JENESIS 31
31
Labanbe dagene Jakobbe Pakbe
1Labanbe name ’mpeumi ramme ne, “Jakobbe ne anui peu gu kebambe ramme leine lu kam de lei; zai anui peu gu keheube ramme gene aigumbe keheube pa ngau de lei,” kacheube Jakobbe seu di de lei. 2Zai besua’ngka gum â Labanbe ne pechu ’nchâ ta di de lei be Jakobbe ngaupat ti de lei. 3Chidadege Tingwang ne Jakobbe je, “Ning peu benai ning kiduîme lungbe ram ’mbe helatwang dai de zu lau, zai ning dage I bam gu lei,” acheu bei de lei. 4Chidadege Jakobbe ne sam lang gai ze pe gu kaurui ramme kadeteube bâm peningkâm ge Rakelle benai Leale je kûwang gai de lei, 5zai pa ne penai je, “Besua’ngka ge achu ka’nchâ gum ze chuna â ningnai peu ne achu ’nchâ ta di de lei be I ngau de lei, kane a peu Rapeu a dage nguabam lamui rei lei. 6A ran leine ne ningnai peu guâ I ’nggua gai de lei be ningnai â chî lei; 7acheubeisede ningnai peu ne achu choa ze a hî ngaurabe gene lua kereu tewkeli ’ndi de lei, kane achu tew’nsia ra Hera ne pechu lun mak tai de lei. 8Pa ne, ‘Pegiak taureu-reube ze ning hî hang de lei,’ ze acheu bei zai â kaurui ramme leine ne pegiak taureu-reube ramme ’nniadiak kai di tai lei; zai pa ne, ‘Pegiak perierikbe ramme ze ning hî hang de lei’ ze acheu bei zai du, kaurui ramme pegiak perierikbe ramme ’nniadiak kai di tai lei. 9Aigum ze ningnai peu gu kauruidung ze Hera ne lutat lu, chiramme ze achu pei gai bei de lei. 10Kaurui guabe ting ge a mik raklep chu gai de lei, zai a mang gene kaurui dung peireige kemei’nsei ramme pegiak pungbe, taureu-reube zai perierikbe ramme ne kumrua bambambe I ngau de lei. 11Chidadege a mang ka’mmibe gene Hera gu tinggîm angel’mpeu ne achu, ‘Jakobbai,’ ze kacheu de lei, dadege I ne ‘Aige I la lei!’ ze kacheu de lei. 12Chidadege pa ne, ‘Ning mik rakpat ze pie gai ni lau, kemei ramme pedung ruage ’nsakrua ze kumruabambe leine ze pegiak pungbe, taureu-reube zai perierikbe ’nnia de lei; ning peireige Labanbe ne tâtewbe ramme leine I ngau kam lu daseu. 13I â tingchutum ge nang taudui ’nnuk kai ze a dage deseugaibe bâm Bethel Rapeu lei, chunage zuachu zu lau, aipau dei gene zuapat ze ningchu lungkeugaibe heram ’mbe helatwang dai zu lau,’ ze kacheu de lei” ze kacheu de lei. 14Chidadege Rakelle benai Leale ne pechu kak ze, “Anai peu ki ge hedam mei nune mi heurâ mei ze anai hangge ’nsak kai ze la semei? 15Anai je â hesangme je gum ze pa ne chak kai mak semei? Pa ne anai je zua lu, zai anai hang peibe rangkâng ze du pa ne tew’ngga kam ’ndi daseu. 16Anai peu dagene Hera ne lutat’ndibe heurâ ramme leine anai benai anai name gu chang de lei. Chunage chidaze ningchu Hera ne ’ndaikau rang gai mei be, chize tew zu lau,” kacheu de lei.
17Dadege Jakobbe zuachu lu, zai pe name benai pe nâume je put-hu ching ge kai de lei; 18zai pe peu Isaakbe tailam, Kanaanram ’mbe tat ra hangge Paddan-aram ge pa bambe ting gene pe gu kaurui ngaulube zai pa ne ’ngkut’ndingpatlube kauruidung leine kumtat ti de lei. 19Labanbe â pe gu meli gêu chiap ra tat ti de lei, zai Rakelle ne pe peu ki gu hera ramme kahega de lei. 20Zai Jakobbe ne Aram’mpeu Labanbe je choa ’ndi de lei, pa pak te ra ka’nning lei be pechu salia mak dadegeu. 21Pe gu kebambe leine tei lu pak’mbiatat ti de lei, zai zuachu ze Euphrates geuki katat ti de lei, zai Gileadram peloaram ’mbe tatzua di de lei.
