JENESIS 23
23
Sarale Chaibe zai Abrahambe ne Herawloa Luibe
1Sarale kum haî kat ze ’ngkai ze sena riâ ring gai de lei. 2Zai Sarale â Kiriath-arba (chize Hebron) Kanaan dei gene chai gai de lei; zai Sarale chaidibe ze Abrahambe desui ze bam de lei. 3Pe nâu kechaipum ’njei bambe bâm pa sâu ze Hethme dage tat ze, 4“I â hesangkedeu’mpeu chang ze aige ningnui ruage lung ze bam de lei; kedei gêsa achu zua gai lau, chidezai a nâu je I bai gai ra hang,” ze kacheu de lei. 5Hethme ne penui je kak ze, 6“A pau gau, anui kuâ ’ngking le lau. Nang anui ruage besuitewpeu peranchibe kau lei; anui gu heraw ramme ruage yilangbe kelâng lu ze ning gu kechaipum bai gai le lau; anui ruage mi-mige leize ning gu kechaipum bai gai ra hangge pe gu heraw peirau ra mak lei; makchai ning gu kechaipum bai gai ra nam ra mak lei,” kacheu de lei. 7Chidadege Hethme, pe deiname dage, Abrahambe chu lu kei’ngkumkeu gai de lei. 8Dadege pa ne penui je, “Aige a gu kechaipum bai gai ra ningnui ne hezuâ gai zai â Zoharbe na Ephronbe je 9pe gu helupua ge Mak-pela kâuki achu zua gai ra kiâm gai lau. Aige ningnui chuna ’nteumena suagene pemî singbe gene achu zua gai ra ’nneu gai lau, chidezai herawloa hangge I lui le ra hang,” kacheu lei. 10Chunage Ephronbe â Hethme je ngua’ntau bam de lei; zai Het’mpeu, Ephronbe ne pe gu namdi keriekemui ge gutme leine, Hethme geseube gene Abrahambe je kak ze, 11“Mak lei, a pau gau, a kuâ ’ngking gai lau; helu I ne ningchu pei gai de lei, zai chige hekâuki bambe ze I ne ningchu pei gai lei; baudime name bambe gene chize I ningchu pei gai lei; ning gu kechaipum ze bai gai le lau,” ze kacheu de lei. 12Kane Abrahambe ne Hethme dage, kei ’ngkumkeu lu, 13haimena seu le ra hangge Ephronbe je, “A kuâ ’ngking gai ra hangge ningchu I kiam lei. I ne ning gu helu ze peluî lui ne ra de lei. Pemî hangge I ne peibe ze lu le lau, dezai chige a nâu je bai ra de lei,” kacheu de lei. 14Ephronbe ne Abrahambe je kak ze, 15“A pau gau, kedei mi â gepût-rangkâng haî medai runne lei, chize â anai kakge ’ndaikau lau? Chige ning nâu je bai gai le zu lau,” ze kacheu de lei. 16Abrahambe ne Ephronbe je hezuâ gai de lei, zai Abrahambe ne Ephronbe hangge baudime seube gene ranggaibe riak luigum ze, helîkahedetme teibe rît luigumbe gene gepût-rangkâng haî medai pa ne ’nchupat kai bei de lei.
17Chigum ze Mamre gene naimik pat ’mbia Mak-pela ge Ephrobe gu helu benai chige hekâuki bambe, zai helupua riâ chang ze helu lungge hechingbang bambe leine Abrahambe gu chang di de lei. 18Hethme chige wangherua gai ze bamme leine ne chize Abrahambe gu kedei chang di de lei be chigaihâ de lei.
19Chidadege Abrahambe ne pe nâu Sarale je Mamre naimikpat ’mbia Mak-pela gu hênam hekâuki (chize Hebron) Kanaan dei ge bai gai de lei. 20Chigum ze helu benai chige hekâuki bambe ze Abrahambe ne herawloa hang luilube dei chang de ra Hethme ne pei gai de lei.
Currently Selected:
JENESIS 23: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
