JENESIS 38
38
Judabe benai Tamarle
1Aigum ze chipauting ge Judabe â pe sikina je sâu lu ze, Adullam’mpeu Hirabe kacheupeu dage tat kai di de lei. 2Chige Kanaanme leu’mpui hangkat pe ji Shuale kacheupui je Judabe ngau di de lei; pechu pa nguakelaktew lu zai ngua gai ’ndi de lei, 3zai pa ’mpung ze hena ’mpeumi lungkeu de lei, zai pe ji Erbe ’ntak kai de lei. 4Bechâng ge pa ’mpung dai ze hena’mpeumi lungkeu kadai de lei, zai pa ne pe ji Onanbe ’ntak kai de lei. 5Chipau chângge du pa hena ’mpeumi lungkeu kadai de lei, zai pa ne pe ji Shelabe ’ntak kai de lei, Shelabe je lungbe luage Judabe â Kezib ge bam di lei. 6Zai pe na meraipeu Erbe nâu hangge Judabe ne kû gai de lei, zai pe ji â Tamarle lei. 7Kane Judabe na meraipeu Erbe â Tingwang mikngau ge ziemmena kesiabe changbe ziegene Tingwang ne pechu tewchat ’ndi de lei. 8Chidadege Judabe ne Onanbe je, “Ning sipeu nâu je ngua gai be lau, zai pe napeu kinapeu changbe luigum ze ningnui tewrabe tâ ze pe peireige tewpui gai zu lau, zai ning sipeu hangge helei teichu gai be lau,” kacheu de lei. 9Kane chi helei ze pe hang chang ra mak lei be Onanbe chî di de lei; chipauziegene pe sipeu haîhik hangge pa pei gai mak ra hangge pe sipeu nâu je pa nguagaibe luage pe gu heleidui ze kedei ge (hela ’mbe) kepittua gai ’ndi de lei. 10Zai pa tâtewgaibe ze Tingwang mikngau ge hesuiyimakbe chang di de lei, zai pa ne pechu du tewchat ’ndi lei. 11Chidadege Judabe ne pe mupui Tamarle je, “A na Shelabe chîngchu mak tâne ning peu ki ge kemîpui chang ze bamkuâ zu lau,” ze kacheu de lei—pe sime gum ze pa du chai de ra hingbe ziegeneu. Dadege Tamarle tat ze pe peu ki ge bam di de lei.
12Aigum ze beting tat-hang gai dege Judabe nâu Shuale na ’mpuimi chai di de lei, zai Judabe pe lung tewhegei dai lu dadege, pe kangpeu Adullam’mpeu Hirabe je ngua lu Timnah ge pe gu meligêu chiapme dage hang de lei. 13Zai Tamarle je, “Pe gu meligêu chiap ra Timnah ’mbe ning pau hang la de lei,” ze salia gai bei dadege, 14kemîpui puâ pa gâutua lu, pe peî ’ngkum ne ’ngkumchim lu, pe luî tewkeli kam lu, Timnah ’mbe tatbe ’mpuî ge Enaim ’mbe gutbe ’mpuî’mmai ge ’ntau bam de lei; Shelabe chîngchu di de lei be pa chî lu da sede pechu kelaktew ra pei gai mak dadegeu. 15Judabe pechu ngau lu dadege pe ju ’ngkumchim’ndibe ziegene, pa â pechu pe pum zuateupui hangge ’nnum gai ’ndi de lei. 16’Mpui’ntai ’mbe pe tailam pa wang lu, acheu sa ze, “Kei lei, ning dage I jei gai ra pei lau,” ze kacheu de lei, pe mupui lei be pa chimakbe ziegeneu. Tamarle ne, “A dage nang jei ra a hang nang ’ndaikau pei ra lau?” kacheu de lei. 17Pa ne kak ze, “Kauruidung ruagene kemeipoine ning hangge I pei gu lei,” ze kacheu de lei. Zai Tamarle ne, “Chize nang pei mak tâne hangge ’nchunggaileube hang mâge â achu pei ra mei?” kacheu de lei. 18Pa ne, “’Nchunggaileube hangge ’ndaikau ne ningchu I pei ra lau?” ze kacheu de lei. Pa ne kak ze, “Ning gu baroine benai ning gu heta zai nang chuna teibe hetui ze kai lau,” ze kacheu de lei. Chidadege â pa ne chiramme pechu pei gai lu, pe dage jei gai de lei, zai pa ’mpung di de lei. 19Dadege pa zuachu lutat ti de lei, zai pe peî ’ngkumpaî gâutua lu, kemîpui puâ pa kai kadai de lei.
20’Mpuimi dagene ’nchunggaileube merua ramme lu ra hangge pe kangpeu Adullam’mpeu dage Judabe ne kemeipoine lang gai de lei. 21Zai chige bamme ziemmename je pa ’nneu gai de lei, “Enaim ge ’mpuî’ntai ge pe pum zuateupui bampui ze ’ndaige la lau?” acheu zeu. Zai penui ne rang ze, “Aige â pe pum zuateu kau bam gai me lei,” kacheu de lei. 22Zai Judabe tailam pa heletwang dai lu, acheu sa ze, “Pechu I peudau me lei; zai chige bamme ne du, ‘Aige â pe pum zuateu kau bam gai me lei,’ ze kacheu de lei” ze kacheu de lei. 23Zai Judabe ne, “Merua ramme ze pe hangge peize tei le lau, anai je teihenuitew gai mak ra hangge zeu; pie gai ni lau, aipau kemeipoine I pei gai da kane pechu nang peulak tai de lei,” ze kacheu de lei.
24Kêu chum gumbe chângge Judabe je sam pau gai ze, “Ning mupui Tamarle â hepumzuabe tâ tew de lei; zai chipau peireige du pe pum zuabe gene ’mpung di ze la de lei,” ze acheu bei de lei. Zai Judabe ne, “Pechu hela teipat lu ze rû ’ndu lau,” ze kacheu de lei. 25Pechu hela teipatbe luage, pe pau dage pa ne sam lang gai de lei, “Aipau merua ramme gu pa’mpau changpeu dagene I hena bam ra chang de lei,” ze kacheu de lei. Zai pa ne sa ze, “Ningnui je I kiam lei, baroine, heta zai hetui ze châu gu mei be ’nchet le lau,” kacheu de lei. 26Chidadege chiramme pe gu ramme lei be chî lu dege acheu sa ze, “Pa â I sua â pelingtew de lei, a na Shelabe dage pechu I peigaimakbe ziegeneu,” ze kacheu de lei. Zai pe dage jei gai dai ta di de lei.
27Pa henalungrabe ting chang dege, pe gu nebâm ge ’mpinlungbena bam de lei. 28Zai hena lung ra hangge pa kakeribe luage, hangkat poine ba â getuapat te lei; zai puakahenapui ne pe ba ’nzap lu tologielangria pe ba ge pi gai de lei, zai “Aize ne patrai lei,” ze kacheu de lei. 29Kane pe ba gut dai di dege, pie le lau, kêdabe poine lungpat te lei; zai puakahenapui ne, “’Ndaigum ze ning gu ’mpuî hangge riput lu pat lu se lau!” ze kacheu de lei. Chipauziegene pe ji â Perezbe ’ntak kai de lei. 30Chipau chângge pe kinapeu â pe ba ge tologielangria ’nta gai lu ze pat te lei; zai pe ji â Zerabe ’ntak kai de lei.
Currently Selected:
JENESIS 38: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