Jakobbe je Labanbe ne Guaka’nchube
22Jakobbe pak ti de lei be pakechumbe mai dege Labanbe je rang gai bei dadege, 23pe kiduîme, (pe sikiname) je ngua lu hezie sena pechu gua’nsatat ze Gileadram peloaram ’mbia pe chai guachaptat ti de lei. 24Kane tingmuî ge pe mang gene Aram’mpeu Labanbe dage Hera ne wang lu ze, pechu rang gai ze, “Jakobbe dage keyibe sam mei nune kesiabe sam mei be samkie kat du nang sa gai mak ra lei be ’ntîng le lau,” ze acheu bei de lei. 25Zai Jakobbe je Labanbe gua’nsachang di de lei, zai Jakobbe â peloa’ntûm ge pe gu paîki liâm gai lu bam lei, zai Labanbe â Gileadram peloaram ge paîki liâm gai lu bam de lei. 26Zai Jakobbe je Labanbe ne, “Nang achu duai zai herei gene nîm’ndime je gum ze a na ’mpuimi ramme je nang ne nguatattibe ze a peireige nang ’ndaikau tew gai lau? 27’Ndaitew ze nang ’mbaipak, zai achu duai, zai achu mâ de ranglia mak lau? Chidezai hesuiyibe benai heleutewbe gene ’nsum benai ’nrabung tei lu ningchu gepâu gai be ra hangge zeu? 28Zai I a na ’mpeumi ramme benai ’mpuimi ramme je kageputbe gene gepâu gai ra ’ndaitew ze nang achu pei mak lau? Chunage kemiebe tâ nang tew gai de lei. 29Ningchu tew’nsiarabe rezie a ba ge lamui de lei; kane ’nzimai tingmuî ge ning peu Rapeu ne achu rang gai ze, ‘Keyibe mei nune kesiabe mei du Jakobbe peireige sa gai se lau,’ ze kacheu de lei. 30Zai chunage nang ning peu ki je huîbe ziegene tat ti de lei, kane a gu hera ramme ’ndaitew ze nang kahega lau?” kacheu de lei. 31Labanbe je Jakobbe ne kak ze, “Ning name ’mpuimi ramme je ’nchi-chine a dagene nang ne sut-tat te ra gum I ’nning gai lu hingdibe ziegene de lei. 32Mige dagene ning gu hera ramme peudau dizai â pechu peize ring ra mak lei, anai sikina bambe suagene ’ndaikau ning gu I ne tei’ndibe la mei be pie lu ze chize tei le lau” ze kacheu de lei. Chiramme Rakelle ne hega ’ndi de lei be Jakobbe â chî mak dadegeu.
33Chidadege Jakobbe gu paîki ge Labanbe tatgut kai, zai Leale gu paîki ge gut kai, zai ka’ngguapui kena gu paîki ge gut kai de lei, kane mâ de peupat mak tai de lei. Zai Leale gu paîki gene pa pat lu, Rakelle gu paîki ge gut ti de lei. 34Zai Rakelle ne pe ki gu hera ramme ze tei lu put-hu ching ge bâm lungge kai lu, pe peireige ’ntauchim ’ndi de lei. Labanbe ne paîki peutuipik kai lu, kane peudau mak te lei. 35Zai pe peu je pa ne rang ze, “Ning masuage I sapchuchilaktibe ziegene a pau je peize pe râta se lau, a dage I a nîsiabe la daseu” ze kacheu de lei. Chidadege pa peurua gai ze, pe ki gu hera ramme peudau mak tai de lei.
