JENESIS 37
37
Josepbe benai Pe Sime
1Jakobbe â pe peu lunggaileube dei Kanaanram lungge lung ze bam di de lei. 2Jakobbe kiduîme rasam ze aize de lei.
Josepbe, pe tingkum kereu ze sena chang di dadege, pe sime je kaurui nguareî ze bam de lei, pa â pe peu nâu Bilhale benai Zilpale na ’mpeumi ramme je ngua-rehang’nsam ze bam de lei; zai Josepbe ne pe sime rasam kesiabe ze penui peu je pau gai bei de lei. 3Pa gechîng chaine lungkeube na changbe ziegene Israelbe ne Josepbe je pe na kêdame leine je suadu hungka’ngkeu de lei; zai pa ne Josepbe hangge mechuatiebe heziak tewlube teleu gai de lei. 4Kane pe sime leine je sua â pechu penui peu ne hungka’ngkeu lei be pe sime chî lu dege pechu penui ngaugailak ti de lei, zai yine ze pechu ’mpauchi ta di de lei.
5Chidadege Josepbe hemang ka’mmi de lei, zai pe sime je pa ne chize salia bei dege â penui ne pechu ngaugailak’nteu di de lei. 6Pa ne penui je, “I hemang ka’mmibe ’ngking le lau: 7Ni, anui helu ge mekum pi bam de lei, zai pie le lau, a mekum zuachu ze sap’nzeitun ze bam de lei; zai ni, zai chi je ningnui mekum ramme ne bamguâ lu, a gu mekum suage kei’ngkumkeu gai de lei,” ze kacheu de lei. 8Pe sime ne pechu, “Nang ne anui peireige heguang ra run de semei? Makchai, nang ne anui peireige samram ra run de semei?” ze kacheu de lei. Chidadege pe mang ramme benai pe sam ramme ziegene penui ne pechu ngaugailakbe-ranbi-bi di de lei. 9Chidadege pa hemang kêdabe ’mmi kadai de lei, zai chize pe sime je pa ne salia bei de lei, zai acheu sa ze, “Ni, kêdabe mang I ’mmi kadai de lei; zai ni, naimik, hekêu, zai hegi kereu ze kat zene a suage kei’ngkumkeu ze achu kakellum de lei,” ze kacheu de lei. 10Kane pa ne chize pe peu benai pe sime je salia bei dege, pe peu ne pechu ’ngngiam ze, “Nang hemang ka’mmibe ze ’ndaikau mang lau? Ning pui anai zai ning sime anui ’nteumena ning suage kedei ge kei’ngkumkeu ze kellum ra run de semei?” ze kacheu de lei. 11Zai pechu pe sime ngaugailak ti de lei, kane pe peu â chi sabe ze pe lung ge kai lu bam de lei.
Josepbe je Zuabe zai Ijipram Teitattibe
12Chunage pe sime â Shekem hiage penui peu gu melidung je reîtat ti de lei. 13Zai Israelbe ne Josepbe je, “Ning sime Shekem ge melidung je reî ze la mak semei? Wang lau, ningchu penui tailam I lang gai gu de lei,” ze kacheu de lei. Zai pa ne pechu, “I aige la lei,” ze kacheu de lei. 14Chidadege pe peu ne pechu, “Chuna tatchu lau, ning sime benai kauruidung yi ze la mei pie gai ni lau; zai a dage sam pauchang dai lau,” ze kacheu de lei. Chidadege pa ne pechu Hebron chuak gene langpat kai bei de lei, zai Shekem ge pa wang de lei. 15Zai hênamram ge pa kezitrua lage, hangkatpeu ne pechu ngaudau de lei; zai chipaupeu ne pechu, “Nang ’ndaikau peu lau?” ze ka’nneu de lei. 16“A sime je I peu lei, achu rang gai lau, ningchu I kiam lei, kaurui je ’ndaige penui reî ze la lau?” ze pa kacheu de lei. 17Chipaupeu ne, “Penui â tat te lei, ‘Dothan ’mbe tat kei lei’ ze kacheube I seu lei,” ze kacheu de lei. Chidadege pe sime chai Josepbe suitat ti de lei, zai Dothan ge penui je ngaudau de lei. 18Kedeu ’mbene pechu penui ngaudau di de lei, zai penui dage pa