MARKA 15

Pilatbe suage Isua je Nguawangbe

(Mat 27.1,2,11-14; Luk 23.1-5; Jhn 18.28-38)

1Hechuasûn dege, gechîngme benai leisirawme zai samrambeki ge bamme leine je tingkugechîngme ngua lu kahedei de lei; zai Isua je pi lu, zai nguatat ze Pilatbe dage pechu peipat kai de lei. 2Zai Pilatbe ne pechu, “Nang Judame wangpeu de mei?” ze ka’nneu lei. Dadege pechu pa ne kak ze, “Nang ne chigum ze sa gai ’nde lei,” kacheu de lei. 3Tingkugechîngme ne pe peireige misongga ze kesia’ndam gai bei de lei. 4Zai Pilatbe ne pechu ’nneu dai ze, “Nang kak kai ra mâ de ga mei? Ni, ning peireige penui ne ’ndaizeuge kesia’ndamgaibe zeu,” kacheu de lei. 5Kane Isua ne mâ de kak sua mak bei dege Pilatbe ningdaulak ti de lei.

Isua je Tewchat ra Samramgaibe

(Mat 27.15-26; Luk 23.13-25; Jhn 18.39—19.16)

6Zai chunage kahengîbe ting ge kebangki ge bamme hangkat penui ne kiebei-beibepeu je â ’mpat kai bei bei lei. 7Zai kebangki ge katîmphibe kau ramme bamme ruage hangkat katîmphibe gene kegîbe tâ tewgailupeu Barabbabe ze kubepeu bam lei. 8Zai baudime ne hang lu Pilatbe ne pa tingtie ge tew-tew gum ze penui hangge tew gai ra kiechu di de lei. 9Dadege pa ne penui je kak ze, “Ningnui hangge Judame Wangpeu je I ne ’mpat kai be ra lunei mei?” kacheu de lei. 10Chize hemimeube gene pechu tingkugechîngme ne pe dage peipat kai de lei be pa chî lu dadegeu. 11Kane Barabbabe je peize pa kelei ge ’mpat kai be ra tingkugechîngme ramme ne baudime je gechung gai bei de lei. 12Dadege Pilatbe ne penui dage sa dai ze, “Acheuzaine chi Judame Wangpeu acheu ze ningnui ne kubepeu dage I ne ’ndaikau tew gai be ra lau?” kacheu de lei. 13Zai penui ne ’nrungpat dai ze, “Pechu gia gai zu lau,” kacheu de lei. 14Zai Pilatbe ne penui je, “’Ndaitew ze lau, ’ndaikau kesiabe tâ pa ne tew gai ’ndi lau?” kacheu de lei. Kane penui ’nrungranbi-bi ze, “Pechu gia gai zu lau,” kacheu de lei. 15Dadege Pilatbe pa ne baudime lungwângchangbe tewgaineibe ziegene penui hangge Barabbabe je ’mpat kai bei de lei; zai Isua je â pa ne lakkegit kai lu, gia gai ’nde ra peipat kai bei de lei.

Sipaime ne Isua je Teihenuitewbe

(Mat 27.27-31; Jhn 19.2,3)

16Zai sipaime ne pechu heguang kisîam kedibe (Praetorium kacheube) lungge nguagut lu, zai sipaime bau leine je kûwang’ndui kam gai de lei. 17Dadege penui ne pechu paî kegiebe ne bâ gai lu, zai hetu ne kraun hang tewlube ze pe peî ge kai bei de lei. 18Zai penui ne pechu hebakellum tewlia ze,, “Kellum, Judame Wangpeu!” acheu chu di de lei. 19Zai penui ne pe peî ge hekupum ne lak zai pechu ’nchai’ntui gai ze pe suage kukdungkeuliâ gai de lei. 20Zai penui ne pechu teihenuitew gai lu dege paî giebe ze gâupat lu ze, pe paî ne pechu bâ gai de lei. Zai pechu gia gai ra hang penui ne nguatat ti de lei.

Isua je Heling ge Giagaibe

(Mat 27.32-44; Luk 23.26-43; Jhn 19.17-27)

