Mātiu 24

Ko e Pau ke Faka‘auha ʻa e Temipalé

(Ma‘ake 13:1-2; Luke 21:5-6)

1Pea ‘alu atu ‘a Si̇̄sū mei he Temipalé, ke fai atu ʻene fonongá, mo e omi ʻene kau akó kiate ia ‘o nau fakatalanoa kiate ia ʻo kau ki he ngaahi lotoʻā ʻo e Temipalé.

2Ka naʻe folofola ‘a Si̇̄sū, ‟‘Oku mou sio ki he ngaahi lotoʻā ko ʻeni̇́? Ko hono mo‘oni̇́ ʻeni ‘oku ou tala atú, ‘e ‘ikai ha fo‘i maka heni ‘e kei hilifaki ‘i ha funga maka, he ‘e holoki kotoa.”

Ko e Ngaahi Faingata‘a mo e Ngaahi Fakatanga

(Ma‘ake 13:3-13; Luke 21:7-19)

3Pea ʻi he nofo hifo ‘a Si̇̄sū ‘i he Moʻunga ‘Ōlive, pea omi kiate ia ʻene kau akó, ‘o nau fakaekinautolu mo ia. Pea nau ʻeke ange ki ai, ‟Talamai angē, ‘e hoko fakakū nai ʻa e ngaahi meʻa ni, pea ko e hā ha faka‘ilonga kuo ofi ho‘o hā‘ele mai̇́, mo e ngataʻanga ʻo māmani̇́?”

4Pea tali ‘e Si̇̄sū, ‟Mou tokanga na‘a takihala‘i kimoutolu ‘e ha taha. 5He ‘e omi ha tokolahi ‘i hoku hingoá, ʻo nau tala, ‛Ko e Mīsaiá au!’ Peá te nau takihala‘i ha tokolahi.

6Peá te mou fanongo talanoa ki ha ngaahi tau mo ha ngaahi fakalanga tau, kae tokanga na‘a mou ilifia ai. He kuo pau ke hoko ha ngaahi me‘a pehē: ka ‘e ‘ikai ʻuhinga ia kuo vave ʻa e ngata‘anga ‘o māmani̇́. 7He ‘e tu‘u hake ʻa e fonua ko eé ke nau tau mo e fonua ko eé, mo e pule‘anga ko eé ke tau mo e pule‘anga ko eé. Pea ‘e hoko ha ngaahi honge mo ha ngaahi mofuike, he ngaahi feitu‘u kehekehe. 8Ka ko e ngaahi me‘á ni kotoa, ko e kamata‘anga pē ia ‘o e ngaahi faingata‘a ‘e hokó. 9Pea ‘e toki puke kimoutolu ‘o tuku atu ke tautea mo tāmate‘i, pea ‘e fehi‘anekina kimoutolu ‘e he kakai kotoa koeʻuhi̇̄ ko au.

10‘I he taimi ko iā, ʻe tokolahi ʻa e kakai ‘e mole ‘enau tui̇́. Te nau fefakaʻiloʻaki mo fetāufehiʻaʻaki. 11Pea ʻe tokolahi ʻa e kau palōfita loi̇́ ʻe haʻu, pea te nau takihala‘i ha tokolahi. 12Pea koeʻuhi̇̄ ko e fakautuutu ʻa e kovi̇́, ‘e faka‘au ke mokoteilo ʻa e ʻofa ‘a e kakai tokolahi. 13Kae ‘ilonga ha taha ‘e kātaki ‘o a‘u ki he ngata‘angá, ‘e fakamo‘ui ia. 14Ka ko ʻene toki ‘osi pē ‘a māmani kātoa hono malanga‘i ki ai ʻa e Ongoongo Lelei ʻo e Pule‘angá, pea ‘e toki hokomai leva ʻa e ngata‘angá.”

Ko e Me‘a Fakaʻuliá

(Ma‘ake 13:14-23; Luke 21:20-24)

15Ko ia, ka faifai pea a‘u ki ha ‘aho kuo mou sio ai ki he Potu Tapú ʻoku tu‘u ai ʻa e ‟Me‘a Fakalieliá ‘a ē na‘e tala ‘e he palōfita ko Tānielá. (Tauange ke mahino ʻeni kiate koe ‘okú ke lau ení).”

16Pea kapau ‘e a‘u ki he ‘aho ko iā ‘oku mou nofo ‘i Siutea, pea mou hola ki he moʻungá. 17Pea ko ia kuo kaka ki hono funga falé, ke ‘oua te ne toe ‘alu hifo ke toʻo ha‘ane me‘a mei loto-fale. 18Pea ko ia ‘oku ‘i ʻuta, ke ‘oua te ne toe foki ki kolo ke kumi hono pulupulú ke ‘alu mo ia.

