Ma‘ake 3

Ko e Tangata Nima Mamatea

(Mātiu 12:9-14; Luke 6:6-11)

1Pea toe hū ʻa Si̇̄sū ki he falelotú, pea naʻe ʻi ai ha tangata kuo mamatea hono nimá. 2Pea ko e ni‘ihi ʻo e kakai̇́ na‘á nau lamasi ʻa Si̇̄sū, pē te ne faito‘o e tangatá ʻi he Sāpaté, ke nau fakaʻilo ai ia.

3Pea lea ange ai ʻa Si̇̄sū ki he tangatá, ‟Tuʻu hake ʻo laka mai ki loto.” 4Pea naʻe toki pehē ki he kakai̇́, ‟Ko e hā ʻa e me‘a ‘oku fakangofua he Laó ke fai ʻi he Sāpaté? Ke fai ha lelei, pē ko ha kovi? Ke fakahaofi ha mo‘ui, pē ke tāmateʻi?” Ka na‘e ‘ikai ke lea hake ha taha.

5Pea naʻe sio takai kiate kinautolu heʻene tuputāmaki, mo ʻene fakameʻapangoʻia he ongongata‘a pehē honau lotó, pea naʻe toki folofola ki he tangatá, ‟Mafao mai ho nimá.” Pea naʻe fakahangatonu atu hono nimá, pea naʻe mo‘ui ia.

6Pea ō leva ʻa e kau Fālesi̇́ ʻo alea mo e ni‘ihi he fa‘ahi ʻa Hēlotá ki ha founga ke tāmate‘i ai ʻa Si̇̄sū.

Ko e Omi ʻa e Kakai Tokolahi kia Si̇̄sū

7Pea na‘e mavahe mei ai ʻa Si̇̄sū mo ʻene kau akó ʻo nau ō ki he matātahi̇́. Pea muimui atu ki ai ha tokolahi mei Kāleli pea mo Siutea foki. 8Na‘e ʻi ai foki mo ha fuʻu tokolahi mei Selusalema, mo ‘Aitūmia, mo e ngaahi feituʻu ʻo e kauvai ‘e taha ʻo e Vaitafe Soatani̇́, pea mo e feitu‘u ʻo Taia mo Saitoni̇́, naʻa nau omi kiate ia. 9Koeʻuhi̇̄ ko e omi ʻa e kakai ko ʻeni̇́ kia Sīsuú, ko ia na‘á naʻe fekau ʻa e kau akó ke nau teuteu mai ha kiʻi vaka ke heka ki ai, he naʻe feteketekeʻi mai ʻa e kakai̇́ kiate ia.

10He kuo fakamo‘ui ‘e Si̇̄sū ha kakai tokolahi, pea ko ia naʻe feta‘ota‘omi mai ai kiate ia ʻa e kakai mahaki kotoa pē, na‘a lava, ke nau ki‘i lave pē kiate ia. 11Pea ka mamata kia Si̇̄sū ʻakinautolu na‘e ma‘u ‘e he ngaahi laumālie ‘uli̇́, naʻa nau fakatōmape‘e atu kiate ia ʻo kalanga, ‟Ko e ʻAlo koe ʻo e ‘Otuá!” 12Ka na‘e fekau ‘e Si̇̄sū ʻa e ngaahi laumālie ‘uli̇́ ke ‘oua te nau fakahāaʻi ia.

Ko e Fili ‘e Si̇̄sū ʻa e Toko Hongofulu Mā Ua

(Mātiu 10:1-4; Luke 6:12-16)

13Pea ʻalu hake ʻa Si̇̄sū ki ha moʻunga, ʻo ne ui mai ʻakinautoluu na‘e finangalo ki ai̇́. Pea nau omi kiate ia. 14Pea naʻe fakanofo ʻa e toko hongofulu mā uá, ʻo ne fakahingoa ko e kau ʻApositolo, koeʻuhi̇̄ ke nau nofomaʻu ʻiate ia pea ke ne fekau atu kinautolu ke nau ō ki he kakai̇́ ʻo malanga. 15Peá ke nau ma‘u foki ʻa e mafai ke kapusi tēvolo. 16Ko ʻeni ia ʻa e toko hongofulu-mā-ua na‘á ne fili̇́: Ko Saimone (ʻa ia na‘á ne fakahingoa ko Pitá.) 17Ko Sēmisi foha ʻo Sēpeti̇́ pea mo hono tokoua ko Sioné (na‘e fakahingoa kinaua ‘e Si̇̄sū ko e ongo Poanesi, ʻa ia ko e pehē: ko e ongo foha ʻo Fatulisi.) 18Ko ʻAnitelū, mo Filipe, mo Pātolomiu, mo Mātiu, mo Tōmasi, mo Sēmisi ko e foha ʻo ‘Alefiusi̇́, mo Tatiusi, mo Saimone ko e mamahi‘i fonuá; 19Pea mo Siutasi ‘Isikāliote, ʻa ē na‘á ne lavakiʻi iá.