36Chidadege Jakobbe pe lumpum di ze Labanbe je geikang de lei; Jakobbe ne Labanbe je, “A mâu ’ndaikau la lau? A gu hemui ’ndaikau lau, nang achu gua’nchumiebe zeu? 37A gu merua ramme getai-piekamgailube chângge ning ki gu merua ramme ruage gadibe ’ndaikau peudau lau? Anai hangna kakge samram ra hangge ning sikiname benai a sikiname kakge kai le lau. 38Ning dage I tingkum ’ngkai bam de lei; ning gu melipui ramme benai kemeipui ramme penui na lung’nsia’ndibe tew me lei, zai ning gu kauruidung gene meli’nsei ze du I langteu me lei. 39Hekaune ne tewchat’ndibe â ning dage I teiwang gai mak te lei, chi gadibe mî ze I ne ka’nzua de lei; ’nrîmbeting gene mei nu tingmuî gene mei ze hegatattibe ze a dagene nang ’nzuakie de lei. 40Chigum ze I bam de lei; ’nrîmbeting ge kelumbe ted lie, zai tingmuî ge heta’nggi ze, zai jeikeulak ze bam de lei. 41Aigum ze tingkum ’ngkai ning dage I bam de lei; ning na ’mpuimi hangna hanggene tingkum kereu ze medai ning guâ ’nggua zai ning gu kauruidung hanggene tingkum seruk bam gai de lei; zai I tâtewgaibe hî ramme nang ne lua kereu tewkeli ’ndi de lei. 42A peu Rapeu, Abrahambe Rapeu zai Isaakbe gu ’nnamgaibe a dage bam mak nung laîzai â, a barua ze nang achu langpat kai sing leu gu de lei. Hera ne I kahereube liebe benai a ba ne tâtewhereugaibe ngau di de lei, zai ’nzimai tingmuî ge ningchu ’ngngiam bei de lei,” kacheu de lei.
Jakobbe benai Labanbe kakge Samriagaibe
43Chidadege Labanbe ne kak ze Jakobbe je, “’Mpuimi ramme ze a na ’mpuimi ramme da, kauruidung ze a gu kauruidung da, zai napoine ramme ze a gu napoine ramme da, zai nang ngaube ramme leine ze du a gu de lei. Kane nemai ge ai a na ’mpuimi ramme, zai penui ne lunkeugaibe na ramme je ’ndaikau I tewgaichi dui lau? 44Kei samhatbe tew gai kei lei; zai chize ne nang benai anai kakge peize sakki chang ra de lei,” ze kacheu de lei. 45Chidadege Jakobbe ne tingchukâng tei lu, chibamrabe hangge sum gai de lei. 46Zai Jakobbe ne pe sikiname je, “Tingchu ramme kua’ndui gai lau” ze acheu bei de lei. Zai penui ne tingchu ramme teiwang lu kua gai bei de lei; zai chi tingchu kuagaibe tum gene penui mâ-teu de lei. 47Chi je Labanbe ne, Jegar-sahadutha ze ku de lei: kane Jakobbe ne Galeed ze ku lei. 48Labanbe ne, “Nemai ge nang benai anai kakge ai tingchukâng zene sakki chang de lei,” ze kacheu de lei. Chipauziegene chi je, pe ji Galeed benai Mizpa ze pa ne ’ntak kai de lei, 49zai pa ne acheu sa ze, “Nang benai anai kakge anai kat-kat dagene bamchâm ze bambe luage peize Tingwang ne reî ze bam lau. 50A na ’mpuimi ramme je nang tewkahereu mei nune a na ’mpuimi ramme bambe peireige kêdabe kau ramme je du ning nâu hang lu mei dizai â mî de anai dage ga sedu nang benai anai kakge Hera ne sakkitewbe chî le lau,” ze kacheu de lei. 51Zai Labanbe ne Jakobbe je, “Aipau tingchukoa benai tingchusum nang benai anai kakge I kai’ndibe pie le lau. 52Aipau tingchukoa zene sakki de lei, zai aipau tingchusum zene du sakki de lei, kat-kat je tew’nsiarabe hanggene ning tailam aipau tingchukoa ze I tat’ngkapat mak ra zai nang du aipau tingchukoa benai tingchusum gene a tailam tat’ngkapat mak ra hangge zeu. 53Abrahambe Rapeu zai Nahorbe Rapeu, penui peume Rapeu zene peize anai kakge samram lau” ze kacheu de lei. Chidadege Jakobbe ne pe peu Isaakbe kakellumbe Rapeu ji gene deseu gai de lei, 54zai peloa’ntûm ge Jakobbe herâtew gai de lei, zai pe sikiname je tak (tingku) teu ra kû gai de lei; zai penui tak (tingku) teu gai lu chipau deiloa’ntûm ge kâujei gai di de lei. 55Hechuasûn ’mpuimi kena je keput kai lu, pe chame benai pe na ’mpuimi kena je keput kai lu ze penui je ’nnam gai de lei; chidadege â pa rimnatat ze pe ki lam helatwang dai di de lei.
Currently Selected:
JENESIS 31: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