19Ka ʻe si‘i faka‘ofa ʻa e kau fefine feitamá he ngaahi ‘aho ko iā, pea mo e kau fā‘ele valevalé. 20Ko ia, mou lotu ki he ‘Otuá ‘o kole ke ‘oua ‘e hoko ho‘omou holá ‘i he fa‘ahita‘u momokó, pē ko ha ‘aho Sāpate. 21He ‘e lahi ‘aupito ʻa e ngaahi faingata‘a ‘e hoko ai̇́. Talu ʻa e kamata‘anga ‘o māmani, mo e teʻeki ha faingata‘a lahi pehē. Pea ‘e ‘ikai ‘aupito hano ua he kaha‘ú. 22Peá ka naʻe ‘ikai finangalo e ‘Otuá ke fakanounou ʻa e ngaahi ‘aho ko iā, pehē ‘e ‘ikai ha taha ‘e hao. Ka ‘e fakanounou ‘e he ‘Otuá ʻa e ngaahi ‘aho ko iā koeʻuhi̇̄ ko ʻene kakai fili̇́.

23Pea ʻi he taimi ko iā, kapau ‘e pehē atu ‘e taha, ‟Ko e Mīsaiá eni” pē ‟Ko e Mīsaia ena” pea ‘oua ʻaupito te mou tui ki ai. 24He ‘e hopo hake ha kau mi̇̄saia loi mo ha kau palōfita loi, pea te nau fai ha ngaahi mana lalahi mo ha ngaahi me‘a fakaofo ke takihala‘i ʻaki ‘a kimoutolu kuo fili ‘e he ‘Otuá.

25Tokanga! He ko ʻeni kuo u ‘osi tala atu ia kiate kimoutolu. 26Ko ia, kapau leva ‘e pehē atu ‘e ha ni‘ihi, ‟Sio atu! Ko ʻena he toafá!” pea ‘oua te mou ō ki ai. Pea kapau te nau pehē atu, ‟Ko ʻeni! ‘Oku toi ‘i hē!” ‘oua ʻaupito te mou tui ki ai. 27He ko e hokomai ʻa e Foha ʻo e Tangatá, ‘e hangē ko e ʻuhilá, ʻene tapa he langi̇́ mei he hahaké ‘o a‘u ki he hihifó.

28He ka ‘ilonga ha feitu‘u kuo li̇̄ ki ai ha ‘anga‘anga, kuo pau ke fakapotanga ki ai ha fanga ‘i̇̄kale.

Ko e Hokomai ‘a e Foha ʻo e Tangatá

(Ma‘ake 13:24-27; Luke 21:25-28)

29‟Peá ka hili ange ʻa e ngaahi faingata‘a ‘o e ngaahi ‘aho ko iā,

‘E fakapoʻuli ʻa e laʻaá.

Pea ‘e ‘ikai kei huhulu hifo ʻa e māhiná.

‘E fenganganaʻi ʻa e ngaahi fetuʻú mei langi.

Pea ‘e luluʻi ʻa e ngaahi mālohinga ‘o e Langi̇́.

30Pea ‘e toki hā mai mei he langi̇́ ʻa e faka‘ilonga ‘o e Foha ʻo e Tangatá. Pea ‘e tangi mamahi ai ʻa e matakali kotoa pē ‘i māmani. Peá te nau hanga hake ‘oku hā‘ele mai ʻa e Foha ʻo e Tangatá he ngaahi ‘aó mo e māfimafi mo e lāngilangi lahi.

31Peá te ne fekau atu ʻene kau ‘āngeló, kuo ifi le‘olahi ha talamipite, pea te nau tānaki mai ʻene kakai fili̇́ mei he tapa kotoa pē ‘o māmani.”

Ko e Ako mei he Fu‘u Fikí

(Ma‘ake 13:28-31; Luke 21:29-33)

32‟Pea mou ako mei he fiki̇́. He ka fai lau pea talamuka hono ngaahi vaʻá, pea tā kuo ofi ʻa e fa‘ahita‘u māfaná. 33‘E pehē pē foki mo kimoutolu ‘oka mou ka mamata ki he ngaahi me‘á ni. Te mou ‘ilo ai kuo vave pē ke kamata, he kuo aʻu mai ki he matapā.