Ko Si̇̄sū mo e Taki ʻo e fanga tēvoló

(Mātiu 12:22-32; Luke 11:14-23; 12:10)

20Pea naʻe hūatu ia ki ha fale, pea kuo toe fakatahamai ha fuʻu kakai tokolahi, ʻo ‘ikai maʻu ha faingamālie ʻo Si̇̄sū mo ʻene kau akó ke ma‘u ha me‘atokoni.

21Pea fanongo ai hono fāmili̇́, pea nau omi leva ke ʻave ia, koeʻuhi̇̄ ko ʻenau pehē: ‟Kuo hē hono ʻatamai̇́!” 22Pea na‘e ʻi ai mo e kau faiako Lao ʻa Mōsese naʻe omi mei Selusalema ʻo nau pehē: ‟Kuo ma‘u ʻa Si̇̄sū ‘e he pule ʻo e fangatēvoló!” Pea pehē ‘e he ni‘ihi, ‟Ko e pule ʻo e fangatēvoló kuó ne ‘oange kia Si̇̄sū hono ivi kapusi tēvoló!”

23Pea ui mai ‘e Si̇̄sū ʻa e kakai̇́, ʻo ne fai ange kiate kinautolu ʻa e talanoa fakatātā ko ʻeni̇́: ‟‘E lava fēfē ‘e Sētane ke ne kapusi ʻa Sētane? 24He ka ʻi ai ha pule‘anga ‘oku māvahevahe mo fetuʻusi, pea ‘e holo leva ʻa e pule‘anga ko iā. 25Pea ka ai ha fāmili ‘oku māvahevahe mo fetuʻusi, pea ‘e ‘ikai tolonga ia, ka ‘e movete, pea ko hono ngatá ia. 26Ko ia, ka fepaki ʻa Sētane mo Sētane, pea ko e ʻauha leva ia ʻa e pule‘anga ʻo Sētané. 27‘E ‘ikai foki lava ke hū ha taha ki ha fale ʻo ha to‘a ʻo fa‘ao ʻene koloá ‘okapau kuo te‘eki ke ne ha‘i ʻa e to‘á. Ko ia ne ka toki ha‘i ʻa e to‘á, te ne lava ai ʻo faʻao ʻa e koloa ʻa e to‘á.

28Ko hono mo‘oni̇́ ʻeni ‘oku ou tala atú, ‘e lava ke fakamolemole‘i ʻa e angahala kotoa pē ʻa ha taha, ʻo a‘u ki ha‘ane lea kovi ki he ‘Otuá. 29Ka ‘okapau te ne lea kovi ki he Laumālie Mā‘oni‘oni̇́, ‘e ‘ikai toe lava ke fakamolemole‘i ia. Kuó ne halaia ʻi ha angahala taʻengata.” 30Naʻe lea pehē ʻa Sīsuú, koeʻuhi̇̄ ko e pehē ‘e he kakai̇́, ‟Kuo ma‘u ia ‘e ha laumālie ʻuli!”

Ko e Fa‘ē mo e Ngaahi Tokoua ʻo Si̇̄suú

(Mātiu 12:46-50; Luke 8:19-21)

31Pea na‘e omi kia Si̇̄sū ʻa ʻene fa‘eé mo hono ngaahi tokouá, ʻo nau tutuʻu pē mei tuʻa, ʻo fekau atu ki fale ke ne ha‘u. 32Pea pehē ange ‘e he kakai na‘á nau nofo takatakai kiate iá, ‟Ko ho‘o fa‘eé ē mo ho ngaahi tokouá ʻi tuʻa. ‘Oku nau fiemaʻu mai koe!”

33Pea folofola ʻa Si̇̄sū, ‟Ko hai koā ʻa ʻeku fa‘eé mo hoku ngaahi tokouá?” 34Pea naʻe sio takai ki he kakai̇́, ʻo ne toki folofola kiate kinautolu, ‟Ko ʻeni ia ʻeku fa‘eé mo hoku ngaahi tokouá. 35Ka ai ha taha te ne fai ʻa e finangalo ʻo e ‘Otuá, ko hoku tokouá ia, mo hoku tuofefiné, pea mo ʻeku fa‘eé.”

Currently Selected:

Ma‘ake 3: TCNT

Highlight

Copy