Sione 7

Ko Si̇̄sū mo Hono Ngaahi Tehiná

1Pea hili ʻa e ngaahi meʻa ko iā, naʻe fononga takai ‘a Si̇̄sū ‘i Kāleli, ʻo ne fakamamaʻo mei Siutea, koeʻuhi̇̄ he naʻe feinga ai ʻa e kau Siú ke tāmateʻi ia. 2Pea naʻe ofi ke fai ʻa e Kātoanga Nofo Falefakataimi ʻa e kau Siú, 3Ko ia, na‘e talaange ‘e hono ngaahi tehiná kiate ia: ‟Kuo tonu ke ke mavahe mei heni ʻo fononga atu ki Siutea, koeʻuhi̇̄ ke mamata ʻa hoʻo kau akó ki he ngaahi ngāue fakaofo ʻokú ke fai̇́. 4He ʻoku ʻikai ha taha te ne fai fakapulipuli ʻene ngāué pea ʻiloa ia ʻe he kakai̇́. Kapau ko e ngaahi ngāue ʻeni ʻokú ke fai̇́, pea fei mo ke fakahāaʻi koe ki māmani.” 5He naʻá mo e ngaahi tehina ‘o Sīsuú, naʻe ʻikai ke nau tui kiate ia.

6Ko ia, naʻe talaange ‘e Si̇̄sū kiate kinautolu: ‟ʻOku te‘eki ke hokosia hoku taimi̇́. Ka ko homou taimi̇́, ‘oku hoko ma‘u ai pē ia. 7‘E ‘ikai faifai pea fehi‘a kiate kimoutolu ʻa e kakai ‘o e maama ko eni̇́, ka ‘oku nau fehi‘a maʻu ai pē kiate au, koeʻuhi̇̄ ‘oku ou tala ma‘u pē kiate kinautolu, ʻoku kovi ʻenau ngaahi ngāué. 8Mou ‘alu hake kimoutolu ki he kātoangá. ʻE ʻikai te u ʻalu hake leva ki he Kātoanga ko eni̇́, he kuo teʻeki ke kakato hoku taimi̇́.” 9Pea ʻi heʻene folofolaʻaki ʻa e ngaahi meʻa ko iā, naʻá ne toe nofo atu pē ‘i Kāleli.

Ko Si̇̄sū ‘i he Kātoanga Nofo falefakataimi

10Ka ʻi he ʻalu hake leva ‘a hono ngaahi tehina ki he Kātoangá, na‘e ‘alu hake foki mo ia, ka na‘e ʻikai te ne ʻai ke ʻilo ia ‘e ha taha, kae fakapulipuli pē.

11Kaneongo iá, ʻi he lolotonga ʻa e Kātoangá, naʻe kumi kiate ia ‘e he kau Siú mo nau faka‘eke‘eke holo: ‟Kofe‘ia ʻa e tangata ko iā?” 12Pea naʻe fepōtalanoaʻaki ʻa e tokolahi ʻo e kakai̇́, ʻo kau kiate ia, ʻo pehē ‘e he ni‘ihi: ‟Ko e tangata lelei ia,” kae pehē ‘e he ni‘ihi: ‟Ko e tangata ia ‘okú ne takihala‘i ʻa e kakai̇́.” 13Ka na‘e ‘ikai ha taha te ne fai fakahāhā ʻene talanoa ʻo kau kiate iá, koe‘uhi̇̄ na‘a nau manavahē ki he kau Siú.

14Pea ʻi he meimei vaeua ʻa e Kātoangá, naʻe ʻalu hake ‘a Si̇̄sū ki he Temipalé, ‘o kamata fai ai ʻene malanga. 15Ko ia, naʻe ofo ʻaupito ai ʻa e kau Siú, ‘o nau pehē: ‟Naʻe anga fēfē hono maʻu ʻe he tangatá ni ha fuʻu poto pehē: ka naʻe ʻikai te ne ʻi ha akoʻanga?”

16Ko ia, naʻe tali ʻe Si̇̄sū ʻo ne folofola kiate kinautolu: ‟Ko ʻeku ngaahi akonaki̇́, ‘oku ‘ikai ko e maʻu meiate au, ka mei̇́ he Toko Taha naʻá ne fekau mai aú. 17‘Ilonga ha taha te ne loto ke fai ʻa e finangalo ‘o e ‘Otuá, ‘e toki mahino kiate ia, pē ko e akonaki ‘oku ou fai̇́, ko e meʻa mei he ‘Otuá, pē ko ʻeku lea pē meiate au. 18Ko ia ʻokú ne lea meiate ia pē, ʻokú ne kumi ki hono lāngilangi pē ʻoʻona. Ka ko ia, ʻokú ne kumi ki he lāngilangi ʻo e Toko Taha naʻá ne fekau mai aú, ko e moʻoni̇́ ia, pea ʻoku ʻikai ha loi ʻiate ia. 19‘Ikai na‘e foaki atu ‘e Mōsese ʻa e Laó kiate kimoutolu? Kaneongo iá, ‘oku ‘ikai ha taha ‘iate kimoutolu ‘e talangofua ki he Laó. Ko e hā ʻoku mou feinga ai ke tāmateʻi aú?”

