JENESIS 24
24
Isaakbe Nâu hang Changbe
1Abrahambe â chîng di, zai pe tingkum du misongga tat-hang di de lei; zai mâgetaleine ge Tingwang ne pechu ’nnam gai bei de lei. 2Dadege pe guâ ka’ngguapeu chînglangpeu, pe gu kebambe leine peireige besuitewpeu je pa ne, “A nie kena kakge ning ba kai lu deseu gai lau, 3aige Kanaan dei ge bamme ruagene a na nâu hangge nang kelâng gai ra mak lei be ze Tingwang, tinggîm benai kedeirei leine gu Hera ji gene nang deseu gai ra I lunei lei. 4Achu lungkeugaibe ram ’mbe nang tat ze a kiduîme ruagene a na Isaakbe nâu hang lu himchang ra lei,” ze acheu bei de lei. 5Pe guâ ka’ngguapeu ne pechu, “’Mpuimi ne aipau ram ’mbe a chai suiwang ra hangge pe ki sâu gai meu lêuzai, nang zuapatbe dei ’mbe ning na je I lang gai be ra mei?” kacheu de lei. 6Abrahambe ne kak ze, “A na je chilia ’mbe nang lang gai dai ra mak lei be nang chî sing le lau. 7Tingwang tinggîm Rapeu ne a peu ki gene benai achu lungbe heram gene achu nguapat ze achu ’mpau ze, zai deseu gai ze, zai pa ne ‘Ning chaname hangge aipau ram ze pei gu lei,’ zai hetkai’ndipeu ne ning suage angel’mpeu je lang gai gu lei, zai chigene a na nâu hang nang lu ra de lei, 8kane ’mpuimi zene ning chai suiwang nei mak tizai â nang kadeseube gene ningchu heipatkaibe chang du de lei. Kane ’ndaigum mei sede a na je chilia nang nguatat kai dai mak ra lei,” ze kacheu de lei. 9Chidadege pe guâ ka’ngguapeu ze pe pau Abrahambe nie kena kakge pe ba kai lu Abrahambe ne ranggaibe luigum ze tew ra deseu gai de lei.
10Abrahambe guâ ka’ngguapeu, Abrahambe heu leine peireige besuitewpeu ne pe pau gu put-hu ramme kereu tei lu ze Mesopotamia ge Nahorbe bambe namdi ’mbe tat ti de lei. 11Chige tatchang dege, pa ne put-hu ramme je kukdungkeu ra rang gai bei de lei. Chize ’mpuimi ramme hedui tuakbe hî, hegî ge de lei. 12Dadege pa ne, “Hei Tingwang, a pau Abrahambe Rapeu gau, nemai ge keduîbe achu pei gai lau, zai a pau je du nang kehungbe teilia lau. 13Namdi ge bamme heleume hedui tuak ra patbe bâm aipau dekuaki hiage I la de lei. 14Heleume ruage mige â I ne, ‘I hedui sak kai ra hangge ka’nggia ze ning gu hedui bung heîkeu gai lau,’ acheu bei dezai, pa ne, ‘Sak le lau, dezai ning gu put-hu ramme je du hedui pei gai che lei,’ acheu zai â peize chipaupui je ning gu kebang Isaakbe hangge nang ne kelânggaipui chang de lau. Aige zene a pau Abrahambe je nang ne hungka’ntipbe teilia gai de lei be I chî gu lei,” ze kacheu de lei.
15Pa sa kam mak ze, Rebekale pe keîtoa ge heduibung pua gai lu ze wang de lei. Pa â Abrahambe kinapeu Nahorbe benai pe nâu Milkale na Bethuelbe na heleu’mpui de lei. 16Pa â heleuyi zai leusang-ka’nchibe kau, ’mpeumi je ’nnagaimakbe kau gerei de lei. Dekuaki ’mbe pa wangkeu ze, hedui tuak lu pa wang kadai de lei. 17Abrahambe guâ ka’ngguapeu ne pechu hedau ra pakpat lu, pechu, “Ka’nggia ze ning gu hedui bung gene I sak ra pei lau,” acheu bei lei. 18Pa ne, “A pau gau, sak le lau” kacheu de lei, zai kelua ze hedui bung pe keîtoa gene heîkeu lu, hedui sak ra pei de lei. 19Pa sak lu dege, chi heleu’mpui ne, “Ning gu put-hu ramme hangge du I hedui tuakwang gu lei, dezai penui sak dui tâne peize sak le lau,” kacheu de lei. 20Hekaune hedui sakbe kuak ge pe gu hedui kelua ze let’nrua gai lu, hedui tuak ra dekuaki ’mbe tatdai di de lei, put-hu ramme leine sak ra hedui pei kam gai bei de lei. 21Abrahambe guâ ka’ngguapeu â Tingwang ne keduîbe pechu pei run de mei nune pei mak mei be pe kuâneu mak ze pechu ’nchet bam de lei.
