Ma‘ake 2

Ko e Fakamo‘ui ‘e Si̇̄sū ha Tangata Mamatea

(Mātiu 9:1-8; Luke 5:17-26)

1Pea ‘osi mei ai ha ngaahi ʻaho, pea toe ʻalu ʻa Si̇̄sū ki Kāpaneume. Pea na‘e ongo atu kuó ne ʻi ʻapi. 2Pea naʻe kātoa mai kiate ia ha kakai tokolahi, ʻo ‘ikai ha toe feitu‘u ‘e ‘atā, ʻi fale mo tuʻa. Pea malanga‘i ‘e Si̇̄sū kiate kinautolu ʻa e Folofola ʻa e ‘Otuá. 3Pea lolotonga iá, kuo fata mai ‘e ha toko fā ha tangata mamatea ʻi hono mohengá. 4Ka na‘e ‘ikai te nau lava ʻo ofi kia Si̇̄sū koeʻuhi̇̄ ko e tokolahi ʻa e kakai̇́, ko ia, naʻa nau avangi ʻa e ʻató, feʻunga hifo mo Si̇̄sū. Pea nau toki tukutuku hifo ai ʻa e tangata mamateá, ʻi hono mohengá.

5Pea ʻi he meaʻi ‘e Si̇̄sū ʻa e tui ʻa e kau tangatá, naʻá ne folofola ki he tangata mamateá, ‟Tangata, kuo fakamolemole‘i ho‘o ngaahi angahalá.”

6Ka na‘e ʻi ai ha ni‘ihi he kau faiako Lao ʻa Mōsesé na‘e nofo ai, pea nau fifili ʻi honau lotó, 7‟Ko e hā ‘oku lea pehē ai ʻa e tangatá ni? Ko e lea fie‘otua ia! ‘Oku ‘ikai ha taha ‘e fakamolemole angahala, ka ko e ʻOtuá toko taha pē!”

8Pea meaʻi ‘e Si̇̄sū ʻi hono laumālié, ʻenau fifili̇́, pea naʻe pehē kiate kinautolu, ‟Ko e hā ‘oku mou fifili pehē ai ʻi homou lotó? 9He ko e fē ʻa e me‘a ‘oku faingofua angé, ko ʻeku pehē ange ki he mamateá, ‛Kuo fakamolemole‘i ho‘o ngaahi angahalá’ pē ko ʻeku pehē ange, ‛Tuʻu ā ʻo to‘o ho mohengá, peá ke ʻalu.’ 10Ka koeʻuhi̇̄ ke mahino kiate kimoutolu, ‘oku ma‘u mafai ʻa e Foha ʻo e Tangatá ʻi māmani ke fakamolemole angahala.” Pea naʻe pehē leva ki he mamateá, 11‟Tuʻu hake, to‘o ho mohengá, peá ke ʻalu ki ʻapi.”

12Pea tuʻu leva ia ki ‘olunga, ʻo to‘o hono mohengá mo laka fakatovave atu ʻi honau lotolotongá. Pea nau fakatumutumu kotoa pē mo fakamālōʻia ʻa e ‘Otuá, ʻo nau pehē: ‟Ko ʻetau toki mamata ʻeni ki ha me‘a pehē!”

Ko e Ui ‘e Si̇̄sū ʻa Līvai

(Mātiu 9:9-13; Luke 5:27-32)

13Pea toe ʻalu atu ʻa Si̇̄sū ki he matātahi ʻo e Tahi Kāleli̇́. Pea naʻe ʻi ai ha kakai tokolahi na‘e muimui ki ai, pea naʻá ne faiako kiate kinautolu.

14Pea ʻi he ʻalu atu ʻa Sīsuú, naʻá ne fakatokanga‘i ha tangata tānaki tukuhau ko Li̇̄vai, ko e foha ʻo ‘Alefiusi, ‘oku nofo mai ʻi he ʻōfisi tānaki tukuhaú. Pea folofola ki ai ʻa Si̇̄sū, ‟Ha‘u ʻo muimui kiate au.” Pea tuʻu hake leva ʻa Līvai ʻo muimui kiate ia.

15Pea lolotonga na‘e ma‘u me‘atokoni ʻa Si̇̄sū he ʻapi ʻo Līvai̇́, naʻe tokolahi ha kau tānaki tukuhau mo ha kau angahala na‘á nau kai fakataha mo ia mo ʻene kau akó, he naʻe muimui kia Si̇̄sū ha fuʻu tokolahi.

