JENESIS 32
32
Esaube je Hedau ra Jakobbe Kedâkuabe
1Jakobbe pe gu ’mpuî luî tat ti de lei, zai Hera gu tinggîm angelme pechu kahedau de lei; 2zai penui je Jakobbe ngau lu dege pa ne, “Aize Hera gu hereikangme de lei!” kacheu de lei. Chipauziegene chipau bâm ji ze Mahanaim ze pa ne kû gai de lei.
3Zai Jakobbe ne pe sipeu Esaube Seir dei, Edomram ge bambepeu tailam tat ra hepâupaume je lang’ntua gai ze, 4penui je acheu geteilia gai ze, “Aigum ze a pau Esaube je ningnui salia ra lei: ning guâ ka’ngguapeu Jakobbe ne aigum ze rang lei, ‘Labanbe dage I rêu ze bam de lei, zai chuna riâ chang ze bam de lei; 5zai a dage getumsei ramme, hekunmerângne ramme, kaurui ramme, zai ka’ngguame ’mpuimi benai ’mpeumi lamui lei; zai a pau dage pau’ntua gai ra I lang gai de lei, chidezai ning mikngau ge a peireige ning suiyibe ngau le ra hangge zeu’ ze acheu zeu” ze kacheu de lei.
6Zai hepâupaume Jakobbe tailam helatwang dai lu, acheu sa ze, “Ning sipeu Esaube tailam anui tat te lei, zai ningchu hedau ra pa wang mui de lei, ziemmena haî medaime je ngua lu zeu,” ze kacheu de lei. 7Chidadege â Jakobbe hing-desang di ze pe lunghereu di de lei; zai pe dage bambe ziemmena zai kauruidung zai getumdung ramme benai put-hu ramme je bau na ’nzipâng gai de lei, 8acheu sa ze, “Bâu kat dage Esaube wang lu tew’nsia lêuzai â ’nsakkaibe bau ze â pak te ra de lei,” ze kacheu de lei.
9Zai Jakobbe ne sa ze, “Hei a peu Abrahambe Rapeu zai a peu Isaakbe Rapeu gau, ‘Ning ram ’mbe zai ning kiduîme lam helatwang dai zu lau, dezai ning hang mâ-keyibe I tew gai gu lei,’ ze kacheube Rapeu gau, 10ning gu hungka’ntipbe leine benai ning gu lungsangtewbe ze ning guâ ka’ngguapeu je nang teiliabe cheilangbe riâ du I â ngaubuimakbe kau lei, a gu hetui runne tei lu aipau Jordan geuki I kapat te lei; zai chunage â a gume bau na la de lei. 11Ning dage I kie lei, a sipeu, Esaube ba gene achu lupat kai lau, pechu I hing daseu, anui ’nteumena zai hêpuime benai penui name je pa ne gîchat kam gai mak ra hangge zeu. 12Kane nang ne acheu ze rang gai ze, ‘Keyibe ning hangge I tew gu lei, zai ning chaname sungkling gu hegitmoîne misongga seikamlak bambe gum ze bam ra tew gai gu lei,’ kacheu dezei lau” ze kacheu de lei.
13Chidadege chige chipau mai mui â pa rêu de lei, zai pe dage bambe gene pe sipeu Esaube hang kela pei ra 14kemei meleu haî na benai, kemei’nsei ’ngkai, meli meleu haî na benai meli’nsei ’ngkai, 15tungdui teube put-hupui himreu benai bepoine ramme, getumpui hedai benai getumsei kereu, hekunmerângpui ’ngkai benai besei kereu pa lupat kai de lei. 16Airamme ze pa ne pedung-dung tewchâm kam lu ze pe guâ ka’ngguame ba ge pei gai de lei, zai pe guâ ka’ngguame je rang gai ze, “A sua raîtatchu lau, zai pedung ramme kak teichâm kam gai lu tat lau,” ze kacheu de lei. 17Tatpatrairapeu je pa ne geteilia gai ze, “Ningchu a sipeu Esaube hedau lu ’nneu ze, ‘Ningnui châu gume lau? Ningnui ’ndai’mbe tat ra lau? Zai ningnui suage airamme bambe ze châu gu lau?’ ze acheu dezai, 18nang ne, ‘Airamme ze ning guâ ka’ngguapeu Jakobbe gu lei; airamme ze â a pau Esaube hangge kela langgaibe kau de lei; zai pa du anui chai ge pat lamui de lei,’ acheu be lau,” ze rang gai de lei. 19Chipau luigum ze pakenabe benai pakechumbe bau zai kêdame kauruidung chai suitatme leine je getei gai ze, “Esaube je ningnui hedau dezai aipau luî ze ningnui sa ra lei, 20zai ningnui ne, ‘Ning guâ ka’ngguapeu Jakobbe du anui chaige pat mui de lei,’ ze acheu lau” ze rang gai de lei. Pa ne, “A suage lang’ntuagaibe kela zene pe suitew’mmi gu lei, zai pechu I ngauhedau gu lei; pechu hedau ra achu lun gai leu gu lei,” ze pa ’nninggaibe ziegeneu. 21Chidadege pe gu kela ramme pa sua ’ntua ze tat ti de lei; zai pa du chipau mai tingmuî ge tejeîbâm ge kâujei gai de lei.
Peniel ge Jakobbe Kahepuabe
22Chipau mai muî ge pa chu lu pe nâu hangna pe guâ ka’ngguapui hangna zai pe name hangkereu ze kat je ngua lu, Jabbok geuki depiau gene kapat ti de lei. 23Pa ne penui je ’nggeuki nguagepâupat kai de lei, zai chigum ze pe gu kebam leine teikapat kam gai de lei. 24Zai Jakobbe â pe runne bam kahekap te lei; zai hangkatpeu ne pechu hepua tingbabak kai de lei. 25Chipaupeu ze Jakobbe je pa dui lak te lei be chî lu dege, pa ne Jakobbe ’ngkoa getau bei de lei; dadege pechu kahepuabe luage Jakobbe ’ngkoa kerîng di de lei. 26Chidadege pa ne, “Tingba de da ze achu ’mpat kai zu lau,” kacheu de lei. Kane Jakobbe ne, “Achu nang ne ’nnam gai makchaine â ningchu I ’mpat ra mak lei,” acheu bei de lei. 27Dadege pa ne, “Ning ji ’ndaikau lau?” kacheu de lei. Zai pa ne, “Jakobbe lei,” ze kak te lei. 28Chidadege pa ne, “Ning ji Jakobbe ze kû ta ra de lei, kane Israelbe ze kû ra de lei, Hera benai ziemmena je nang ne hepua ze duî lu daseu,” ze kacheu de lei.
29Chidadege Jakobbe ne pechu, “Ning ji achu ranglia ra I kiam lei,” ze kacheu de lei. Kane pa ne sa ze, “’Ndaitew ze nang a ji ka’nneu lau?” kacheu de lei. Chidadege chigene pa ne pechu ’nnam gai bei de lei. 30Chidadege Jakobbe ne chipau bâm ji ze Peniel ze ’ntak kai de lei. Acheu sa ze, “Hera je I ngauhedau lu da acheusede a keringbe â ’nzuak kai bei de lei,” ze kacheu de lei. 31Pa ’ngkoa siadibe ziegene Peniel ge telua ze tatbe luage naimik pat’ngngu di de lei. 32Chipauziegene chuna riâ chang ze Israelme â pagechikbutra â teu mak lei, Jakobbe ’ngkoa gechikbutra deîtau’ndibe ziegeneu.
Currently Selected:
JENESIS 32: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