wang’nna makge pechu tewchat ra penui ka’nriam de lei. 19Penui karai acheu sa ze, “Ai hemang ka’mmipeu aige wang mui de lei. 20Chunage kei lei, pechu tewchat lu ze hûm ramme ruage kat ge tuâ gai ne kei lei; dezai hekaune ne pechu ’nsia ’ndi de lei ze anui salia ra hangge zeu, chidezai pe mang ramme ’ndaikau chang gu mei be anui pie ra de lei,” ze kacheu de lei. 21Kane chize Reubenbe seu lu dege, penui ba gene pa ne pechu lupat kai de lei, pa ne, “Pa keringbe anui lu mak kei lei,” kacheu de lei. 22Zai Reubenbe ne penui je, “Hejai tewpat kai se lau; tingkangram ge aipau hûm ge pechu tuâ gai be lau, sede hebahuâ â kai se lau,” ze kacheu de lei—pa ne pechu penui ba gene tew’nringpat kai lu pe peu dage pei gai dai be ra hangge neu. 23Chigum ze pe sime dage Josepbe wangchang dege, penui ne pe gu mechuatiebe, heziak tewlube mechuatiebe pa kaibe ze gâutua ’ndi de lei; 24zai penui ne pechu tei lu hûm ge tuâ gai ’ndi de lei. Hûm ze perua zai hedui du ga lei.
25Chidadege tak teu ra penui ’ntaukeu gai de lei; zai ’ngngangrakchu gai dege Gilead ’mbene Ishmaelme put-hu ching gene wangbe penui ngau de lei, Ijipram ’mbe teikeu ra hangge penui gu put-hu ramme ge reheu perîmyibe, taudui, zai mâ-perîmyibe ramme pung lu wang de lei. 26Chidadege Judabe ne pe sime je, “Anui kinapeu je tewchat lu pe chit teikebai gai leuleize ’ndaikau kegiebe la lau? 27Kei lei, Ishmaelme dage pechu zua gai be kei lei, zai pe peireige anui bahuâ kai mak kei lei, pa â anui kinapeu da, zai anui jai di daseu,” ze kacheu de lei. Zai pe sime chipau kuâpheu gai de lei. 28Chipau luage Midianme helîkahedetme tatwang de lei; zai penui ne Josepbe je hûm gene lupat kai de lei, zai gepût-rangkâng ’ngkai hangge Ishmaelme dage pechu zua gai bei de lei; zai Josepbe je penui ne Ijipram ’mbe teitat kai ’ndi de lei.
29Reubenbe hûm ’mbe wang dai lu, zai Josepbe hûm ge gabe chî lu dege â pe paîni ramme hit ze 30zai pe sikiname tailam wang lu, zai pa ne sa ze, “Rehang’mpoine â ga de lei; zai I se, I ’ndai ’mbe tat kai ra lau?” ze kacheu de lei. 31Chidadege Josepbe gu mechuatiebe penui ne tei lu, zai kemei tewchat lu zai chi mechuatiebe ze hejai ge sûm gai de lei; 32zai mechuatiebe heziak tewlube mechua ze ’mput kai ze penui peu dage teiwang lu acheu sa ze, “Anui ne aize ngaudau de lei, aize ning na gu mechua mei, nune mak mei be pie gai ni lau,” ze kacheu de lei. 33Zai pa ’nchetchi lu de lei, zai pa ne, “Aize a na gu mechuatiebe de lei; hekaune ne pechu ’nsia ’ndi de lei; Josepbe je â kuipânghakhai gai bei sing de lei,” ze kacheu de lei. 34Chidadege Jakobbe pe paî ramme hit, zai miseigiriapaî pe kia ge kak lu, beting misongga pe na je desui ze bam de lei. 35Pe lung tewhegei gai ra pe na ’mpeumi ramme benai ’mpuimi ramme wang de lei; kane pe lung tewhegei gai be ra pa ne lun mak lei, zai acheu sa ze, “Desui ze a na tailam Kechaiberam ’mbe I wangkeu gu lei,” ze kacheu de lei. Aigum ze pe peu ne pechu puîhap bam de lei. 36Acheulage Ijipram ge Pharaobe je reîme ruage saibe, Potipharbe dage Midianme ne pechu zua gai bei de lei.
Currently Selected:
JENESIS 37: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