20Pea tali ‘e he kakai̇́: ‟‘Okú ke puke fakatēvolo? He ko hai ‘oku feinga ke tāmate‘i koé?”

21Pea tali ‘e Si̇̄sū ʻo ne folofola kiate kinautolu: ‟Ko e ngāue mana pē ʻeni ‘e taha kuo u fai̇́, pea ʻoku mou ofo kotoa ai. 22Ko hono ʻuhinga ʻeni naʻe foaki ai ʻe Mōsese kiate kimoutolu ʻa e kamú (neongo na‘e ‘ikai ko Mōsese tonu naʻá ne ʻoatu iā, ka ko ho‘omou ngaahi kui̇́) ka ʻoku a‘u pē ki he Sāpaté ‘a hoʻomou kamu ʻa e fānau tangatá. 23Kapau leva ʻoku kamu ʻa e fānau tangatá ʻi he Sāpaté koeʻuhi̇̄ ke ʻoua naʻa maumauʻi ʻa e Lao ʻa Mōsesé, pea ko e hā ‘oku mou ‘ita ai ‘iate au he‘eku ngāue ke fakamoʻui ha tangata ʻi he Sāpaté? 24ʻOua ʻe fai fakatu‘asino ho‘omou faifakamaaú, ka mou fai ke totonu hoʻomou faifakamaaú.”

Ko e Mīsaiá Nai ‘a Si̇̄sū?

25Ko ia naʻe lea ai ha niʻihi, ko e faʻahinga mei Selusalema: ‟‘Ikai ko e tangata ʻeni ʻa ia ‘oku nau feinga ke tāmate‘i̇́? 26Pea ko ʻeni ia ‘oku malanga holo heni, ka ʻoku ʻikai ke nau lea hake kiate ia. Kuo ʻilo koā ʻe he kau taki̇́, ʻoku mo‘oni pē, ko e Toko Tahá ni, ko e Mi̇̄saiá ia? 27Ka ‘oku tau ʻilo ʻekitautolu ʻa e feituʻu ʻoku haʻu mei ai ʻa e tangatá ni, ka ʻoka hokomai ʻa e Mi̇̄saiá, ʻe ‘ikai ke ‘ilo ‘e ha taha, pē ko ʻene haʻu mei fē.”

28Ko ia naʻe kalanga leʻolahi ʻa Si̇̄sū, lolotonga ʻene faiako ʻi he Temipalé, ʻo pehē: ‟‘Oku mou pehē koā, ‘oku mou ‘ilo‘i au pea mo e feituʻu kuo u haʻu mei ai̇́? Kuo ‘ikai te u haʻu aú, ko ho ku loto pē ʻoʻoku. Ka ko e mo‘oni̇́, ko e Toko Taha naʻá ne fekau mai aú, ‘a ia ʻoku ʻikai te mou ʻiloʻi ia ʻekimoutolu. 29Ka ‘okú ou ʻilo ʻe au ʻa e Toko Taha ko iā, he ko aú, kuo u haʻu meiate ia, pea ko ia ia kuó ne fekau mai aú.”

30Ko ia, naʻa nau feinga ke puke ia, ka na‘e ‘ikai ha taha ‘e ala hono nimá kiate ia, he kuo te‘eki ke hokosia hono taimi̇́.

31Ka na‘e tui kiate ia ha tokolahi ʻo e fuʻu kakai̇́, pea nau pehē: ‟ʻOka hoko mai ʻa e Mi̇̄saiá, te ne toe fai koā ha ngaahi mana ʻo lahi ange, he ngaahi meʻa kuo fai ʻe he tangatá ni?”

Ko e Fekau ke Puke ‘a Si̇̄sū

32Pea fanongo ʻa e kau Fālesi̇́ ‘i he fetūkuaki pehē ʻa e kakai̇́, ʻi he ngaahi meʻa ʻoku kau kiate iá, pea nau fekau atu ha kau Sētuata fale ke nau ō ‘o puke mai ia. 33Ko ia, naʻe folofola ʻa Si̇̄sū: ‟‘Oku ou ʻiate kimoutolu pē ʻi ha kiʻi taimi siʻi, pea u foki leva au ki he Toko Taha naʻá ne fekau mai aú. 34Te mou kumi kiate au, ka he‘ikai te mou toe ma‘u au, pea ko e feitu‘u ‘oku ou teu ‘alu ki ai̇́, ʻe ʻikai te mou lava ke ʻalu ki ai.”