16Pea ʻi he mamata ʻa e kau faiako Lao ʻa Mōsesé mo e kau Fālesi̇́ ‘oku ma‘u me‘atokoni fakataha ʻa Si̇̄sū mo e kau tānaki tukuhaú mo e kau angahalá, pea nau fehuʻi ki he‘ene kau akó, ‟Ko e hā hono ‘uhinga ‘oku ma‘u me‘atokoni fakataha ai ʻa Si̇̄sū mo e kau tānaki tukuhaú mo e kau angahalá?”

17Pea ʻi he fanongo ʻa Si̇̄sū ki he‘enau laú, pea naʻe pehē ange kiate kinautolu, ‟‘Oku ‘ikai fiema‘u toketā ʻa e kakai ‘oku mo‘ui lelei̇́, ka ko e kakai ‘oku mahamahaki̇́. Na‘e ‘ikai te u ha‘u aú, ke ui ʻa e kau mā‘oni‘oni̇́, ka ko e kau angahalá.”

Ko e Fehu‘i ki he ʻAukai̇́

(Mātiu 9:14-17; Luke 5:33-39)

18Pea na‘e faʻa ʻaukai ʻa e kau ako ʻa Sione Papitaisó pea mo e kau Fālesi̇́. Pea omi ai ha ni‘ihi ʻo fehu‘i ange kia Si̇̄sū, ‟Ko e hā ‘oku ʻaukai ai pē ʻa e kau ako ʻa Sioné mo e kau ako ʻa e kau Fālesi̇́, ka ko ho‘o kau ako ʻa‘aú, ‘oku ‘ikai te nau ʻaukai kinautolu?”

19Pea tali ‘e Si̇̄sū, ‟He ‘oku ʻaukai koā ʻa e kakai̇́ ʻi ha kātoanga mali, lolotonga ʻoku kei nofo mo kinautolu ʻa e tangata ta‘ané? ‘E ‘ikai fai ha ʻaukai lolotonga ʻa e kei nofo mo kinautolu ʻa e tangata ta‘ané! 20Ka ‘e hoko mai ha ʻaho, ʻa ia ‘e ‘ave ai ʻa e tangata ta‘ané meiate kinautolu, pea te nau toki ʻaukai leva he ʻaho ko iā.

21‘Oku ‘ikai ha taha te ne monomono ha teunga motu‘a ʻaki ha konga tupenu fo‘ou. He ka pehē: pea ‘e mingi ia, ʻo toe mahae lahi ange ai ʻa e teunga motu‘á.

22Pea ‘oku ‘ikai ʻutu ha uaine fo‘ou ki ha hina leta motu‘a. He ka pehē: pea ‘e pā ʻa e hina letá he ngāue ʻa e uainé, ʻo fakatou maumau ai ʻa e uainé mo e hiná. Ko e uaine fo‘oú, ke ʻutu pē ia ki ha hina leta fo‘ou.”

Ko e Fehu‘i ki he Sāpaté

(Mātiu 12:1-8; Luke 6:1-5)

23Pea ko e Sāpate ‘e taha, na‘e fou atu ʻa Si̇̄sū ʻi he ngoue‘anga uite, pea hanga ‘e he‘ene kau akó ʻo toli ʻa e ngaahi foʻi uité. 24Pea pehē ange ‘e he kau Fālesi̇́ kia Si̇̄sū, ‟Sio ki ai! Ko e hā ‘oku maumau‘i ai ‘e ho‘o kau akó ʻa e tapu ʻo e Sāpaté?”

25Pea tali ʻe Si̇̄sū, ‟Kuo te‘eki koā ke mou lau ʻa e talanoa ʻo e me‘a na‘e fai ‘e Tēvita mo ʻene kau tangatá, ʻi he‘enau faingata‘ā‘ia mo fiekaiá? 26ʻA ʻene hū ki he Fale ʻo e ‘Otuá, ʻo kai ʻa e mā toputapú, ʻa ē na‘e ‘ikai ngofua ke kai ai ha taha, tukukehe pē ʻa e kau taula‘eiki̇́. Pea naʻe toe ‘oange foki ki heʻene kau tangatá ke nau kai mei ai mo kinautolu.”

27Pea toki folofola ʻa Si̇̄sū kiate kinautolu, ‟Na‘e fokotu‘u ʻa e Sāpaté maʻae faʻahinga ʻo e tangatá, ʻo ‘ikai ko e faʻahinga ʻo e tangatá maʻae Sāpaté. 28Pea ʻi heʻene peheé, ko e Foha ʻo e tangatá, ko e ʻEiki ai pē ia ʻo e Sāpaté.”

Currently Selected:

Ma‘ake 2: TCNT

Highlight

Copy