JENESIS 30
30
1Jakobbe hangge, Rakelle, pa hena lungkeumakbe ngau lu dege pe sipui je hemimeu di de lei; zai pa ne Jakobbe je, “A name bam ra pei lau, makchai â I â chai du de lei!” kacheu de lei.
2Rakelle peireige Jakobbe pe râta-desang di de lei, zai pa ne, “Nebâm rachî ning dagene deî’nsau’ndipeu, Hera gu rezie a dage la semei?” acheu bei de lei. 3Dadege pa ne kak ze, “Aige a guâ ka’ngguapui Bilhale lamui lei; pechu ’nrai gai be lau, dezai a hangge lungkeu gai bei ze, pe dagene leusede a name hangge I ngau le ra hangge zeu” kacheu de lei. 4Chidadege pa ne pe guâ ka’ngguapui Bilhale je pe nâu hang pei bei de lei; zai Jakobbe ne pechu ’nrai gai bei de lei. 5Dadege Bilhale Jakobbe na ’mpung ze ’mpeumi napoine lungkeu de lei. 6Chidadege Rakelle ne sa ze, “Hera ne a hang samram’nzei gai bei de lei, zai a kuâ du seu gai bei ze a na ’mpeumi napoine pei bei de lei,” kacheu de lei; Chipauziegene pa ne pe ji hangge Danbe ’ntak kai de lei. 7Rakelle guâ ka’ngguapui Bilhale Jakobbe na ’mpung dai ze ’mpeumi napoine pakenabe lungkeu kadai de lei. 8Chidadege Rakelle ne, “Kahepuabe ranchibe gene a sipui je I kahepua de lei, zai I ne ngam lu de lei,” kacheu de lei, chidadege pa ne pe na ji Naphtali ’ntak kai de lei.
9Leale pa pe na lungsaudibe chî lu dege pe guâ ka’ngguapui Zilpale je Jakobbe nâu hang pei gai bei de lei. 10Dadege Leale guâ ka’ngguapui Zilpale ne Jakobbe na ’mpeumi napoine lungkeu de lei. 11Zai Leale ne, “Mi paukaregabe!” kacheu de lei, chidadege pe ji hang Gadbe ’ntak kai de lei. 12Leale guâ ka’ngguapui Zilpale ne Jakobbe na ’mpeumi napoine pakenabe lungkeu de lei. 13Zai Leale ne, “I â suiyi-desang lei! Hêpuime ne achu pe suiyipui ze kû gu daseu,” kacheu de lei; chidadege pa ne pe na ji Asherbe ze ’ntak kai de lei.
14Dekuîmeu gatbe ting ge Reubenbe ne helu tat ti ze mandrek (’ngnguiheu) bang ramme ngaudau de lei, zai pe pui Leale dage teiwang de lei. Dadege Leale je Rakelle ne, “I ningchu kiâm lei, ning na gu mandrek heu ramme a hang gêsa pei lau,” kacheu de lei. 15Kane pa ne pechu, “A napeu je nang ne sut-tattibe ze mâ-kecheîne semei? A na gu mandrek heu bang ramme ’nsangdu nang ne sut-tat dai ra semei?” kacheu de lei. Rakelle ne, “Acheuzai â ning na gu mandrek heu bang mî hangge pechu peize ning dage jei gai le lau,” ze acheu bei de lei. 16Hegî ge Jakobbe helu ’mbene wang dege, Leale pechu suidaupat lu, pechu, “A dage nang jei himchang ra lei; a na gu mandrek heu ramme ne ningchu I ne lui lu daseu,” kacheu de lei. Chidadege chipau mai tingmuî â Jakobbe pe dage jei de lei. 17Zai Leale kuâ Hera ne kak kai bei de lei, zai pa Jakobbe na ’mpung ze ’mpeumi napoine pamengeube lungkeu de lei. 18Leale ne sa ze, “Hera ne a hangge pemî pei bei de lei, a napeu hangge a guâ ka’ngguapui je peibeibe ziegeneu” ze kacheu de lei; chidadege pe ji hang pa ne Issakarbe ze ’ntak kai de lei. 19Zai Leale ’mpung kadai de lei, zai pa ne Jakobbe na paserukbe lungkeu de lei. 20Chidadege Leale ne, “Hera ne pe gu kela keyibe a hangge pei gai bei de lei; chuna â a napeu ne achu hengêutew gu de lei, I ne pe na ’mpeumi hangseruk lungkeu gai bei daseu,” ze kacheu de lei; dadege pe ji hang pa ne Zebulunbe ze ’ntak kai de lei. 21Chipau chângge pe na ’mpuimi lungkeu de lei, zai pe ji Dinale ’ntak kai de lei. 22Chidadege Rakelle je Hera ne ’nningtâu gai de lei, zai Hera ne pe kuâ kak kai bei, zai pe gu nebâm lat kai bei de lei. 23Pa ’mpung di de lei, zai ’mpeumi napoine lungkeu de lei, zai pa ne, “Hera ne a duânggabe tei’mbia ’ndi de lei!” kacheu de lei; 24zai pe ji hang Josepbe ’ntak kai de lei, pa ne, “Tingwang ne peize a hangge ’mpeumi napoine kêdabe peisî gai lau,” kacheube lam gene ’ntak kai de lei.