34‘Oku ou fakapapauʻi atu kiate kimoutolu, ‘e hoko ʻa e ngaahi me‘á ni kotoa pē kuo teʻeki ke ʻosi ʻa e toʻutangata ʻoku lolotongá ni. 35Pea ‘e mole ʻa e langi̇́ mo māmani, ka ‘e ‘ikai ʻaupito mole ʻeku ngaahi leá.”

Ko e ‘Ikai ‘ilo ‘e ha Taha ‘a e ‘Ahó mo e Houá

(Ma‘ake 13:32-37; Luke 17:26-30,34-36)

36‟Ka ‘oku ‘ikai ha taha te ne ‘ilo pē ‘e hoko fakakū mai ʻa e ‘aho mo e houa ko iā; ‘oku ‘ikai ‘ilo ‘e he kau ‘āngelo ‘i Langi̇́, pea na‘á mo e Fohá, ka ko e Tamai̇́ toko taha pē ‘okú naʻe ʻafioʻi.

37Ko e hokomai ʻa e Foha ʻo e Tangatá, ‘e hangē ko e me‘a na‘e hoko he kuonga ‘o Noá. 38He ʻi he te‘eki ke hoko ʻa e lōmaki̇́, na‘e kai mo inu pē ʻa e kakai̇́, mo nau femaliʻaki, ‘o a‘u pē ki he ‘aho na‘e heka ai ‘a Noa ki he ‘A‘aké. 39Na‘e ‘ikai te nau misi ‘e ai ha me‘a ‘e hoko, kae ʻoua kuo tō mai ʻa e lōmaki̇́ ‘o tafiʻi kotoa ai. ʻE pehē pē foki mo e hokomai ʻa e Foha ʻo e Tangatá.

40Ka a‘u ki he ‘aho ko iā, ‘oku ngāue ha ongo tangata ‘i ʻuta, pea ‘e ‘ave ʻa e taha, kae tuku pē ʻa e taha. 41Ka a‘u ki ai̇́, ‘oku fai ‘e ha ongo fafine ha‘ana momosi uite, pea ‘e ‘ave ʻa e taha kae tuku pē ʻa e taha. 42Mou tokanga! He ‘oku ‘ikai te mou ‘ilo ʻa e ‘aho ‘e ha‘u ai homou ‘Eiki̇́.

43Ka mou ʻilo muʻa ʻeni: Ka naʻe lava ke ‘ilo ‘e ha taha pē ‘e ha‘u fakakū ʻa e kaiha‘á, ke hae hono falé, te ne le‘ohi ia pea ʻe ‘ikai te ne tuku ke haea hono falé. 44Pehē foki mo kimoutolu, ke mou mateuteu ma‘u pē, he ‘e hokomai ʻa e Foha ʻo e Tangatá, ʻi ha taimi ʻe ʻikai te mou ʻamanaki ki ai.”

Ko e Kau Tamaioʻeiki

(Luke 12:41-48)

45‘Ko fē leva ia ʻa e tangata ngāue falala‘anga mo fakapotopotó, ʻa ia kuo fakanofo ‘e he ʻeiki ʻo e ʻapi̇́, ke pule ki heʻene kau ngāué mo ʻange ʻenau meʻatokoni̇́ ʻi hono taimi̇́? 46‘Oku monū‘ia ʻa e sevāniti, ʻa ia ‘e a‘u mai ʻa e ʻeiki ʻo e ‘api̇́, ʻokú ne fai honau fatongiá. 47Ko hono mo‘oni̇́ ʻeni ‘oku ou talaatú, te ne fakanofo ʻa e tangata ngāue ko iā ke pule ki heʻene koloá kotoa!

48Ka ʻokapau leva ko ha tangata ngāue kovi ia, pea te ne pehē ‘i hono lotó, ‟‘Okú kei tuai ʻa e foki mai ‘a hoku pulé.” 49Peá te ne taa‘i hono kaungāngāué, ka naʻe kai mo kaungāinu mo e kau fa‘a konaá. 50Pea ‘e foki mai ʻa e ʻeiki ʻoku ʻaʻana ʻa e kau ngāue ko iā, ‘i ha ‘aho na‘e ‘ikai te ne ʻamanaki ki ai, pea ʻi ha houa naʻe ʻikai te ne ʻilo ki ai. 51Peá te ne toki hanga ‘o haeua ia pea tuku atu ia ki he nofoʻanga ʻo e kau lotuloi̇́, ʻa ia ko e potu ia te nau toki tangi ai mo fengauʻutaki ai honau nifó.

Currently Selected:

Mātiu 24: TCNT

Highlight

Copy