MARKA 3
3
Pe ba Katlam Chaibepeu
(Mat 12.9-14; Luk 6.6-11)
1Zai pa ka’nduibeki ge gut kadai de lei; zai chige hangkat pe ba katlam chaibepeu bam lei. 2Zai ’ntakbambe mai ge Isua ne pe ba katlam chaibepeu je tew’mmi gai gu mei be penui pechu rikpie bam lei, pe peireige kesia’ndam gai ra hangge zeu. 3Zai pa ne pe ba katlam chaibepeu je, “Ailia wang lau,” kacheu de lei. 4Dadege pa ne penui je, “’Ntakbambe mai ge keyibe tew ra mei, nune tewhereu ra mei, nune tew’nring ra mei, nune tewchat ra mei be hangge besie mei besie mak lau,” ze acheu bei de lei. Kane penui kuâneu mak bam di lei. 5Zai pe rata ne penui je pierua gai lu, zai penui lungchibe ziegene pe suisia di ze, chipau peu je, “Ning ba getuapat lau,” acheu bei de lei. Pa pe ba getuapat kai de lei, zai pe ba ze yi di de lei. 6Pharisaime zuapat lu, ’ndaigumbe tak gene pechu tew’nsia ra mei be hangge keluakkelet Herodbe kumme dage kahedei de lei.
Sungkling Kung ge Baudime bambe
7Dadege Isua pe gu kenieme je ngua lu sungkling ’mbe ’mbiatat ti de lei, zai Galili gene baudime misongga ze pe chai suitat ti lei; 8zai Judia gene du zai Jerusalem gene du Idumia gene, Jordan gene Tira benai Sidon gene du baudime misonggame pa tâtewbe rasam seu lu, pe dage zuawang de lei. 9Zai pe hangge ’nnei tinggeukuâ gai ra kenieme je pa rang gai de lei, baudime ziegeneu, makchai â, penui ne pechu tew’nsia gu daseu; 10misonggame je pa ne tew’mmi bei dadege herarît gechâm-châmbe bamme zene peize pechu deî gai ra pe tailam hengeiwang de lei. 11Zai herui kahebâbe ramme pechu ngau tânege pe suage kâukeu ze, penui rankai ’nrung ze, “Nang â Hera Na lei,” acheu chêu lei. 12Zai pa ne penui je pa châu mei be sapakpat me ra diesing gai bei de lei.
Apostol Hangkereu-ze-Kename je Isua ne Kakelângbe
(Mat 10.1-4; Luk 6.12-16)
13Zai pa ne ka’nchâme je pe lam wang ra kû gai bei de lei, dadege pe dage penui zuawang de lei. 14Dadege pe dage bam ra, zai Hera sam paurua ra lang gai ra, 15zai rezietei lu ze herasiabe je kelitua ra hangkereu-ze-kename pa ne sumgaime ze: 16Simonbe pa ne Peterbe ze kacheupeu; 17Zebedaibe na Jakobbe benai Jakobbe kinapeu Johanbe, pa ne Bo-anerjes (chize â, Tingcheibe name) acheu kupeu kena; 18Andriabe, Philipbe, Bartholomaibe, Mathaibe, Thomasbe, Alphaibe na Jakobbe, Thadaibe, zai Kanan’mpeu Simonbe, 19zai Juda-Iskariotbe pechu zuapeu, aime bau de lei. Dadege Isua kilûng ’mbe gut ti de lei.
Isua benai Be-elzebul
(Mat 12.22-32; Luk 11.14-23; 12.10)
20Zai baudime chige wang’ndui gai dai bei dadege, Isua benai pe gu kenieme â mâ du teuchi lak tai de lei. 21Ziemmena ramme ne, “Pa â meluang di la de lei,” ze acheubeibe ziegene pe kiduîme chize seu lu dege, pechu ngua ra tat ti de lei. 22Zai leisirawme Jerusalem gene wangkeume ne, “Pechu â Be-elzebul ne kangua de lei, zai herasiabe wangpeu gu rezie gene pa herasiabe ramme je kelitua lei,” ze kacheu de lei. 23Dadege pa ne penui je pe dage kûwang lu, sam’nda ne penui dage sa ze, “’Ndaigum ze Satan ne Satan je kelituachi ra lau? 24Heguangram kat zene pe runne pekarai hegei dizai â, chipau heguangram ze sapchi lak lei. 25Heki-kelak kat zene pe runne pekarai hegei dizai â chipau kelak ze sapchi lak lei. 26Zai Satan du pe runne pekarai hegei ze pâng dizai â, pa sapchi lak lei, kane tud kai de ra runne de lei. 27Kane peranchipeu ki ge gut ze mî de pe gu kerua kehiautatchi lak lei, chi peranchipeu je pirai makchai aî; dezai pe ki ze kehiauchi duî zangnêu.
28“Pelingsing ze ningnui je I rang lei, ziemmena gu hemui ramme benai penui ne Hera je sakahebâbe ramme leine ze lun dui lei; 29kane mi-mige de Herui Ka’nchibe je saka’nsiabe kau â, mâtew-tewsedu kelunbe ngau mak lei, kane betundaimakbe hemui gene ’ngkui ze bam lei” — kacheu de lei. 30“Pe dage herui kahebâbe la lei,” ze penui ne acheubeibe ziegeneu.
Isua Pui benai Pe Kiname
(Mat 12.46-50; Luk 8.19-21)
31Dadege pe pui benai pe kiname wang de lei; zai hela ge sap lu, pechu kû ra pe dage lang gai de lei. 32Zai baudime ne pe taige ’ntauguâgit bam lei; dadege penui ne pechu, “Ning pui benai ning kiname hela ge ningchu peu la lei,” acheu bei de lei.
33Dadege pa ne kak ze, “Châume ze a pui, zai a kiname lau?” acheu bei de lei. 34Zai pe taige ’ntauguâme je pa heguarua gai lu, pa ne “Aige a pui benai a kiname â la de lei! 35Mi-mige Hera ’nning tewbe kau ze a kinapeu da, zai a kinapui da, zai a pui de lei,” ze kacheu de lei.
Currently Selected:
MARKA 3: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