Labanbe dage Jakobbe Samriagaibe
25Rakelle ne Josepbe je lungkeulube châng dege, Labanbe je Jakobbe ne, “Achu ’mpat kai zu lau, dezai â ki benai a ram ’mbe I zuamie dai ra hangge zeu. 26A nâu ramme benai a name ning dagene I ne ’ngguahilube ramme achu pei zu lau, zai achu tat ra pei zu lau; ning guâ I ’ngguagai’ndibe nang chikâ la daseu,” kacheu de lei. 27Kane Labanbe ne pechu rang ze, “Nang ne sa ra lun bei zai â I sa ra de lei, ning ziegene Tingwang ne achu ’nnam gai bei de lei be I hedachakbe gene chî lu de lei. 28Ning zie mî rang lau, dezai chize I pei bu lei,” kacheu de lei. 29Jakobbe ne kak ze, “’Ndaigum ze I ning guâ ka’nggua mei zai ’ndaizeuge a dagene ning gu peruidung ze pung-ze-sapat ti de mei be ning runne chikâ la de zeî lau. 30I wang mak-’ngka â gechâmne runne ning gu bam da zai chuna â misongga pungpat ti de lei; I tatkai-kaibe bâm ge Tingwang ne ningchu ’nnam gai bei de lei, kane ’ndaidau ne a ki-kelak tâu ka’nnangbe hangge du I peigaichi le ra se lau?” kacheu de lei. 31Labanbe ne, “Ning hang I ’ndaikau pei ra lau?” kacheu de lei. Jakobbe ne, “Mâ de nang achu pei se lau; nang ne a hangge aize pheu gai bei zai â I ne ning gu kauruidung je ’ngkut ze reî dai ra de lei: 32nemai ge ning gu kauruidung leine ruage I tatruatuipik kai ze chige meli pegiakpungbe benai pegiak châmbe taureu-reube zai meli’nsei tikbe leine, zai kemei dung ruage pegiak kaperiebe benai pegiak taureu-reube leine I kepachâm gai ra de lei, chize a hî ramme hang de lei. 33Chidezai I lungsangtewbe ne bechâng dezai achu sagu gai gu lei, ning dage a hî ngaulube ramme nang pie ra wang dezai neu. Kemei ramme ruage pegiak kaperiebe benai pegiak taureu-reube gabe zai meli’nsei poine ramme tikmakbe leine a dage ngaudau lêuzai â kahegabe hangge riam gai ra de lei,” ze kacheu de lei. 34Labanbe ne, “Yi de lei, nang ne rangbe luigum ze peize acheu ra de lei,” kacheu de lei. 35Kane chipau mai ge Labanbe ne kemei’nsei ramme pegiak perierikbe benai pegiak taureu-reube ramme leine zai kemeipui ramme pegiak perierikbe benai pegiak taureu-reube ramme, kehâbe giak pungbe leine, zai meli ramme tikbe leine lupatchâm lu, pe name ne kereîbe kangge kai ’ndi de lei; 36zai pa â Jakobbe benai penai kakge hezie kechumne-beî kak riâ ’mbe tat ti de lei; zai Labanbe gu kauruidung ka’nsakbe leine je â Jakobbe ne reî ze bam de lei.
37Chidadege Jakobbe ne poplar bang keî, Almon bang keî, zai plan bang keî ramme lu lu, zai pegei ramme gêsa â gâu lu, hingbang keî hâbe ramme naichiêpu gai de lei. 38Kauruidung hedui sak ra wangka’nsuibe bâm hedui buâk suage chipau heching keî ramme pa ne pegei gâu-perieriklube kai bei de lei, chige hedui sak ra penui wang dezai penui guaka’nsuibe ziegeneu, 39chi heching keî ramme suagene penui gua gua de lei, zai chipau gene kaurui ramme dage pegiaktewbe, kaperiebe zai pegiak taureu-reube ramme lungkeu kêu de lei. 40Jakobbe ne melipoine ramme teichâm gai lu, zai kauruidung je pegiaktewbe lam’mbe zai Labanbe gu kaurui tikbe ramme lam’mbe tei’nrik kai bei de lei, zai pe gu kaurui ramme je â kum’mbia ’ndi de lei, zai Labanbe gu kauruidung ge â kaiherua ta di de lei. 41Melidung ruagene peleuyibe ramme guabe luage meli ramme ngaube ge heduibuâk ge Jakobbe ne heching ramme kai bei de lei; dezai hechingkeî ruage penui gua le ra hangge zeu. 42Kane meli peran-gabe ramme suage â pa kai mak lei; chidadege peran-gabe ramme ze Labanbe gu chang di, zai peranchibe ramme ze Jakobbe gu chang di de lei. 43Chigum ze Jakobbe â heu-kadesangpeu chang di de lei, zai kaurui ramme, pe guâ ka’ngguame ’mpeumi ramme, zai put-hu benai hekunmerângne ramme misongga bam di de lei.
Currently Selected:
JENESIS 30: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