22Put-hu ramme je pa hedui guî kam gai lu dege, Abrahambe guâ ka’ngguapeu ne gechâk gu baroine lupat lu ze heleu’mpui nêu ge ’nnî gai bei, zai gechâkta kena pe ba ge ’nta gai bei de lei. 23Pa ne sa ze, “Nang châu na mei be rang gai lau. Anui rêu ra hangge ning peu ki ge hekisiâm bam gu mei?” ze ka’nneu de lei. 24Heleu’mpui ne, “A peu â Nahorbe benai Milkale na Bethuelbe lei. 25Anui ki ge megau benai hekaune tak misongga ze la zai ningnui bâm hangge du la lei,” ze kak lei. 26Chidadege chipaupeu ze kukdungkeu lu, Tingwang je kellum ze, 27pa ne “Tingwang je toa lau, a pau Abrahambe Rapeu jeu, a pau peireige pa ka’nggiabe benai pa kapelingbe sâu gai mak ze bambe ziegeneu. A peireige du I tebeîtewbe ge Tingwang ne ngua bei ze a pau kiduîme dage nguawangchang gai bei de lei,” ze kacheu de lei.
28Heleu’mpui ne pe pui ki ’mbe paktat ze, aipau rasam leine salia kam gai bei de lei. 29Rebekale kinapeu Labanbe kacheupeu bam de lei, zai pa hela ’mbe paktat ze Abrahambe guâ ka’ngguapeu bambe dekuaki ’mbe paktat ti de lei. 30Labanbe ne pe kinapui nêu ge baroine bambe benai pe ba ge heta ka’ntabe ngau lu zai pe kinapui Rebekale ne, “’Mpeumi ze achu aigum kacheu lei” be sam seu lu dege ’mpeumi tailam tat ti de lei; zai pie le lau, dekuaki ge put-hu ramme taige pa saplaleu de lei. 31Labanbe ne, “A ki lam kei lei, Tingwang ne ’nnamgaibeipeu gau; ’ndaitew ze nang hela ge sapbam lau? A ki ge nang rêurabe kisîam I teleu zun gai ’nde lei, zai ning gu put-hu ramme hangge du pebâm lamui lei,” ze kacheu de lei. 32Chidadege pa Labanbe ki lam’mbe wang di de lei, zai Labanbe ne put-hu ramme put ramme lukeu gai lu penui je megau benai reheuneu ramme guî gai bei de lei. Chidadege pa ne Abrahambe guâ ka’ngguapeu benai pe gu ziemmena pî hui ra hangge hedui teiwang gai bei de lei. 33Tak teu ra dekam gai dege Abrahambe guâ ka’ngguapeu ne “I sarabe sam sa gai mak tâne â I tak teu ra mak lei,” kacheu de lei. Dadege Labanbe ne, “Sa gai zu lau”, acheu bei de lei.
34Chidadege pa ne, “I â Abrahambe guâ ka’ngguapeu lei. 35Tingwang ne a pau je misongga ’nnam gai bei, zai keheupeu tew gai bei de lei. Pe hangge melidung benai kemei dung, kebui ramme, gepût, gechâk, pe gu kebang ’mpeumi ramme, ’mpuimi ramme, put-hu ramme, zai hekunmerângne ramme Tingwang ne pei gai bei de lei. 36A pau nâu Sarale ne pa gechipai di chaine pe dagene ’mpeumi napoine lungkeu gai bei de lei, zai pechu a pau ne pe gu kebambe leine pei kam gai ’nde lei. 37A pau ne pe kuâ pheurabe hangge achu deseu ra rang gai bei ze I kadeseu de lei. Pa ne rang ze, Kanaanme heleume ruagene a na nâu hangge lu se lau, 38kane a peu ki ge benai a kiduîme dage tat ze nang a na nâu hangge lu ra de lei,” ze rang gai de lei. 39A pau je I ne samneu ze, “Acheuzai chi ’mpuimi zene a chai suiwang ra nei mak lêuzai se?” ze I kacheu de lei. 40Pa ne kak ze, “I Pe kuâ pheubampeu Tingwang ne pe gu tinggîm angelme ning dage lang gai gu, zai keduîbe ningchu pei gai gu lei. A na nâu hangge nang a zatme benai a peu kiduîme ruagene lu ra lei. 41Nang kadeseube gene ningchu heipatkairabe ’mpuî â kat runne lei: a kiduîme dage nang tat ze penui ne henâu kai meu lêuzai â nang a dage kadeseube gene ningchu heipat kai bu de lei,” ze kacheu de lei.
