(Mat. 24.1-3; Mak. 13.1-4)

5Tuachi’n mi pawl khat in Pasian biehinn thu, suong hoitahte leh silpiehte a jep hoi ahidan agen uleh, Aman, 6“Tam na sil mute uh ahileh, suhchip lou a, suong khat tunga suong khat kichieng mawngmawng na mu lou nite uh ahing tung ding hi,” achi hi. 7Tualeh amaun akungah, “Siepa, Tam silte bangchih chienga hing um ding adiei? tualeh tam silte ahing tun ding chiengin bang chiemtena ahing um diei?” chiin adong uhi.

Khrist hing peina ding chiemtenate

(Mat. 24.4-13; Mak. 13.5-13)

8Tuachi’n Aman “Sol a na um louna ding un pilvang un, aziehpen ka min suongin mi tampi ahing pei ding ua, Kei Khrist ka hi, ahun ahing tungta ahing chi ding uh hi. Tuaziehin amauh zui sih un. 9Ahivang in kidouna thu leh buoina thu na zah chiengun zau sih un, tam silte atung masa ding mawng ahi. Hinanleh atawpna ahing tung pai nai sih ding hi,” achi hi.

10Tuazouin Aman akung uah, “Nam khat in nam tuom adou ding a, leenggam leh leenggam akidou ding uhi. 11Mun tuom ah zil nasatahin aling dinga, kielte atung dinga, natna hite aleeng dinga, van a kipat sil chizat huoipipi leh chiemtena thupi tahtah ahing um ding hi. 12Hinanleh tam silte zousie atun masangin noute ahing man ding ua, Keima min ziehin ahing sugenthei ding ua, kikhopna innte a kipat in ahing kaikhe ding ua, suongkulte ah ahing khum ding ua, leengte leh vaihawmte masang ah ahing pui ding uhi. 13Hinanleh amaute mai a Kei nang theipina ding ua hun lemtang ahi ding hi. 14#Luk. 12.11,12Tuaziehin bangchi dawn ding na hiei chi ngaituo masa lou dingin na lungtang uh sudet un. 15Na melmate zousie un ahing dou ua ahisihleh ahing soisel theilouna ding un, Keima’n kam leh pilna ka hing pe ding hi. 16Na nu na pate uh, na sanggamte uleh na be na phungte uleh na lawm na guolte uh nangawn in zong ahing kilepsan ding ua, na lah ua pawl khatte shina ah ahing tun ding uhi. 17Keima min ziehin mi zousie muda na hi ding uhi. 18Hinanleh na lujang ua sam zamkhat zong amangthang sih ding hi. 19Na thuohhatna un na hinna uh na humbit ding uhi.

Jerusalem suhsietna

(Mat. 24.15-21; Mak. 13.14-19)

20“Hinanleh galkapten Jerusalem a imchimit uh na mu chieng un, amanthai nading anaita chi thei un. 21Tuahun chiengin Judia gam a umte muoltung lam ah tai u’henlen, khopi sung a umte zong pawtdoh uheh, tualeh gam a umte zong khopi sungah lut sih uheh. 22#Hos. 9.7Aziehpen tam nite phu lahna ni ahi dinga, akigielsa zousie atangtunna hun ahi ding hi. 23Hinanleh tua ni chiengin gaite leh naungeh nawitep nalai neite atung uh agih hi! Aziehpen gam sungah lungkhamna nasatah leh thangpaina tam mite tunga tung ding ahi. 24Tualeh amaute namsau hiemin ashi ding ua, nam zousiete lah ah suoh leh sal a puiin a um ding uhi. Jentelte hun a tunkim masangsie Jerusalem khu Jentelte totden in a um ding hi.

Mangpa hing pei niveina

(Mat. 24.29-31; Mak. 13.14-19)

25 # Isai. 13.10; Ezek. 32.7; Joel. 2.31; Kihil. 6.12,13 “Tualeh ni leh ha leh aasite ah chiemtenate a um ding a, leitungah namte lunggimna leh mangbatna atung dinga, tuipite kihawt in amau veng vung ding hi. 26Leitunga sil hing tung dingte ngaituona ziehin mite zauin ashibup ding uhi; aziehpen van silbawltheinate kikungnuh ding ahi. 27#Dan. 7.13; Kihil. 1.7Tua hun chiengin, Mihing Tapa asilbawltheina leh thupina nasatah toh, meilum lah a hing pei amu ding uhi. 28Tam silte ahing tun kipat ni chiengin dahdoh unlen, entou un, aziehpen na tatna ni uh anaita hi,” achi hi.

Theipi kung gentena

(Mat. 24.32-35; Mak. 13.28-31)

29Tualeh Aman akung uah gentena thu khat agen a, “Theipi kung leh singkung zousie en un; 30Anate ahing seltah chiengun, nipi ahing naita chi na mu ua, na thei uhi. 31Tuamabangin tam silte ahing tun na mu chiengun Pasian gam anaita chi thei un. 32Adihtahin ka hing hil ahi, tam silte atunkim masangsie, tulai khang thate amang sih ding hi. 33Lei leh van amang dinga, hinanleh ka thu amang sih ding hi. 34“Hinanleh pilvang un, tuachilouin nehva tahluot leh zukham leh damsung khosah ding ngaituonain, na lungtang uh aluodim seng kha dinga, tualeh tua ni na theilou kaal un, ahing tung zuai kha ding hi. 35Leitung pumpi a umte zousie tung ah, thang kipel banga thakhat a hing tung ding ahi. 36Tuaziehin sil hing tung zousiete pel taah leh Mihing Tapa mai a ding taah dinga guotna hi theina dingun, kiveng unlen, thu ngen ngitnget un.”

37 # Luk. 19.47 Tualeh Aman sun lai in Pasian biehinn ah thu ahil a, zan chiengin apawtdoh a Olive muol kichi ah ava um zel hi. 38Tuachi’n zingmawng matah in mipite zousie akungah ahing pei ua, bieh inn a athugen angaikhe zel uhi.

Currently Selected:

LUK 21: ZOUBSI

Highlight

Copy