LUKA 1
1
1Misonggame ne anui dage mâ-mâ tewpuigai’ndibe rasam ramme tei’ndui ze teleu ra misonggame ne ’nninghereu ze tâtewgai’ndibe ziegene, 2bepîbang gene ngau sing chîsinglume benai Hera gu sam tâ ka’ngguame, chime bau ne anui je chiramme peigaibe luigum ze, 3mâ-mâ pelane pie’mmiwang gai lu I du, nang Theophilas yilangbe, ning hangge mâ-mâ pesin-prin tatkeudibe rasam ramme raw’nchichiak kai ra ’nning’nzei gai de lei, 4dezai ningchu mâ-mâ paugaibe zat ramme ge gesang-peling nang ne chî le ra hangge zeu.
Baptistewpeu Johanbe je Lungkeu ra Rangka’ntuabe
5Judia gu heguang Herodbe ne kaheguangbe ting ge tingkupeu hangkat pe ji Zekariabe bam lei, pa â Abijabe penui baukattew ze bam lei; zai pe nâu Elizabethle ze â Aaronbe chapui lei. 6Penai hangna ze Hera mikngau ge teling ze bam lei, zai Tingwang gu samde ramme deu ge benai hingde tewgaibe ramme ge hetiâk ga ze lung bam lei. 7Kane Elizabethle â nakampui dadege, penai na ga lei, zai penai hangna chîng de chîng di de lei.
8Pe kiangname ne tâ’ngguarabe tingkak ge, Hera masuage pa tingku tâ ’nggua lage, 9tingkume gu tâtewbe sietak luigum ze hedachak kai dege, Zekariabe ne kellumki lungge gut ze mâ-perîmyibe rû ra chang di de lei. 10Zai baudime haimena â mâ-perîmyibe rube luage, hela ge kellum-kuâ ze bam lei. 11Zai mâ-perîmyibe rube herâtewbe bâm hezat’mbia ge, Tingwang gu angel’mpeu liâ ze sap bam lei. 12Zai Zekariabe ne chize ngau lu dege, pa bamhereu di, zai hing di ze pe dage kau gai de lei. 13Kane angel’mpeu ne pechu, “Zekariabai hing se lau, nang kakellumbe kuâ ze seuchang lu de lei, ning nâu Elizabethle zene ning hang ’ngngiêne ’mpeumi lungkeu gai gu lei, zai pe ji â Johanbe ze nang ’ntak kai ra de lei.
14Zai nang â hesuiyibe benai helungsuika’ntabe ngau gu lei,
zai pechu lungkeube ze misonggame ne penui suiyigaihâ gu lei;
15pa Tingwang mikngau ge kedibe kau chang gu,
zai wain benai hezau pa sak ra mak lei,
zai pa â pe pui lung gene ’nsangdu Herui Ka’nchibe zene puigit bam gu lei.
16Zai Israelme chaname misonggame je Tingwang penui Rapeu lam’mbe pa ne ngua’nreiwang gai gu lei.
17Zai Tingwang suage Elijabe gu herui,
zai tâtewchibe gene pa tat ze bam gu lei,
zai bepeume lung tak ramme ze hename lam tei’nreiwang gai gu lei,
zai hekuâpheumakme je katelingme gu kaningchingbe lam ge tei’nreiwang gai gu lei,
Tingwang hangge pezat teleukua’ndibe ze teleu ra hangge zeu,”
ze kacheu de lei.
18Dadege Zekariabe ne angel’mpeu je, “’Ndaigum ze aize I chî ra lau? I â kechipau de da, zai a nâu du chîng de daseu,” ze kacheu de lei. 19Dadege angel’mpeu ne pechu kak ze, “I Gabrielbe lei, Hera masuage sappeu zeu; aize samkeyibe ning dage salia ra hangge achu lang gai lei. 20Zai pie le lau, chiramme wangchangrabe chi a sam ze nang ’nnum’mmi mak daze airamme wangchang mak tâne nang ning kuâneupat lakzîng ze bam gu lei” ze kacheu de lei. 21Zai baudime Zekariabe je kuâ bam lei, zai pa kellumki ge bamtiedibe ze penui ’nningdaulak ti de lei. 22Zai pa hela ’mbe pat dege, penui dage nguasamsachi lak tai de lei, zai kellumki ge keliâbe pa ngau de lei be penui chî di de lei; zai penui je pa hebadam ne ka’mpau de lei, zai pa pe kuâ patlak ti bam de lei. 23Zai pa pe gu tâ’ngguarabe tingkak gu ze kam gai dege pe ki lam’mbe tat ti de lei.
