MARKA 16
16
Ringchukadaibe
(Mat 28.1-8; Luk 24.1-12; Jhn 20.1-10)
1’Ntakbambe mai kam gai dege, Mari Magdalinle, Jakobbe pui Marile, zai Solomile penui pechu ’nnuk kai ra hangge mâ-perîmyibe lui lu teiwang de lei. 2Zai ’ntakkak gu tingnaimikpui raîlangbe hechuasûn ge, naimik pat dege heraw ’mbe penui tat ti de lei. 3Zai penui karai kat-kat je, “Châu ne heraw-mui ge tingchukâng ze anui hangge kelatpat kai ra lau?” kacheu de lei. 4Zai ’ngngangchu pie gai dege, chi tingchukâng kelatpat ti laleube penui ngau de lei—chize di-kadesang dadegeu. 5Zai heraw lungge penui gut dege, rehang’mpeu hangkat paî kehâbe ne bâsup lu ze hezat’mbia pa ’ntaubambe penui ngau lu ’nningdaulaklu-lu bam de lei. 6Zai pa ne penui je, “Lu-lu bam se lau; Isua Nazareth’mpeu giagai’ndipeu je ningnui peu lau. Pa â chu dai de lei, pa â aige ’ngga de lei; penui ne pechu ’njeigaibe bâm ge pie gai ni lau. 7Kane tat ze pe gu kenieme benai Peterbe je, Galili ’mbe ningnui sua pa â raîtat te lei, ningnui je pa ranggaibe luigum ze chige ningnui pechu ngau gu lei, ze ranggai be lau,” kacheu de lei. 8Hingkakedunbe benai ningdaulakbe penui peireige wangchangdibe ziegene penui heraw gene zuapat lu, paktat ti de lei; penui kehingbe ziegene mi dage de mâ de sa mak lei.
Mari Magdalinle je Isua Liâbe
(Mat 28.9,10; Jhn 20.11-18)
9Zai chunage ’ntakkak gu tingnaimikpui raîlangbe mai ge, pa ne herasiabe hangsena je kelipatkaibeipui Mari-Magdalinle je pa hechuasûn liâ gai raî de lei. 10Tingtie Isua dage bamme, chi penui hap ze heu ze bambe luage pa ne tat ze penui je rang gai bei de lei. 11Kane pa ring la lei, zai pa ne pechu ngau lu de lei be sam penui seu lu sedu penui ’nnum’mmi mak tai lei.
Kenieme Hangna dage Isua Liâbe
(Luk 24.13-35)
12Aipau chângge penui ruage hangna penai heram ’mbe tatpatbe luage kêdabe luîtak gene pa penai je lia de lei. 13Zai penai ne helatwang dai lu, kêdame suage salia bei da, kane penai je du penui ’nnum’mmi mak tai lei.
Hangkereu-ze-katme je Isua Liâbe
(Mat 28.16-20; Luk 24.36-49; Jhn 20.19-23; Tât 1.6-8)
14Chipau chângge hangkereu-ze-katme penui mâ-teu ze ’ntau lage, pa ne penui je lia de lei, zai pa ne penui ’nnum’mmimakbe, zai penui lungchibe ziegene penui je ka’ngngiam de lei, pa chukadaibe chângge pechu kengaume je penui ’nnum’mmimakbe ziegeneu. 15Zai pa ne penui je, “Kedeirei leine ge tat ze sam keyibe ze ’ndamgai’ndibe zat leine dage paurua lau. 16’Nnum’mmi ze baptistewlube kau je â tew’nring gai bu lei; kane ’nnum’mmimakbe kau je â tew’ngkui gai bu lei. 17Zai ’nnumka’mmime je â ai ka’nchetbe ramme zene sui ze bam gu lei! A ji gene herasiabe ramme je penui kelitua gu, zai hekuâ karchibe ramme gene penui sam sa gu lei; 18penui ne henêu ramme kuaichu ze bam gu, zai mâ-mâ mi je tewchatrabe dui sak sede chiramme ne penui je tewhejam ra mak lei; hereu-teuneume peireige penui ne penui ba die gai gu lei, dezai penui yi du lei,” ze kacheu de lei.
Tinggîm ’mbe Isua je Teichudibe
(Luk 24.50-53; Tât 1.9-11)
19Dadege Heguang Isua penui je ’mpaugailube chângge tinggîm ’mbe pechu teichu di ze, Hera hezat’mbia ge ’ntau di de lei. 20Zai penui zuapat ze pebâm’nsangne ge Hera sam pau gai de lei, zai Heguangpeu ne penui je nguatatew ze, paugaibeibe sam ze ka’nchetbe ramme zene tew’ntip kai bei de lei. Amen.
Currently Selected:
MARKA 16: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