35Ko ia, naʻe fe‘ekenaki ʻe he kau Siú: ‟Ko ʻene teu ‘alu ki fē ʻa e tangatá ni, ʻa ia ʻe ʻikai ai ke tau lava ke toe maʻu iá? Te ne ʻalu nai ki he feitu‘u ‘oku nofo movetevete holo ai hotau kakai̇́, ʻi he ngaahi puleʻangá? Te ne ‘alu koā ‘o faiako ki he kau Kalisi̇́? 36Ko e hā ʻa e ‘uhinga ‘o ʻene pehē: ‛Te mou kumi kiate au ka he‘ikai te mou toe ma‘u au,’ mo ʻene pehē: ‛Ko e feituʻu te u ʻi ai̇́, he‘ikai te mou lava ke ‘alu ki ai̇́?’”

Ko e Ngaahi Tafenga Vai Fakamo‘ui

37Pea ʻi he ʻaho faka‘osi ‘o e Kātoangá, ʻa e ʻaho molumalu tahá, naʻe tu‘u hake ‘a Si̇̄sū ‘o naʻe kaila le‘olahi: ‟Ka ai ha taha ‘oku fieinua, ke ne haʻu kiate au ʻo inu. 38Ko ia ʻe tui falala kiate aú, hangē kuo hikitohi ʻi he Tohitapú, ʻE tafe maʻu ai pē mei heʻene moʻui̇́, ha matavai moʻui.” 39Ka ko ʻene folofola ko eni̇́, naʻe kau ki he Laumālié, ‘a ē na‘e ‘amanaki ke toki maʻu ʻekinautolu kotoa pē ʻoku tui kiate ia. He na‘e te‘eki ai ke lilingi mai ʻa e Laumālié koeʻuhi̇̄ kuo teʻeki ke fakalāngilangi‘i ‘a Si̇̄sū.

Ko e Fakafaʻafaʻahi ‘a e Kakaí

40Ko ia, ʻi he fanongo ʻa e fuʻu kakai̇́ ki heʻene ngaahi lea ko eni̇́, naʻa nau pehē: ‟Tā ʻoku mo‘oni pē, ko e palōfitá ʻeni!”

41Ka naʻe pehē ‘e he ni‘ihi: ‟Ko e Mi̇̄saiá ʻeni!”

Ka ko ha ni‘ihi, naʻa nau pehē: ‟Ka ʻe anga fēfē ʻa e haʻu ʻa e Mi̇̄saiá, mei Kāleli? 42‘Ikai ʻoku pehē ʻe he Tohitapú, ʻE haʻu ʻa e Mi̇̄saia mei he hako ʻo Tēvitá, pea mei Pētelihema, ʻa e kolo na‘e tupu ai ‘a Tēvitá.” 43Ko ia, naʻe hoko ha fakafaʻafaʻahi ʻi he kakai̇́, ko e meʻa ‘ia Si̇̄sū. 44He na‘e loto ʻa e ni‘ihi ke fei mo nau puke ia, ka na‘e ‘ikai fie ala ha taha ke puke ia.

Ko Hono Fakasītu‘a‘i ‘o Si̇̄sū ‘e he Kau taki ‘o e Kakai Siú

45Ko ia, naʻe foki atu ʻa e kau Sētuata falé ki he kau taulaʻeiki̇́ mo e kau Fālesi̇́, pea naʻa nau pehē kiate kinautolu: ‟Ko e hā na‘e ‘ikai ai ke mou taki mai iá?”

46Pea tali ʻe kau sētuatá: ‟Kuo te‘eki te mau ʻilo ha taha ‘oku lea ʻo hangē ko e tangata ko iā.”

47Pea tali ‘e he kau Fālesi̇́ kiate kinautolu: ‟Kuo takihēeʻi koā mo kimoutolu foki?” 48‟Kuo ai koā ha fo‘i toko taha he kau taki̇́ pē ko e kau Fālesi̇́ kuo tui kiate ia? 49‘Ikai ʻaupito! Ka ko e fuʻu kakai pē ko ena ʻoku nau taʻeʻilo ki he Laó, ʻa ia ʻoku nau malaʻiá.”

50Pea lea ʻa Nikotimasi kiate kinautolu, ʻa e toko taha na‘e ‘alu atu kia Sīsuú, he taimi ki muʻá, ʻa ia ko e taha ia ʻokinautolu; 51‟ʻIkai ‘oku tapu heʻetau Laó, ke fakamāau‘i ha taha, ‘okapau kuo te‘eki ke tomuʻa ʻange hano faingamālie ke fai ha‘ane fakamatala, ke tau ʻilo ai ʻene me‘a na‘e fai̇́?”

52Pea nau tali ʻo pehē kiate ia: ‟Ko e Kāleli koā mo koe foki? Fekumi muʻa ke ke ‘ilo, ‘oku ‘ikai ha palōfita ‘e tupu mei Kāleli.” #7:52 ʻIkai ha veesi 53 ō e vahe7

Currently Selected:

Sione 7: TCNT

Highlight

Copy