24Zai chipau châng dege, pe nâu Elizabethle ’mpung di de lei, zai kêu mengeu riâ ’mbai ze bam lei; zai acheu sa ze, 25“Miramme ruagene I a dêusia bambe ze tew’ngga ra hangge Tingwang ne achu ’nggia ze aigum ze a peireige tâtew gai bei de lei,” ze kacheu de lei.
Isua Krista Lungkeurabe Rangka’ntuabe
26Zai hekêu paserukbe ge Hera dagene angel’mpeu Gabrielbe je lang gai de lei, Galili gu namdi kat Nazareth ge 27leusang ka’nchipui, Josepbe Dabidbe kiria’mpeu nâu hang rangchakkai’ndipui dage zeu. 28Zai pa ne pe dage wang lu pechu, “Kellum, Hei, nang ka’nggiabe ngaulupui, Tingwang ning dage la lei!” kacheu de lei. 29Kane pa chipau sam seu lu dege, pe lunghereu-desang di ze aigum rechâgaibe sam ’ndaikau hang chang gu mei be ’nning gai di de lei. 30Dadege angel’mpeu ne pechu, “Hing se lau, Marile gau, Hera masuage nang ka’nggiabe ngau lu de lei. 31Zai pie le lau, nang ’mpung gu, zai ’mpeumi napoine hangkat lungkeu gu lei, zai pe ji â Isua ze, nang ’ntak kai ra lei.
32Zai pa â kedibe kau chang gu,
zai pechu â Hulangbe Na ze kû gu lei;
zai Tingwang Hera ne pechu pe peu Dabidbe gu heguang-bamrak ze pei gai gu lei,
33dezai Jakobbe kiria peireige pa ne betingbeta samram ze bam gu lei;
zai pe gu Heguangram â betun gai ra mak lei,” kacheu de lei.
34Zai Marile ne angel’mpeu je, “Chize ’ndaigum changchi ra lau, I a napeu ga zeu?” kacheu de lei. 35Dadege angel’mpeu ne pechu,
“Herui Ka’nchibe ning peireige wangkeu gu,
zai Hulangpeu gu tâtewchibe ne ningchu sung gu lei;
chipauziegene chi napoine nang lungkeurabe ze â,
Hera Na ze kû gu lei.
36Zai pie le lau, ning sipui Elizabethle zene du chîng di zaine ’mpeumi napoine ’ngngiêne pe gumpui ge pung la de lei; chi nakampui kacheupui gu chuna paserukbe kêu chang de lei. 37Hera dage mâ de changlakbe bam ra mak daseu,” kacheu de lei. 38Dadege Marile ne, “Pie le lau, I â Tingwang lun tewpui de lei; ning sam ranggaibe luigum ze peize a dage wangchang lau,” kacheu de lei. Dadege angel’mpeu pechu put kai nan ze tat ti de lei.
Marile Elizabethle dage ’Ngkiâmiebe
39Zai chipau ting ge Marile chu lu ze, peloaram Judia gu namdi ’mbe kelua ze tat ti de lei. 40Zai Zekariabe ki ge pa gut lu, Elizabethle je rechâ gai de lei. 41Zai Elizabethle ze Marile ne pechu rechâgaibe kuâ seugap lu dege, pe bungpui gene ’ngngiêne ’ndiechu di de lei; dadege Elizabethle â pe lung ge Herui Ka’nchibe ne pui di de lei. 42Dadege pe rankai sa ze, “Mpuimi ruage ningchu â suang ze bam gu lei, zai ning gu henarak rachî je suang bam gu lei! 43Zai ’ndaigumbe ziegene ai a dage wangchang lau, a Wangpeu pui zene achu ’ngkiâmiebe zeu? 44Pie le lau, nang ne achu rechâgaibe kuâ seugap dege, a gu henarak gene ’ngngiêne pe suiyi ze ’ndiechu lei. 45Zai Tingwang dagene pechu mâ-ranggaibe ze tewpui gai gu lei be ’nnumka’mmipui je peize suang bam lau,” ze kacheu de lei.
Marile gu Getoabeleu
46Zai Marile ne,
“A keringbe ne Tingwang je suang’ndi gai de lei,
47Zai a lung zene achu tewka’nringpeu,
Hera dage pe suiyigaihâ lei,
48pe luntewpui kecheilungpungbe pa ngau lu de lei.
Zai pie le lau,
chuna gene seu ze reheime leine ne achu helungkatemipui ze kû gu lei;
49a hangge tâtewchipeu ne mâ-kedibe ramme tew gai bei de lei,
zai pe ji â ka’nchibe lei.
50Zai Pechu hingme leine peireige â reheipiakeu tâne pa ka’nggiabe bam bam gu lei.