21Zai mige heram gene wangbe gene chipau ’mpuî ge patdaupeu Kurini’mpeu Simonbe, Alekzandar benai Ruphabe peu je pe gu heling ze ’nchi-chine pua ra lang gai de lei. 22Zai Golgotha chize, Timpeîkuak bâm kacheube bâm ’mbe penui ne Isua je nguatatchang gai de lei. 23Zai penui ne pechu Mur kebutkailube wain ze pei gai bei de lei; kane chize pa ne sak mak tai lei. 24Zai penui ne pechu heling ge gia gai bei de lei, zai pe paî ramme penui hang ’nzi ze châu ne ’ndai-daibe tei ra mei ze penui hangge hedachakpie de lei. 25Zai penui pechu heling ge giagaibe hî ze hechua ’nchet sekui hî di de lei. 26Zai pechu chau’ngkui gai ra changbe gu sam rawbe giapatkaibe “Judame Wangpeu” acheu ze kiâpat lei. 27Zai hegasut-teume hangna je pechu nguagia’mpam gai de lei, hangkat pa hezat’mbia, zai hangkat pa heku’mbia gezeu. 28Zai “Pechu ze â hingdeka’ngkame ruage riam’mpam gai bei de lei,” acheu ze rawgaibe sam tewpui gai ’ndi de lei. 29Zai chige tatkaidaume ramme ne pechu kerai ze, penui peî kejit ze acheu sa ze, “Aha ’Nang kellumki tew’nsia lu ze hezie kechum lung gene chize tei’nsapdairapeu, 30ning runne ningchu tew’nring lu, zai heling gene wangkeu de lau!” kacheu de lei. 31Chigum ze tingkugechîngme benai leisirawme penui karai ge pechu teihenuitew ze, “Miramme je pa ne tew’nring lu, pe runne pechu tew’nring lak ze ni. 32Chunage peize Krista, Israelme Wangpeu je heling gene wangkeu de lau, chidezai anui ngau lu ze ’nnum’mmi le ra hangge zeu,” ze kacheu de lei. Zai pechu nguagiagaibeime ne du pechu ka’nrû de lei.

Isua Chaibe

(Mat 27.45-56; Luk 23.44-49; Jhn 19.28-30)

33Zai tîngna ’nchet kereu ze kena gene chu ze hegî ’nchet kechum riâ heram pelane ge muî kam di de lei. 34Zai hegî ’nchet kechum ge Isua pe rankai ’nrung ze, “Elo-i, Elo-i, lama sabak-thani?” kacheu de lei, chize â, “A Rapeu, a Rapeu, ’ndaitew ze nang achu sâu gai lau?” kacheube lei. 35Zai chige sapkuame hanggesame ne chize seu lu, “Pie le lau, Elijabe je pa kû la de lei,” kacheu de lei. 36Zai hangkat ne paktat lu, (’ndiau’mpichûp gumbe) sponge ge wain hiabe sûmpuigit kai lu, hekupum ge chize kai lu, pechu sak ra pei de lei, acheu sa ze, “Mak kerei lei, pechu likeu ra hangge Elijabe wangkeu gu mei be anui piekua-gairî kei lei,” kacheu de lei. 37Dadege Isua ne pe rankai ’nrung gai lu, pe chui lutud kai di de lei. 38Zai kellumki ge paîlîmsungbe bepeî ’mbene rikeu ze, bepî rikeuchang ze pi na ripedaktat ti de lei. 39Zai sipai-haîmuiteipeu Isua tailam sap’nsuabambepeu ne aigum ze pa keringbe saudibe tak ngau lu ze, “Pelingsing ze aipaupeu â Hera Na run lei,” ze kacheu de lei.

40’Mpuinung ramme ne du kedeu ’mbene sappie bam de lei, chime ruage Mari Magdalinle, zai henabipeu Jakobbe benai Josepbe pui Marile, zai Solomile bam lei, 41Galili ge pa bambe ting ge penui ne pe chai sui ze pe guâ ’nggua ze bammme bau zeu; zai Jerusalem ’mbe pechu nguahangme ’mpuimi kêdabe kau ramme du misongga ze bam lei.

Isua je Kechaibaibe

(Mat 27.57-61; Luk 23.50-56; Jhn 19.38-42)

42Zai hegî di dege, chize ’ntakbambe mai suabe mai Tâtewkakedâbe mai dege, 43Josepbe, Arimathea’mpeu, samrambeki ge hengêutewbuibe pumling kau pa du Heraram je heguîkuabambepeu, kuugiereu ze Pilatbe dage tat ze Isua pum ze kie de lei. 44Zai pa chai di de mei ze Pilatbe ’nninglu-lu bam de lei; zai sipai haîmuiteipeu je kûwang lu, pa chai â chai di run de mei be ka’nneu de lei. 45Isua â chai di de lei be sipai haîmuiteipeu dagene pa chîdesi lu dege, kechaipum lu ra Josepbe je pa lun bei de lei. 46Zai Josepbe ne betachiâmbe paî lui lu, zai Isua je likeu lu, betachiâmbe paî ne kebit kai lu, tingchu ge giagailube heraw ge pechu ’njei gai de lei; zai heraw kemui ge tingchukâng ne ’ngkuanam gai bei de lei. 47Mari Magdalinle benai Josepbe pui Marile â Isua je kaibe bâm ngau de lei.

Currently Selected:

MARKA 15: ZEMEBSI

Highlight

Copy