42“Nemai ge dekuaki ge I wang dege I kellum ze, ‘Tingwang, a pau Abrahambe Rapeu gau, a tatew peireige achu keduîbe pei gai lau. 43I aige dekuaki hiage lamui lei. Heleu’mpui hedui tuak ra zuapat dezai pe gu hedui bung gene hedui sak ra I kie gu lei. 44Pa ne hezuâ bei, zai a gu put-hu ramme je du hedui pei gai be ra kie lêuzai â peize chipaupui je a pau na nâu hangge nang ne kelânggaipui chang de lau,’” ze I kakellum de lei. 45A lung gene I kakellumbe kamgaimakbe suage Rebekale pe keîtoa ge hedui bung kai lu dekuaki ’mbe hedui tuak ra wangkeu di de lei. I ne pechu, “Ka’nggia ze hedui sak ra pei lau,” ze kacheu de lei. 46Kelua ze pe keîtoa gene pe gu hedui bung teikeu ’nnabi lu, “Sak le lau, dezai ning gu put-hu ramme je du hedui pei be che lei,” pa kacheu de lei. Chidadege I sak te lei, zai pa ne put-hu ramme je du hedui pei bei de lei. 47I ne pechu, “Nang châu na lau?” ze ka’nneu de lei; zai pa ne kak ze, “A peu â Nahorbe benai Milkale na Bethuelbe lei,” ze kacheu de lei. Chidadege I ne pe nêu ge baroine ’nnî gai bei, zai pe ba ge heta ramme ’nta gai bei de lei. 48I kukdungkeu lu ze Tingwang je kakellum de lei. “Tingwang, a pau Abrahambe Rapeu, pe na hangge a pau kiduî’mpeu na heleu’mpui je I peudau le ra nguawanggaipeu je I toa de lei. 49Chidadege chunage a pau kuâ pheu gai zai pe dage lungsang tâ ningnui tew gai ra zai â achu rang gai zu lau; makchai du, achu rang gai lau, dezai ’ndaikau tew ra mei be â I ne ’nning ra de lei,” acheu bei de lei.
50Labanbe benai Bethuelbe ne kak ze, “Aipau deu ze â Tingwang dagene patbe kau daze, anui ne keyi-kesia ’nningdairabe mak te lei. 51Aige Rebekale la de zeî lau; pechu ngua lu ze tatchu lau, Tingwang ne ranggai’ndibe luigum ze peize pa ne ning pau na nâu chang zu lau,” kacheu de lei. 52Abrahambe guâ ka’ngguapeu aize seu lu dege, kei’ngkumkeu lu Tingwang je kakellum de lei. 53Chidadege pa ne paîni zai gepût benai gechâk ne bepuâ tewlube lupat lu Rebekale je pei bei de lei, pe kinapeu benai pe pui je du pa ne kerua pemîhungbe pei bei de lei. 54Chidadege Abrahambe guâ ka’ngguapeu benai pe gu ziemmename teu ze sak lu tingmuî chige rêu de lei. Hechua penui chu dai dege, “Pa ne a pau dage helatwang de ra achu pei zu lau,” kacheu de lei. 55Kane Rebekale kinapeu benai pe pui ne, “Heleu’mpui je beting keduîne, chamlangbe ge hezie kereu riâ gum â anui dage bam gai rî lau, dezai peize tat le lau,” ze kacheu de lei. 56Kane pa ne, “Achu gang ta lau, Tingwang ne a ’mpuî ge keduîbe pei gai bei daze, a pau dage I helatwang dai de ra achu pei zu lau,” kacheu de lei. 57Penui ne, “Heleu’mpui je ku lu, pechu ’nneu gai ra de lei,” ze kacheu de lei. 58Dadege Rebekale je penui ne ku lu, “Aipau peu je nang nguatat nei mei?” ze ka’nneu de lei. Pa ne kak ze, “I tat ku lei,” kacheu de lei. 59Chidadege penui ne Rebekale benai pechu ’nsichupui je Abrahambe guâ ka’ngguapeu benai pe gu ziemmename dage nguatat ra lang gai bei de lei. 60Zai Rebekale je penui ne ’nnam gai ze, acheu sa ze, “Nang anui kinapui, peize nang chang kereume gu heguangme pui chang lau! Peize ning chaname ne penui teureime gu namdi leine lu le lau!” kacheu de lei. 61Chidadege â Rebekale benai pe guâ ka’ngguame heleume ramme zuachu di de lei, zai put-hu ching ge chua gai lu, Abrahambe guâ ka’ngguapeu chai suitat ti de lei.
62Isaakbe â Beer-lahai-roi gene pat lu Kanaan dei gu tingpî ’mbia Negeb ge bam de lei. 63Hegîgai dege kellum ra hangge peningkâm ge pa tatpat te lei, zai ’ngngangrakchu lu pie gai dege put-hu ramme wangbe ngau de lei. 64Rebekale ne Isaakbe je ngaugap dege, pe gu put-hu gene wangkeu di de lei. 65Zai Abrahambe guâ ka’ngguapeu je, “Chi bekâm ge anui tailam tatzuawangpeu ze châu lau?” ze pa ne ka’mmêt te lei. “Pa ze â a pau de lei,” ze Abrahambe guâ ka’ngguapeu ne acheu bei de lei. Chidadege pe peî’ngkumpaî ne pe ju tapnam ’ndi de lei. 66Abrahambe guâ ka’ngguapeu ne Isaakbe je pa tâtewgai’ndibe leine ranglia kam gai bei de lei. 67Dadege Isaakbe ne Rebekale je pe pui Sarale bambe bâm hetiamki ge nguagut kai bei de lei, zai Rebekale ze pe nâu chang di de lei; chigum ze pe pui chaidibe chângge du pe lung tewtemi gai de lei.
Currently Selected:
JENESIS 24: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