51Pe ba ne pe ranchi tewlia lei,
zai pa ne penui lungge gechîrettewbe ka’nningme leine je tewtimrarip kai bei lei,
52pe ranchime je penui gu heguang-bamrak gene pa ne chakkeu ’nde lei,
zai kechei-luilungpungme je pa ne teichu’ngngu gai ’nde de lei,
53Ka’njeime je â,
mâ-keyibe ne ’nggeu ra pa ne tew gai bei de lei,
zai keheume je â penui barua lang gai ’nde lei.
54Pa ka’nggiabe chibam ra hangge pe guâ ka’ngguapeu Israelbe je pa ne ’ngngâ bei de lei,
55anui paume zai Abrahambe,
zai pe chaname dage sam ranggaibe luigum zeu,” kacheu de lei.
56Zai Marile kêu chum riâ pe dage bam gai lu dege, pe ki lam tat dai di de lei.
Baptistewpeu Johanbe je Lungkeube
57Zai chunage Elizabethle hena lungrabe ting chang di de lei, zai pe na ’mpeumi napoine lungkeu de lei. 58Dadege pe ramname benai pe kiriame ze Tingwang ne pechu ’nggia-ka’ndibe chî lu ze penui suiyigaihâ de lei. 59Zai hezie padesatbe mai ge, ’ngngiêne je rumgeten ra hangge penui wang de lei; dadege penui ne pe ji hang pe peu Zekariabe ji luigum ze ’ntak kai ra lunei de lei, 60kane pe pui ne. “Mak lei, pe ji â Johanbe ze ’ntak kai ra de lei,” acheu bei de lei. 61Dadege penui ne pechu, “Ning kibaume ruage aipau ji ze lume mî de ga gerei zeî lau,” kacheu de lei. 62Dadege napoine ji hang pe peu ne ’ndaikau ’ntak kai nei mei be ’nneu ze penui ne pechu hebadam ne ’mpau gai de lei. 63Dadege rawrabe kuak pa kie lu, pa ne chige “Pe ji â Johanbe lei,” ze raw gai de lei, dadege penui ’nteumena ’nningdaulaklu-lu bam di de lei. 64Dadege luakatne pe mui latpat kai bei, zai pe leiria heipat kai bei de lei, zai sam sapat ze Hera je toa di de lei. 65Dadege pe ramname leine hing di de lei, zai chipau rasam ramme ze Judia bak leine ge salumteu ze tat ti de lei. 66Chize seume leine chiramme penui lung ge kai gai de lei, acheu sa ze, “Aipau napoine ze ’ndaigumbe zat changrabe kau se lau?” ze acheu zeu. Tingwang ba ne pe dage bam bam bei de lei.
Zekariabe gu Kemeu Tâ
67Zai pe peu Zekariabe â Herui Ka’nchibe ne pui ze bam di de lei, zai acheu sa’ntua gai ze,
68“Israelbe Rapeu Tingwang je peize toa bam lau,
pe gu ziemmename dage pa ne ’ngkiâmie ze ripat kai bei,
69zai pe gu tâka’ngguapeu Dabidbe kiria ge anui hangge tewka’nringbe meli’nsei kie getuachu gai bei de lei,
70’ndâge pe gu kemeume ka’nchime mui gene pa ne ranggaibe gum zeu,
71anui reime benai anui je ngaugailakme leine ba gene anui je tew’nringpat kai be ra hangge zeu;
72dezai anui paume je ka’nggiabe samhatkaibe ze tewpui gai be ra,
zai pe gu samhatkaibe Ka’nchibe ze chibam ra,
73anui peu Abrahambe je pa sam deseugai’ndibe ze,
74mi teureime dagene meupatkaibeime,
chi anui zene hing mak ze pe guâ ’nggua le ra pei gai ra hangge zeu,
75anui keringbe ting tâluî ge pe masuage ka’nchibe katelingbe gene bam lu zeu.
76Zai nang, ’ngngiêne,
ningchu â Hulangpeu gu kemeu’mpeu ze kû gu lei;
nang ne Tingwang suage pe gu ’mpuî kedâkua ra tat’ntua gu daseu,
77pe gume hangge penui hemui kelunbe gene tewka’nringbe chî ra pei gai ra,
78kehu ’mbene anui peireige tingnaimikpui bapat dezai,
anui Rapeu ’nggia keyibe gene
79kemuîbe ge benai kechaibe kezui ge bamdime dage kebabe pei gai ra,
desieyibe lungkatemibe ’mpuî ge anui je nguatat kai ra hangge zeu,” ze kacheu de lei.
80Zai chi ’ngngiêne ze chîngbi-bi-chu ze herui lam ge pe ranchibi-bi di de lei. Zai Israelme dage pechu liâ mak tâne hênamkang ge bam bam di lei.
Currently Selected:
LUKA 1: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
